2012 წლის 12 დეკემბერს გამოვიდა საქართველოს მთავრობის დადგენილება N463 “საქართველოს სახელმწიფო საშინაო ვალის პრობლემათა შემსწავლელი სახელმწიფო კომისიის შექმნის შესახებ“ საქართველოს მთავრობის 2004 წლის 15 ნოემბრის №108 დადგენილებაში ცვლილების შეტანის თაობაზე. დადგენილებას ხელს პრემიერ-მინისტრი ბიძინა ივანიშვილი აწერს,
აღნიშნული დადგენილების პირველი მუხლის მეორე ნაწილში ვკითხულობთ: “ეთხოვოთ საქართველოს პარლამენტის საფინანსო-საბიუჯეტო კომიტეტის თავმჯდომარეს, საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარეს, გენერალურ აუდიტორს, ქალაქ თბილისის მერს, საქართველოს ეროვნული ბანკის პრეზიდენტსა და სსიპ – საქართველოს სტატისტიკის ეროვნული სამსახურის აღმასრულებელ დირექტორს, რომ წევრის სტატუსით მონაწილეობა მიიღონ სახელმწიფო საშინაო ვალის პრობლემათა შემსწავლელი სახელმწიფო კომისიის მუშაობაში.
3. კომისიის უფლებამოსილების ვადა განისაზღვროს 2014 წლის 1 იანვრამდე.”.
აღნიშნულ კომისიას მუშაობა ანაბრების თემაზეც მოუხდება, რადგან მისი ნაწილი ქვეყანას შიდა ვალად აქვს აღებული, რაც იმას ნიშნავს, რომ გასტუმრების ვალდებულებაც ეკისრება
ამას არც საპარლამენტო უმრავლესობის წარმომადგენლები უარყოფენ “გურია ნიუსთან” საუბრისას. საპარლამენტო უმრავლესობის ლიდერი, დავით საგანელიძე აცხადებს, რომ ანაბრების გასტუმრებაზე მთავრობამ უნდა იფიქროს”
“პირდაპირ გეტყვით, პარლამენტში ეგ საკითხი ჯერჯერობით არ არის შემოსული და მაგ კუთხით ჩვენ არ ვმუშაობთ. ბუნებრივია, ამაზე უფრო აქტიურად მუშაობს მთავრობა და მსჯელობენ იმაზე, რისი საშუალებაა, რომ მოხდეს ამ ვალის გასტუმრება.
მოგეხსენებათ, მუდმივად არის იმაზე საუბარი, რომ საბჭოთა ანაბრები მთლიანად შიდა ვალში უნდა აიღოს ხელისუფლებამ და შესაბამისად, მერე გამოძებნოს საშუალება, რომ ეტაპობრივად მოხდეს მისი გასტუმრება. ასეც უნდა მოხდეს. შესაბამისად, როგორ და რანაირად განხორციელება, ეს მთავრობის საფიქრალი და გადასაწყვეტია.
რას ფიქრობენ ამასთან დაკავშირებით თავად მთავრობის წევრები, ამასთან დაკავშირებით “გურია ნიუსმა” კომენტარის გაკეთება ჯანდაცვის მინისტრს, დავით სერგეენკოს თხოვა.
_ ბატონო დავით, საბჭოთა ანაბრების თემა ბოლო პერიოდში აქტუალური გახდა. საპარლამენტო უმრავლესობის დიდი ნაწილი აცხადებს, რომ მთავრობამ ამ საკითხის შესწავლა უნდა დაიწყოს. გარკვეულწილად, ეს თემა მიბმულია იმ ბენეფიციარებთან, რომლებიც თქვენს სამინისტროსთან არიან პირდაპირ კავშირში, მაგალითად პენსიონერები, სოციალურად დაუცველები, რომლებმაც, თავის დროზე საარსებო წყარო დაკარგეს ანაბრების სახით. თქვენი მოსაზრება როგორია ამ საკითხზე?
_ ჩემი აზრი ის არის, რომ ადამიანებს არ უნდა დაჰპირდე იმას, რისი გაკეთებაც არ შეგიძლია.
უნდა ითქვას, რომ ეს ყველაფერი მიბმულია ბიუჯეტზე, რომელიც, მოგეხსენებათ, უთვლადი არ არის. მე ვფიქრობ, რა თქმა უნდა, შესაძლებელია იმ პროცესის დაწყება საბჭოთა ანაბრებთან დაკავშირებით, რასაც ჰქვია მეთოდოლოგიის შემუშავება და მომზადება.
კი არ უნდა უთხრა, აბა მობრძანდით, ფული უნდა დაგირიგოთო, არამედ შესწავლილი, დათვლილი და გადამოწმებული უნდა იქნას ყველაფერი და როგორც კი გამოჩნდება ამის ბიუჯეტური შესაძლებლობები, დაიწყოს პროექტის რეალიზაცია. ეს აბსოლუტურად რეალურად მიმაჩნია. თუ ეს მოხდება, იქნება სამართლიანი, მაგრამ უნდა გაკეთდეს სწორად. ცარიელი დაპირებების წინააღმდეგი ვარ.
_ თუმცა, წინასაარჩევნო პერიოდში ეს “ნაციონალური მოძრაობის” ერთ-ერთი მთავარი დაპირება იყო…
_ დიახ, ვიცი და სწორედ მაგიტომ გეუბნებით, რომ მხოლოდ დაპირებების წინააღმდეგი ვარ. აქ საჭიროა საკითხის ძირეულად შესწავლა.
_ საბჭოთა ანაბრები სახელმწიფომ შიდა ვალად აღიარა. ექსპერტები ამბობენ, რომ თუ ხელისუფლება პასუხისმგებლიანია, მაშინ ეს ვალი უნდა გაისტუმროს.
_ სწორედ მაგას ვამბობ მეც. ეს ნამდვილად გასაკეთებელია, მაგრამ უნდა მოხდეს სწორად და ისე არ უნდა დაიწყო, რომ ყველაფერი არ დათვალო.
