საქართველოს საგარეო საქმეთა მინისტრი ნატოს გენერალური მდივნის სპეციალურ წარმომადგენელს სამხრეთ კავკასიასა და ცენტრალურ აზიაში ჯეიმს აპატურაის შეხვდა. შეხვედრაზე მხარეებმა ნატო-საქართველოს ურთიერთობები და ავღანეთის მისიაში საქართველოს შემდგომი მონაწილეობის საკითხი განიხილეს. საქართველოს საგარეო საქმეთა მინისტრის განცხადებით, საქართველო ავღანეთის სამშვიდობო მისიაში მონაწილეობას 2014 წლის შემდეგაც მიიღებს:
“ამ ეტაპზე საქართველო ავღანეთში 1700-მდე სამხედრო მოსამსახურით არის წარმოდგენილი. 2014 წლიდან ავღანეთში ისედაც შეიცვლება სამშიდობო ფორმატი და ჩვენ უკვე შცვლილი ფორმატის ფარგლებში გავაგრძლებთ ამ მიმართულებით ნატოს-თან თანამშრომლობას”– განაცხადა მაია ფანჯიკიძემ.
ჯეიმს აპატურაის განცხადებით, დღეს ფოკუსირება ხდება ავღანეთში 2014 წლის შემდგომ ეტაპთან დაკავშირებულ საკითხებზე; იმაზე, თუ რა პოლიტიკური სიტუაცია იქნება ადგილზე ნატო-ს მისიის დასრულების შემდეგ.
“ჩვენ დიდი ყურადღება დავუთმეთ ავღანეთის თემის განხილვას. მე კიდევ ერთხელ მადლობა გადავუხადე მინისტრს საქართველოს მიერ სამშვიდობო ოპერაციაში შეტანილი წვლილისთვის და გამოვხატე მწუხარება გაღებული მსხვერპლის გამო. ჩვენ გვექნება განსხვავებული კონფიგურაცია განსხვავებული მისიისთვის. დამდეგ თვეში გვეცოდინება, თუ რა ხედვა ექნება ნატო-ს და იმედი გვაქვს, რომ შემდგომ, საქართველოც იქნება ამ პროცესის მონაწილე” – აღნიშნა აპატურაიმ – “როდესაც საგარეო საქმეთა მინისტრთან ავღანეთის თემის პარალელურად ჩვენი პარტნიორობის საკითხებს განვიხილავდით, მე მივესალმე დღეს სტრასბურგში საქართველოს პრემიერის გამოსვლას. ჩვენ ვადასტურებთ საქართველოს ევრო-ატლანტიკურ მისწრაფებებს, ჩვენ ახლა ვიცით და მივესალმებით, რომ ეს იყო მრავალპარტიული შეთანხმება და ვფიქრობ ეს არის მესიჯი, რომელიც კარგად გავრცელდა აქ, ნატო-ში. ჩვენ ვხედავთ, რომ კოჰაბიტაცია კარგად მიმდინარეობს საგარეო პოლიტიკის ამ უმთავრესი პრიორიტეტის კუთხით. ჩვენ ძალიან პოზიტიურად ვაფასებთ თავდაცვის სფეროში ამჟამად მიმდინარე რეფორმებს. ეს რეფორმები მნიშვნელოვანია იქიდან გამომდინარე, რომ უფრო და უფრო აახლოებს საქართველოს ნატო-ს სტანდარტებთან. ჩვეთვის მნიშვნელოვან ქვაკუთხედს წარმოადგენს ის ფაქტი, რომ ივნისში ჩრდილო-ატლანტიკური საბჭო ჩამოვა საქართველოში ჩვენ ამისთვისაც გავდივართ მოსამზადებელ სამუშაოებს”;
ჯეიმს აპატურაიმ კომეტარი გააკეთა საქართველოს საგარეო საქმეთ მინისტრისა და აშშ-ს სახელმწიფო მდივნის მომავალ შეხვედრაზეც: “ჩემთვის არ წარმოადგენს სიურპრიზს ის ფაქტი, რომ სახელმწიფო მდივან კერის სურს შეხვედრა საქართველოს საგარეო საქმეთა მინისტრთან. საქართველო ნატო-ს ძალიან მნიშვნელოვანი პარტნიორი და ასპირანტი ქვეყანაა და ასევე აშშ-ს კარგი მეგობარი. შესაბამისად, სახელმწიფო მდივანი იყენებს ამ შესაძლებლობას”.
ნატო-ს მინისტერიალის ფარგლებში საქართველოს საგარეო საქმეთა მინისტრმა უკვე გამართა ორმხრივი შეხვდრები გერმანიის ფედერაციული რესპუბლიკის საგარეო საქმეთა მინისტრთან გიდო ვესტერველესთან, ასევე შეხვდა კანადის საგარეო საქმეთა მინისტრს ჯონ ბერდს, თავის არაბ კოლეგას, არაბეთის გაერთიანებული საემიროების საგარეო საქმეთა მინისტრს ანვარ გარგაშს.
