“ქვეყანაში შექმნილი არასახარბიელო ეკონომიკური მდგომარეობის გამო აუცილებელია საქართველოს ხელისუფლებამ გადადგას შემდგომი სწრაფი და ქმედითი ნაბიჯები ვითარების გამოსწორებისა და დასაქმების ხელშეწყობის მიზნით:
1. ახალი სამუშაო ადგილების შექმნის პროცესის სტიმულირების მიზნით აუცილებელია მოხდეს გადასახადების შემცირება ისე როგორც ეს იყო დაგეგმილი საგადასახადო კოდექსში 2012 წლის დეკემბერში მიღებულ ცვლილებებამდე და მაქსიმალურად შენარჩუნებულ იქნეს შრომის ბაზრის თავისუფლება;
2. სამუშაო ადგილებს ქმნის ბიზნესი. ამიტომ დაცულობისა და სტაბილურობის განცდა კერძო სექტორში მნიშვნელოვანია დასაქმების ხელშეწყობისთვის. შესაბამისად, უნდა გამოცხადდეს 2-წლიანი მორატორიუმი ისეთ საკანონმდებლო ცვლილებებზე, რომლებიც გავლენას ახდენენ ქვეყნის ფინანსურ–ეკონომიკურ გარემოზე; საკანონმდებლო ორგანომ მიიღოს კანონი ფინანსურ–ეკონომიკური ხასიათის დანაშაულის ამნისტიისა და დაფარული გადასახადების ლეგალიზაციის შესახებ, რომელიც ჩადენილია 2013 წლის 1 იანვრამდე; მოხდეს ფინანსურ–ეკონომიკური ხასიათის დანაშაულის დეკრიმინალიზაცია; აიკრძალოს სასამართლოს ნებართვის გარეშე კერძო მფლობელობაში არსებული კომპანიების შემოწმება სახელმწიფო მაკონტროლებელი ორგანოების მიერ;
3. დასაქმების ზრდა შეუძლებელია უცხოური ინვესტიციების მოზიდვის გარეშე. ამისათვის კი აუცილებელია უზრუნველყოფილ იქნას ქვეყნის მაკროეკონომიკური პარამეტრების შენარჩუნება, ხოლო, შესაძლებლობის შემთხვევაში, გაუმჯობესება, რათა მოხდეს მთავრობის სუვერენულ რეიტინგებში საქართველოს პოზიციების გაუმჯობესება;
4. ახალი საექსპორტო ბაზრების გახსნა მკვეთრ სტიმულს მისცემს სამუშაო ადგილების შექმნის პროცესს. ამიტომ, უნდა დაჩქარდეს ღრმა და ყოვლისმომცველი თავისუფალი სავაჭრო შეთანხმების გაფორმება ევროკავშირთან და თავისუფალი სავაჭრო შეთანხმების მოლაპარაკებები აშშ-სთან”, – ნათქვამია “ნაციონალური მოძრაობის” დასაქმების კონცეფციაში“.
ამ კონცეფციით საქართველოს ხელისუფლებას მიმართავს და მიიჩნევს, რომ ქვეყანაში შექმნილი არასახარბიელო ეკონომიკური მდგომარეობის გამოსწორებისა და დასაქმების ხელშეწყობის მიზნით აუცილებელია მთავრობამ ისინი გაითვალისწინოს.
“გურია ნიუსი“ დაინტერესდა, რას ფიქრობს საზოგადოება ამ კონცეფციის შესახებ. ჩვენ თბილისის საკრებულოს ფრაქცია “ქართული ოცნება-დემოკრატიული საქართველოს“ თავმჯდომარეს ზაზა გაბუნიას ესაუბრა.
_ რას ფიქრობთ დასაქმების იმ ახალ კონცეფციაზე, რომელიც “ნაციონალურმა მოძრაობამ“ მთავრობას შესთავაზა?
_ ეს ირონიაა მათი მხრიდან. თითოეული ჩამოთვლილი პუნქტის სისრულეში მოსაყვანად, პრაქტიკაში განსახორციელებლად 9 წელი რომელიც მათ გაფლანგეს, საკმარისი დრო იყო. ამიტომ ახლა მათგან იმაზე საუბარი, რომ ეს არის ეკონომიკური განვითარების გეგმა, ძალიან არასერიოზულია.
_ მეორე პუნქტში ბიზნესის სტაბილურობასა და დაცულობაზეა ლაპარაკი, როგორ ფიქრობთ, “ნაციონალური მოძრაობის“ მართველობის დროს რამდენად იყო დაცული ბიზნესი და რამდენად იყო სტაბილურობა შენარჩუნებული?
_ განსაკუთრებით ეს პუნქტია ავტორებისგან ირონიული. კლასიკური გაგებით ბიზნესი მათი მმართველობის დროს არ არსებობდა. ეს იყო სახელისუფლებო პარტიასთან შეზრდილ საქმოსანთა ჯგუფები იშვიათი გამონაკლისის გარეშე და შესაბამისად რაც არ არსებობდა მის სტაბილურობაზე საუბარი შეუძლებელია.
_ და ბოლოს, რა იყო ჩადებული ამ კონცეფციაში? მთავრობას ისედაც აქვს დასაქმების გეგმა წარმოდგენილი და როგორც საზოგადოების დიდი ნაწილი ამბობს, ახალი ამ 4-პუნქტიან გეგმაში ვერაფერი წაიკითხეს.
_ “ნაციონალური მოძრაობა“ ცდილობს აჩვენოს რომ არსებობს და რომ მთავარი ოპონენტია ხელისუფლების, ამას ემსახურება ეს პუნქტებიც, ამას ემსახურებოდა 19 აპრილის აქციაც, სარეიტინგო კენჭისყრა პარლამენტში და სხვა ღონისძიებები, ანუ ამ ქმედებებით ის უბრალოდ პოზიციონირებას ახდენს.
