_ პირველ რიგში, ქალაქის სასაფლაოები და რა თქმა უნდა, გარეუბნის სასაფლაოები უნდა მოწესრიგდეს. უნდა მოხდეს მათი სამართლებრივად დარეგისტრირება, სასაფლაოები იქნება მუდმივად მოვლილი. გადასახდელი იქნება სიმბოლური თანხა, წელიწადში დაახლოებით, 15 -დან 18 ლარამდე. მე ვფიქრობ, რომ ოზურგეთის მუნიციპალიტეტის მცხოვრებლებისთვის და ასევე ჩამოსული სტუმრებისთვის, ახლა სააღდგომოდ რომ ჩამოვლენ თავიანთი წინაპრების საფლავზე, ყველაფერი მოწესრიგებული იყოს. ჩვენ პირველი გაწმენდითი სამუშაო ჩატარებული გვაქვს. მოხდება აღრიცხვა, დაიდგმება ჯიხურები, სადაც იქნებიან სასაფლაოს ზედამხედველები. ისინი უშუალოდ იქნებიან კონტაქტში მოსახლეობასთან.სასაფლაოს მოვლა პატრონობა დაკისრებული აქვს ოზურგეთის სერვისცენტრს, _ აცხადებს “გურია ნიუსთან” კოტე შარაშენიძე.
ამ საკითხთან დაკავშირებით ბევრი იმსჯელეს 24 აპრილს ოზურგეთის მუნიციპალიტეტის საკრებულოს ბიუროზე დეპუტატებმა, საკრებულოს თავმჯდომარემ ალეკო მამეშვილმა, მუნიციპალიტეტის გამგებელმა კოტე შარაშენიძემ და ოზურგეთის სერვისცენტრის ხელმღვანელმა ვლადიმერ სალუქვაძემ. დეპუტატების ერთი ნაწილის განცხადებით, ნებაყოფლობითი გადახდა ქაოსს გამოიწვევს, ხოლო ცენტრის ხელმძღვანელის თქმით, აუცილებელი სავალდებულო გადასახადის დაწესება სასაფლაოების მოვლა-პატრონობასა და დასუფთავებას სისტემატიურად მოწესრიგებულს გახდის.
მოსახლეობის აზრით, ეს ძალიან კარგია, ხოლო ზოგის განცხადებით, თავიანთი ახლობლის საფლავის მოვლა-პატრონობა თავად ურჩევნიათ.
ოზურგეთის მუნიციპალიტეტის საკრებულის თავმჯდომარე ალეკო მამეშვილი “გურია ნიუსთან” აღნიშნავს, რომ სასაფლაოს მოვლა-პატრონობისთვის თანხის დაწესება ნებაყოფლობითი იქნება და ეს სხვა სამუშაოებს ითვალისწინებს, რასაც როგორც თავად აღნიშნავს, მხარს უჭერს.
._ ბატონო ალეკო, ქალაქში რამდენი მაცხოვრებელია სულ?
_ დაახლოებით 5000.
_ რამდენი ათასი ლარით ფინანსდებოდა ბიუჯეტიდან დასუფთავებისა და კომუნალური მომსახურების ცენტრი და დღეს რამდენით ფინანსდება?
_ დასუფთავების სამსახურს ჰქონდა 710 000 ლარი, კომუნალურ მომსახურების ცენტრს კი 380 000 ლარი, სადაც შედის სასაფლაოს- მოვლა პატრონობა, დასუფთავება და სხვა.
_ აქამდე იყო ასე, ახლა შეიცვალა თუ არა დაფინანსება ?
_არ შეცვლილა, დაფინსება არის იგივე.
_ თუ ახლად შექმნილი სამსახურის ეს განყოფილება ფინანსდება იგივე თანხით, რაც აქამდე და მაშინ ხდებოდა სასაფლაოს დასუფთავება, ახლა რატომაა ფასიანი?
_ ეს არის შენატანი, რომელსაც სურვილის მიხედვით გადაიხდიან. აქ არ არის საუბარი, მხოლოდ დასუფთავებაზე, აქ არის ცვლილებები, ნახეთ დაიდგა სანაგვე ურნები, საუბარია იმაზე, რომ მოხდეს წყლის მონტაჟი და სველი წერტილი მოეწყოს, ეს პრიორიტეტი შარშან არ იყო. ახლა, ეს იგივე ბიუჯეტით ვერ გაკეთდება. დასუფთავებისთვის თანხას არავინ არავის ართმევს. ეს შემონატანი თანხა მოხმარდება სასაფლაოებზე სველი წერტილების მოწყობას, ნარჩენების გატანას, შემოღობვას, მაგრამ გააჩნია, თუკი ყველანი ავყვებით, ძალიან კარგი იქნება. ჩემი ახლობლები დასაფლავებულები არიან ორ სასაფლაოზე და მე დაინტერესებული ვარ, რომ რომ ის მიზერული თანხა შევიტანო საერთო ყულაბაში. ეს იქნება ნებაყოფლობით, ამაზე დღეს ჩვენ გადაწყვეტილება არ მიგვიღია. გავაცანით თქვენი საშუალებით მოსახლეობას, რომ აღდგომის დღეს უკვე მოსახლეობა ინფორმირებული იქნება და თავისი თვალითაც დაინახავენ, რომ სასაფლაოები მოწესრიგებულია. ვნახოთ, თუკი ასე გაკეთდება, ჩემი აზრით, ძალიან კარგი იქნება.
_ ბატონო ალეკო, იცით თუ არა მოსახლეობის აზრი ამასთან დაკავშირებით?
_ მოსახლე ვარ მე პირველ რიგში და მოსახლეები არიან ის ადამიანები, რომლებიც ამ საკითხზე მსჯელობდნენ. ჩვენ ჩავატარეთ საჯარო განხილვა, ვიცი, რომ ამ თემაზე მსჯელობენ სასულიერო პირები. თუ კი მოხდება მხარდაჭერა, კი ბატონო, მეც ჭირისუფალი ვარ და თქვენც, ასევე ბევრი ჩემი მეგობარი, რომელთანაც ამ თემაზე ამ ბოლოს მე საუბარი მქონია.
_ როგორ მოხდება თანხის ამოღება და გადახდა?
_ თანხის გადახდა მოხდება საბანკო გადარიცხვით, რომელიც ჩაირიცხება სერვისცენტრის ანგარიშზე. ჩვენ ამ ადამიანებს ანაზღაურებას ვაძლევთ და კიდეც მივცემთ, მაგრამ იქ, რაღაც დამატებითი სამუშაოებისთვის გახდა აუცილებელი. ჩვენ ვფიქრობთ, რომ სადღაც 18 ლარი გადავახდევინოთ. ეს არის ინიციატივა, რომელსაც დავუჭერთ მხარს. ჯერ მხოლოდ ქალაქში იქნება და მერე ვნახოთ, სოფელშიც განვახორციელებთ. დაწყებულია უკვე სამუშაოები, რათა რეგისტრაცია მოხდეს ამ სასაფლაოების.
