სასამართლომ ადვოკატის შუამდგომლობა დევნის შეწყვეტის თაობაზე არ სცნო. ჩალაგაშვილს გამოძიება სამსახურეობრივი უფლებამოსილების გადამეტებას ედავება. ბრალდებული სასამართლოს უნდობლობას უცხადებს და აღნიშნავს, რომ მოსამართლე პროკურორის ზეწოლის ქვეშ იყო. ბრალეულობის ერთადერთი დამადასტურებელი მტკიცებულება ფარული ჩანაწერებია, რომელიც ჩალაგაშვილის განცხადებით ყალბი იყო. სასამართლომ აღნიშნული გარემოება არ გაითვალისწინა და საქმის არსებითი განხილვა 13 მაისისთვის ჩაინიშნა.
დასავლეთ საქართველოს საოლქო პროკურატურის პროკურორი დავით სიმონია სასამართლოზე ზეწოლის ფაქტებს გამორიცხავს და აცხადებს რომ, ბრალდების მხარეს ყველა მტკიცებულება აქვს, საქმის არსებითი განხილვის დასაწყებად
“ის აცხადებდა რომ უდანაშაულოა, ითხოვდა დევნის შეწყვეტას, ბრალდების ყველა მტკიცებულების და მასალის დაუშვებლად ცნობას. პროკურატურის მოთხოვნა იყო, რომ აღნიშნულ საქმეზე, უკვე მოპოვებული ფაქტების თანახმად, საქმის არსებითი განხილვა ჩანიშნულიყო. სასამართლომ მიიჩნია, რომ ეს მტკიცებულებები საკმარისია იმისთვის, რათა საქმის არსებითი განხილვა მოხდეს. იმედი მაქვს, მტკიცებულებების განხილვის შემდეგ, სასამართლო გამამტყუნებელ განაჩენს გამოიტანს,“_ აღნიშნა დასავლეთ საქართველოს საოლქო პროკურატურის პროკურორმა დავით სომონიამ “გურია ნიუსთან” საუბრისას.
გამოძიება სისხლის სამართლის კოდექსის 333-ე მუხლის პირველი ნაწილის მიხედვით მიმდინარეობს და ბრალის დამტკიცების შემთხვევაში, 3 წლით თავისუფლების აღკვეთას ითვალისწინებს.
საქმე ეხება 2013 წლის 12 იანვარს მომხდარ შემთხვევას, გურამ ჩალაგაშვილი ქუთაისში, რესტორან “ამირანში” იმყოფებოდა არაფხიზელ მდგომარეობაში, რა დროსაც “ენერგო პრო ჯორჯიას” ადგილობრივ ხელმძღვანელს დაუკავშირდა და შუქის გამორთვა მოსთხოვა. მისივე განმარტებით მოსახლეობაში მოკლე ჩართვის მოსალოდნელი საფრთხე არსებობდა და ამის გამო თხოვა “ენერგო პრო ჯორჯიას” ხელმძღვანელს ელექტროენერგიის გამორთვა. გამოძიების ცნობით, შუქი გაითიშა არა მხოლოდ რესტორანში, არამედ მიმდებარე საცხოვრებელ სახლებსა და სხვა ობიექტებში, რის გამოც შუქის მიწოდება 200-მდე ოჯახს შეუწყდა.
