“აღდგომის ბრწყინვალე დღესასაწაულზე ინტელიგენცია ცუდ დღეში აღმოვჩნდით. ჩვენ წინასწარ გავაფრთხილეთ ყველა, რომ ვაპირებდით გაფიცვას, რაც ყველა მოქალაქის კონსტიტუციური უფლებაა, მაგრამ ზურაბ უტიაშვილმა შემოგვითვალა, თუ გაიფიცებით მიეცემით სისხლის სამართლის პასუხისგებაშიო. ეს შემოთვალა “ალფას” წარმომადგენელმაც.
ჩვენ ძალიან კარგად ვაცნობიერებთ იმას, რომ პასუხისმგებელნი ვართ პაციენტების წინაშე. მაინც არ ვაპირებდით ყველა გაფიცვას, გავიდოდით ნაწილი, ხოლო პარალელურ რეჟიმში აქ იმუშავებდა ბრიგადა, რომლებიც შეძლებდნენ პაციენტების მიღებას და გადაყვანას სხვა სტაციონარში. გუშინ ასევე მივიღეთ ინფორმაცია, რომ ამ ორ დღეში მოხდებოდა 2 თვის დავალიანების დაფარვა. ჩვენ არ ვაპირებთ მუშაობის შეწყვეტას. მაგრამ თუ არ მოხდება დაპირებული ხელფასების მთლიანად დარიცხვა, ვიბრძოლებთ ბოლომდე, რათა სამართლებრივი გზით მივაღწიოთ შედეგს,” _ აცხადებენ ლანჩხუთის მუნიციპალიტეტის “ადითის” მედპერსონალის წარმომადგენლები.
ზურაბ უტიაშვილი “გურია ნიუსთან” საუბრისას ადასტურებს, რომ მან მართლაც ურჩია მედიკოსებს, მსგავსი რამ არ ჩაედინათ. გადაუდებელი დახმარების შემთხვევაში, თუ მათი გაფიცვის გამო პაციენტს რამე დაემართებოდა, ეს რა თქმა უნდა, გამოიწვევდა პასუხისგებას, ოღონდ ეს შეეხება მხოლოდ გადაუდებელი დახმარების სამსახურს.
“შრომის კოდექსში პირდაპირ წერია, რომ გაფიცვა, რომლის გამო ადამიანის ჯანმრთელობას შეიძლება საფრთხე შეექმნას, არის უკანონო. სხვანაირად რა შემიძლია ვუპასუხო. არ შეიძლება პაციენტის სიცოცხლე დააყენო საფრთხის ქვეშ გადაუდებელი სამსახურის მორიგე ექიმმა. მათ შეუძლიათ წინასწარ გააფრთხილონ კომპანია, კომპანია ვალდებულია, მოძებნოს სხვა პიროვნება, რომელიც იმუშავებს იმ დღის ვადაში მის მაგივრად. თუ გვინდა სამართლიან სახელმწიფოში ცხოვრება, უნდა მივყვეთ ყველაფერს სამართლიანად. წერილს რომ დაწერენ ეს გაფრთხილება ჰგონიათ, ამას ყველაფრს აქვს თავისი წესი. აი, ჩოხატაურმა გამოიკეტა კარი და წავიდა, არც გადაუდებელია და არც სხვა ვინმე. იქ გავაგზავნეთ ექიმები, რომლებიც მიიღებენ პაციენტებს, რა უნდა ვქნათ, ხომ არ დავტოვებთ პაციენტებს უყურადღებოდ? ჩოხატაურში სისხლდენით ან ავარიის შედეგდ ადამიანი რომ მივიდეს, ექიმი არ არის ადგილზე, რომ დახმარება აღმოუჩინოს. სამი ბრიგადა გავაგზავნე, პაციენტს სიცოცხლე რომ დავიცვათ” _ ამბობს საგანგებო სიტუაციების კოორდინაციული დეპარტამენტის უფროსი, ზურაბ უტიაშვილი.
“ადითის” სამედიცინო დირექტორმა, კოკა ფრუიძემ გვითხრა, რომ ისინი იყვნენ გაფიცვასთან დაკავშირებით საქმის კურსში, გეგმიურ ექიმებს გაფიცვა არ ეკრძალებოდათ, რაც შეეხება გადაუდებელი დახმარების ექიმებს, მათ კანონში უწერიათ, რომ გაფიცვის უფლება არ ჰქონდათ” _ გვითხრა კოკა ფრუიძემ.
როდის დაკმაყოფილდება მედიკოსების სახელფასო დავალიანება, ჯერ კიდევ გაურკვეველია.
