ანგარიშის წარდგენას ესწრებოდნენ გამგეობის აპარატის თანამშრომლები და საკრებულოს კომისიის ხელმძღვანელები.
ანგარიში შეეხებოდა თვითმმართველობაში მიმდინარე პოლიტიკურ პროცესებს, საკადრო ცვლილებებს, საპროტესტო აქციებსა და თვითმმართველობის მოხელეთა მიმართ გახორციელებულ დევნას.
ორგანიზაციის მიერ მოპოვებული ინფორმაციით, 2012 წლის 1 ოქტომბრის არჩევნების შემდეგ დღემდე, საქართველოს მასშტაბით თანამდებობა დატოვა 50 გამგებელმა, მათგან 48-მ პირადი განცხადების საფუძველზე, ხოლო ორმა _ საკრებულოს გადაწყვეტილებით; თანამდებობა დატოვა, აგრეთვე, 26-მა საკრებულოს თავმჯდომარემ _ 22-მა _ საკუთარი გადაწყვეტილებით, ხოლო 4-მა საკრებულოს გადაწყვეტილებით.
გამგებლის შესარჩევად კონკურსი მხოლოდ 15 მუნიციპალიტეტსი გამოცხადდა.
2012 წლის 1 ოქტომბრიდან 2013 წლის 28 თებერვლამდე, 54 მუნიციპალიტეტის საკრებულოში შეიქმნა ახალი ფრაქციები, რამაც რიგ სიტუაციაში ძალთა ბალანსის შეცვლა და ახალი უმრავლესობის შექმნა გამოიწვია.
“სამართლიანმა არჩევნებმა” საპარლამენტო არჩევნების შემდგომ ადგილობრივ თვითმმართველობაში მიმდინარე საშტატო ცვლილებებიც შეისწავლა. მოპოვებული საჯარო ინფორმაციის მიხედვით, რომელიც ორგანიზაციამ საქართველოს ყველა მუნიციპალიტეტიდან გამოითხოვა, 2012 წლის 1 ოქტომბრიდან 2013 წლის 28 თებერვლამდე გათავისუფლდა 1 877 თანამშრომელი, 69 მუნიციპალიტეტიდან საკადრო ცვლილება 55 გამგეობასა და 26 საკრებულოში განხორციელდა, 34 მუნიციპალიტეტში დაითხოვეს 425 რწმუნებული.
“სამართლიანი არჩევნების” განცხადებით, “18 მუნიციპალიტეტში თანამშრომელთა აყვანა პარტიული ნიშნით გამოიკვეთა. ასევე გამოიკვეთა სამართლებრივი დევნის 11 შემთხვევა. მიუხედავად იმისა, რომ ბევრი რწმუნებული ზეწოლის შედეგად გაათავისუფლეს, საჯაროდ ამას არ აღიარებენ, თუმცა, პირად საუბრებში ამას ადასტურებენ.”
“რაც შეეხება ლანჩხუთს, აქ გამგებლის თანამდებობის დასაკავებლად გამოცხადებულ კონკურსში 106 განცხადება დარეგისტრირდა, საკონკურსო საატესტაციო კომისიის წევრებმა აქედან 5 კანდიდატი შეარჩიეს, 8 იანვარს “ქართული ოცნების” მხარდამჭერთა ნაწილმა გამგეობის შენობის პიკეტირება მოახდინა და თანამშრომლები შენობაში არ შეუშვა _. მათ უნდობლობა გამოუცხადეს კომისიის წევრებს.
რაც შეეხება რწმუნებულების თემას ლანჩხუთში, პირადი განცხადების საფუძველზე 6-მა რწმუნებულმა დაწერა განცხადება, ტენდენცია, რომელიც სხვა რაიონებში იყო, აქაც გამოიკვეთა _ 4-მა რწმუნებულმა ერთსა და იმავე დღეს დაწერა განცხადება.
ორგანიზაცია საეჭვო გარეომოებად მიიჩნევს რწმუნებულების ერთსა და იმავე დღეს დაწერილ განცხადებებს,” _ ნათქვამია ანგარიშში.
“სამართლიანი არჩევნები” მუნიციპალიტეტში გამოვლენილ ტენდენციას უარყოფითად აფასებს და მიაჩნია, რომ გამოვლენილი პრაქტიკა ხელს არ უწყობს საჯარო სამსახურის პოლიტიკური გავლენისგან გათავისუფლებას.
