პროექტი არ დასრულებულა და წელსაც გრძელდება.
როგორც ჩვენთვის გახდა ცნობილი, აცანის მოსახლეობა უკმაყოფილებას გამოთქვამს იმის გამო, რომ გზის სიგანე ზოგ ადგილებში მხოლოდ 4, 50 მ უნდა იყოს. მოსახლეობამ უკვე მიმართა აღნიშნულ საკითხზე ლანჩხუთის მუნიციპალიტეტის გამგეობასა და საკრებულოს.
როგორც ამირან გიგინეიშვილმა და ზაზა ურუშაძემ ჩვენთან საუბარში აღნიშნეს, საკრებულოც და გამგეობაც აქტიურად ჩაერთო ამ საკითხის გადაწყვეტაში და რა შედეგს გამოიღებს მათი მცდელობა, სულ მალე გაირკვევა.
გთავაზობთ საკრებულოს თავმჯდომარის ამირან გიგინეიშვილის და გამგებლის მოვალეობის შემსრულებლის, ზაზა ურუშაძის კომენტარს:
ამირან გიგინეიშვილი: “ეს პროექტი დაიწყო 2012 წლის დასაწყისში და დააფინანსა მსოფლიო ბანკმა. ფონდის დახმარებით დაიწყო ამ გზის მცირე ტექნიკური პროექტის შედგენა. შემდეგ, პროექტის შესაბამისად, მოხდა თანხის ფონდირება მუნიციპალური განვითარების კუთხით. საქმე იმაშია, რომ ეს არის შიდა გზა და ასფალტის საფარის სიგანე არსად არ უნდა ყოფილიყო ექვს მეტრზე მეტი. მერე აღმოჩნდა, რომ ამ გზის რომელიღაც მონაკვეთი იყო დაჭაობებული და აუცილებლად გამოიწვევდა გზის ნგრევას. ამის გამო შეადგინეს ისეთი პროექტი, სადაც მოეწყო მილები და გაბიონები. ეს ხდებოდა გასულ წელს და ხელმოწერებიც აქ არის. დაიგო, ეგრეთწოდებული, ჯეოტექსტილის ფენა. თანხის ნაწილი _ 330 000 ლარი დაიხარჯა დაზიანებული მონაკვეთის რეაბილიტაციაში. ვინაიდან პროექტის გასახორციელებლად თანხა მსოფლიო ბანკმა გადმორიცხა, შესაბამისად, პროექტის ღირებულების გაზრდა შეუძლებელია. გასულ წელს, ტექნიკურ პროექტში შევიდა ცვლილება. წელს, როცა მე ამირჩიეს საკრებულოს თავმჯდომარედ, დამხვდა ხელმოსაწერი ფურცელი, სადაც ჩვენზე არის მხოლოდ და მხოლოდ თანადაფინანსების ვალდებულება _ მთელი პროექტის 15% უნდა გადაეხადა ლანჩხუთის მუნიციპალიტეტს. გასულ წელს ეს თანხა გადაიხადა ფინანსთა სამინისტრომ, წელს კი ეს პროექტი იყო ჰაერში ჩამოკიდული და მე ხელს არ ვაწერდი მანამ, სანამ ფინანსთა სამინისტროს არ ვთხოვე, რომ ისევ დაეფინანსებინა პროექტის 15%-ი. ეს 15% შეადგენდა 400 000 ლარს. ასეთი თანხის დადება ჩვენი ბიუჯეტისთვის იყო კატასტროფა. წელსაც გაჭრა თხოვნამ და მოხდა ამ თანხის ასახვა მუნიციპალიტეტის ფონდში, როგორც თანადამფინანსებლის. სწორედ მაშინ მოხდა ჩემი პირველად შეხება ამ საქმესთან. ამის შემდეგ განახლდა სამუშაოები და სოფლის მოსახლეობა გამოთქვამს პრეტენზიებს, თუ რატომ არ უმატებენ გზას სიგანეს. მე, ამ საკითხთან დაკავშირებით ჩავედი თბილისში, ინფრასტრუქტურისა და ეკონომიკური განვითარების მინისტრს შევხვდი მაჟორიტარ თემურ ჩხაიძესთან ერთად. ვიმსჯელეთ, როგორ უნდა მოვქცეულიყავით. ისიც ვთქვით, რომ მოდი განიერი გზა დავაგოთ და რაც დაგვრჩება გაუკეთებელი, სხვა გზებით დავამატოთ თანხა. ამ აზრს მეც და თემურ ჩხაიძეც ვეთანხმებოდით. მაგრამ მსოფლიო ბანკისთვის ეს არ ნიშნავს იმას, რომ სამუშაო დასრულებულია და არ ჩაიბარებდა პროექტს. პროექტის არჩაბარებით კი ორგანიზაციას ცუდ დღეში აგდებ _ მან შეიძლება გვიჩივლოს სასამართლოში და თუ ეს ჩვენი ინიციატივით მოხდა, მოგვიწევს ბიუჯეტიდან მათ სასარგებლოდ თანხის გადახდა. ახლა ასეთი სიტუაციაა _ მივყვებით ძველ პროექტს, სადაც წერია, რომ სიგანე 4, 50 მეტრი უნდა იყოს, მირაჟებზე 5 მეტრზე და ოდნავ მეტზე ადიან. სხვანაირად არ გამოდის. მოსახლეობა თუ გზას გადაკეტავს, ამით რას მივაღწევთ? ვერაფერს, გაჩერდება პროექტი და აღარ გვექნება ასფალტიანი გზა, რომელიც აცანა-ტელმანი-მამათის მიმართულებით კეთდება”.
როგორც ლანჩხუთის მუნიციპალიტეტის გამგებლის მოვალეობის შემსრულებელმა ზაზა ურუშაძემ გვითხრა ამ პრობლემის მოგვარების გზა თითქმის გამოიძებნა: “დადებითად გადაწყდა იმ გაგებით, რომ გაგვიჩნდა ვარიანტები, რომელსაც მოსახლეობასთან შეთანხმებით გადავწყვეტთ. პირველი ვარიანტი არის, რომ დაიგოს 6 მ-იანი სიგანის საფარი, მაგრამ 700 მეტრი სიგრძის გზა დააკლდება. მეორე ვარიანტია, რომ გავიდეს ბოლომდე , მაგრამ გზის სიგანე იქნება 5 მეტრი, მესამე ვარიანტია, სოფლის პროგრამებიდან მოვიძიოთ თანხა და შევავსოთ ის 700 მეტრიანი მონაკვეთი.
ამ საკითხს აუცილებლად აცანისა და მამათის მოსახლეობასთან ერთად გადავწყვეტთ და მალე ამ პრობლემას ბოლომდე მოვაგვარებთ. მოსახლეობასთან შეხვედრის შემდეგ გავაგზავნით წერილს დავით ნარმანიასთან და მივიღებთ საბოლოო გადაწყვეტილებას”.
მიუხედავად მოსახლეობის პროტესტისა, გზის დაგებითი სამუშაოები დღესაც გრძელდება. როგორც ადგილობრივები აცხადებენ, ჯერჯერობით მათი მხრიდან არანაირი საპროტესტო აქცია არ იგეგმება.
