ძველი თბილისის სამმართველოს მე–3 განყოფილების თანამშრომლებმა ღონღაძე იმავე დღეს დააკავეს და ბრალი
19–108 მუხლით (განზრახ მკვლელობის მცდელობა) წაუყენეს, რაც 7-დან 15 წლამდე პატიმრობას ითვალისწინებს.
“გურია ნიუსს“გვანცა ადამიას დეიდაშვილი თაკო შენგელაია ესაუბრა, რომელიც მიიჩნევს, რომ ეს არ იყო უბედური შემთხვევა: “თვითმხილველები ჰყვებიან, რომ ღონღაძემ ხელი დაავლო გვანცას და მოაჯირზე გადმოკიდა. დაახლოებით სამი წამის განმავლობაში ჰყავდა ჰაერში გაჩერებული სანამ ხელს გაუშვებდა. როდესაც გვანცა ძირს დაენარცხა, ღონღაძემ აიღო მისი ჩანთა და ზემოდან ესროლა უგონოდ მყოფ გოგონას, რომელიც მისი თქმით სიგიჟემდე უყვარდა. ეს იყო განდიდების მანიით შეპყრობილი ადამიანი, რომელმაც ვერ აიტანა ის, რომ გოგომ უარი უთხრა.“
მისივე თქმით, გვანცა ადამიამ და ლევან ღონღაძემ ერთმანეთი თსუ-ს იურიდიულ ფაკულტეტზე გაიცნეს. როგორც ირკვევა, ლევანს დიდი ხნის განმავლობაში უყვარდა თანაკურსელი, 1 წლის წინ კი სიყვარულში გამოუტყდა. ამის შემდეგ ის მუდმივად თან დასდევდა გვანცას, ესწრეოდა მის ლექციებს, აცილებდა სახლში, იცოდა მისი ყოველი ნაბიჯი..
“1 წლის განმავლობაში უკან დასდევდა ჯერ ფარულად, მერე უკვე აშკარად,საშველს არ აძლევდა, დაცვასავით სულ თან დაჰყვებოდა. გვანცა ეუბნებოდა: არ მიყვარხარ და თუ გინდა ვიმეგობროთო. ბოლოს გვანცამ მეგობრობაზეც უარი უთხრა… პირდაპირ ეუბნებოდა, რომ თავი დაენებებინა. ალბათ იმ დღესაც მსგავსი დიალოგი ჰქონდათ, როგორც ჩანს, მას ნერვებმა უმტყუნა, აიყვანა ბავშვი და მესამე სართულიდან გადააგდო“.
როგორც თაკო შენგელაია “გურია ნიუსთან“ყვება, გვანცას და ლევანს 10 დღის წინ მორიგი კამათი მოუვიდათ.
“ლევანმა გვანცას დაურეკა და უთხრა „ფეისბუქზე“ რომ მოგწერე წერილი, რატომ არ მიპასუხეო, გვანცამ უპასუხა, არ ხარ ჩემი შეყვარებული და ნუ მაიძულებ ისე მოვიქცე, როგორც შენ გინდაო.
ლევანს უთქვამს: მე თუ შენგან დადებით პასუხს ვერ მივიღებ, … საერთოდ წავალ ამ ქვეყნიდანო… გვანცამ უპასუხა სამი კვირის შემდეგაც ამ აზრზე ვიქნებიო.“
მეორე დღეს გვანცამ ლექციებზე დედა გაიყოლა, რადგან ეშინოდა, რომ ამ საუბრის შემდეგ ლევანთან ჩხუბი ელოდა. გვანცას დედამ და ლევან ღონღაძემ ერთმანეთი გაიცნეს, ლევანმა მას პირდაპირ უთხრა, რომ გვანცა უყვარდა და თავის დანებებას არ აპირებდა.
“დეიდაჩემა უთხრა, შვილო, ნუ დასდევ გვანცას, არ უყვარხარ და თავს თუ დაანებებ, იქნებ გული მოულბეს და შეგიყვაროსო. რამდენი გოგოა ირგვლივ, გთხოვ, დაანებე ჩემს შვილს თავიო.
სახლში რომ დაბრუნდა, დეიდაჩემმა გვითხრა, ძალიან კულტურული და განათლებული ბიჭის შთაბეჭდილება დატოვა და არა მგონია, გვანცას რამე დაუშავოსო,“ _ ამბობს “გურია ნიუსთან“თაკო შენგელაია.
ექიმებს გვანცა ადამიას სრული რეაბილიტაციის იმედი აქვთ, თუმცა მისი მდგომერაობა ამ დრომდე მძიმეა. სიმაღლიდან ვარდნის შედეგად მას მენჯ-ბარძაყის მოტეხილობა, ღვიძლის და ფილტვის დაზიანებები აღენიშნებოდა.
როგორც „გურია ნიუსის“ წყარო ამბობს, საავადმყოფოში უკვე რამდენჯერმე მივიდა ლევან ღონღაძის დედა და ადამიებს მატერიალური დახმარება შესთავაზა, თუმცა გვანცას ოჯახმა მისი წინადადება არ მიიღო.
“გურია ნიუსი“ ეცდება დაუკავშირდეს ლევან ღონღაძის ოჯახსაც.
