ჩვენი გაზეთის წინა ნომერში ჩოხატაურის მუნიციპალიტეტის აიპ-ების თანამშრომელთა ხელფასების შესახებ გესაუბრეთ. ფაქტები ცხადყოფენ, რომ მუნიციპალიტეტის ბიუჯეტს არასამეწარმეო იურიდიული პირების თანამშრომლების ხელფასებით უზრუნველყოფა ნახევარ მილიონ ლარზე მეტი უჯდება. ნაკლები თანხა არც საკრებულო-გამგეობის თანამშრომელთა ხელფასებით უზრუნველყოფას სჭირდება.
მიმდინარე წლის ბიუჯეტი სულ 4 524 900 ლარს შეადგენს. აქედან, 816 500 ლარი სახელფასო თანხაა. რაც შეეხება აიპ-ების ბიუჯეტს, იგი 1 378 800 ლარით არის განსაზღვრული და აქედან 769 700 ათასი ლარი ხელფასებზე იხარჯება.
საკრებულოს თავმჯდომარის, ანტონ ხუნდაძის ანაზღაურება 2 360 ლარს შეადგეს; მისი მოადგილის, მიხო უნგიაძის _ 1 100 ლარს; მმართველი ფრაქციის თავმჯდომარის, ზაზა ბასილიას თვიური ანაზღაურება 650 ლარია; ამდენივეს იღებენ ფრაქცია “მაჟორიტარების” თავმჯდომარე თემურ ხუხუნაიშვილი და კომისიის თავმჯდომარეები; საკრებულოს აპარატის უფროსს მერაბ ხუნდაძეს 700 ლარი აქვს ხელფასი; სპეციალისტებიც ჰყავთ: ლალი თოდრია, ჟანა სიხარულიძე, მადლენა ჯანბერიძე, ედიშერ ჯიბუტი, მაკა ბოლქვაძე და მზია სიხარულიძე _ მათი ანაზღაურება 420-420 ლარს შეადგენს; საკრებულოში 4 ხელშეკრულებით აყვანილი პირი მუშაობს: ნოდარ თედორაძე მძღოლია და 500 ლარს იღებს, გივი ანთიძე და ნაზი ბერძენიშვილი სპეციალისტები არიან და 420 ლარს ღებულობენ, სპეციალისტია ლელა ნინიძეც, რომლის ანაზღაურება 400 ლარს შეადგენს.
მუნიციპალიტეტის გამგებლის, გია გიორგაძის ხელფასი საკრებულოს თავმჯდომარის ხელფასის იდენტური _ 2 360 ლარია. მოადგილის, დიმიტრი კორიფაძის _ 900 ლარი.
საქმის წარმოების და საორგანიზაციო საკითხთა სამსახურის უფროსის, დავით ჯინჭარაძის თვიური ანაზღაურება 700 ლარია; მთავარი სპეციალისტი იურიდიულ საკითხებში ნინო ვაჩეიშვილია და 420 ლარს იღებს; ლუდმილა მეგრელიშვილი სპეციალისტია საქმის წარმოების საკითხებში და მისი ხელფასი 420 ლარია; სპეციალისტები არიან მანანა კალანდაძე და ვასილ ბერუჩაშვილი _ 420-ლარიანი ანაზღაურებით; მძღოლს, თემურ ლორიას 546 ლარი ეწერება; ხელშეკრულებით ორი ადამიანი ჰყავთ აყვანილი: ნუგზარ მგელაძე და ლია ხუნდაძე _ მგელაძის ანაზღაურება 400 ლარია, ხუნდაძის _ 420.
ზედამხედველობის სამსახურს ზაალ ბერძენიშვილი ხელმძღვანელობს 700 ლარიანი ანაზღაურებით; სპეციალისტებს _ ტარიელ ბერაძეს და კახი მეფარიშვილს 420-420 ლარი აქვთ.
საფინანსო სამსახურის უფროსის ზურაბ ჩანტლაძის ანაზღაურება 700 ლარს შეადგენს; ბიუჯეტის დაგეგმვის და ანალიზის განყოფილების უფროსი, ჯემალ სიხარულიძე 500 ლარს იღებს; მთავარი ბუღალტერი, ზურაბ შათირიშვილი _ 500 ლარს; ზაზა ოსეფაიშვილი, შორენა კაჭარავა, მარინა ჟღენტი, ლუბა ჯანბერიძე და ნინო გიორგაძე სპეციალისტები არიან 420-ლარიანი ანაზღაურებით.
ეკონომიკისა და ინფრასტრუქტურის სამსახურის უფროსის, ლევან ჩხიკვაძის ხელფასი 700 ლარია: ამ სამსახურში 4 სპეციალისტია _ გოგი ბოლქვაძე, ალექსანდრე წიქარიძე, ნინო სიხარულიძე და თენგიზ ცენტერაძე _ 420-420-ლარიანი ხელფასებით.
შრომის, ჯანმრთელობის, სოციალური დაცვის, ლტოლვილთა და იძულებით გადაადგილებულ პირთა სამსახურს ივანე ცინცაძე ხელმძღვანელობს და 700 ლარს იღებს; ამ სამსახურის ორ სპეციალისტს _ თემურ ბენდელიანს და ლომგულ ტრაპაიძეს 420 ლარი აქვთ ხელფასი.
ასეთივე ხელფასებია კულტურის, განათლების, სპორტის, ძეგლთა დაცვის და ახალგაზრდულ საქმეთა, ტურიზმისა და კურორტების განვითარების სამსახურში, რომლის ხელმძღვანელი დოდო მამალაძეა, სპეციალისტები კი _ მაია ძნელაძე და მარინა ცინცაძე.
მუნიციპალური შესყიდვების სამსახურის უფროსი ვლადიმერ გოგიბერიძეა 700-ლარიანი ხელფასით, რომელსაც ერთი თანაშემწე ჰყავს _ ლალი თავაძე 420-ლარიანი ანაზღაურებით.
ქონების მართვის სამსახურს მალხაზ დოლიძე ხელმძღვანელობს _ მასაც 700 ლარი აქვს. სპეციალისტებს _ გიორგი სიმონიას და ლელა მდინარაძეს _ 420-420 ლარი.
განსხვავებული ხელფასებია გამგეობას დაქვემდებარებულ კიდევ ერთ სამსახურში _ სამხედრო აღრიცხვის, გაწვევისა და მობილიზაციის სამსახურის უფროსი ედიშერ სიხარულიძეა და მისი ხელფასი 700 ლარია; სპეციალისტების _ ვახტანგ მეფარიშვილის და კახი ყაჭეიშვილის ანაზღაურება კი 500 -500 ლარს შეადგენს; კობა ჯიბლაძეს, ნანა ჩხიკვაძეს, მარინა დეკანოზიშვილს, მაია ოსეფაიშვილს და ლელა სიხარულიძეს 420-420 ლარი აქვთ; აღნიშნულ სამსახურში ხელშეკრულებით აყვანილი ორ პირია _ შორენა მეგრელიშვილი და რუბენ ქორიძე _ 400-400 ლარი.
სახანძრო დაცვის სამსახურიც გამგეობის ქვემდებარეა, რომლის უფროსის დიმიტრი მეგრელიშვილის ხელფასი 700 ლარია; მთავარი სპეციალისტის, ავთანდილ ჯიქიას _ 400 ლარი; 200-200 ლარს იღებენ მზია მამალაძე და თენგიზ თავართქილაძე; მიხეილ ჟღერია მძღოლია და 300 ლარს იღებს; სახანძრო სამსახურს სამი ცვლის უფროსი ჰყავს _ ალექსი მეჩეხია, მერაბ ეძგვერაძე და იაგორ ასამბაძე 350-ლარიანი ანაზღაურებით; ჩოხატაურის მუნიციპალიტეტს 18 მეხანძრე ემსახურება და თითოეულის თვიური ანაზღაურება 300-300 ლარს შეადგენს.
რაც შეეხება სოფლის რწმუნებულებს, მათი ხელფასები სტანდარტულია და 400-400 ლარს შეადგენს; სპეციალისტების, ე.წ. მოადგილეების კი 220-220 ლარს.
მომავალი წლის ბიუჯეტში ამ კუთხით ცვლილებებია. ოღონდ არა სასიკეთო _ თითქმის განახევრებული ბიუჯეტის ნახევარი ხელფასებზეა გაწერილი. პროექტის თანახმად, 2011 წლის ბიუჯეტი 2 684 700 ლარია, აქედან ხელფასებზე 825 700 ლარი დაიხარჯება, როცა მიმდინარე წელს ეს თანხა 816 500 ლარს შეადგენდა. იზრდება სახელფასო ფონდი არასამეწარმეო იურიდიულ პირებშიც და იგი 821 900 ლარით არის განსაზღვრული (მიმდინარე წელს 769 700 ლარია). ეს ყველაფერი კი ადასტურებს, რომ ხელისუფლებას ქამარი არათუ მოეშვა, არამედ… სულ დაეკარგა.
