2010 წლის 29 დეკემბერს, ოზურგეთის მუნიციპალიტეტის საკრებულოს რიგგარეშე სხდომა ხალხმრავლობით გამოირჩეოდა _ მიუხედავად მოახლოებული საახალწლო სამზადისისა, საკრებულოს დარბაზში ტევა არ იყო. დღის წესრიგით გათვალისწინებული საკითხები პოზიციურ-ოპოზიციური “წაკბენების” ფონზე დაამტკიცეს _ მხიარული ნოტა იმაში გამოიხატა, რომ ავთანდილ მექვაბიშვილმა საკრებულოს ოპოზიციონერ წევრს, ლელა ნაცვალაძეს ოზურგეთულ საახალწლო ღონისძიებაში მონაწილეობა ბებიის როლში შესთავაზა, “ბებიას”კი ჯიუტად სურდა, გაეგო ამბავი საცხენოსნო კლუბ “მარულასა” და იქ მყოფი ცხენებისა, რომლებიც, ამ წელში შემცირებული ბიუჯეტის გამო, ჰაერზე კვებას შეძლებდნენ თუ შიმშილგამძლე ჯიშისანი არიან?!
ოზურგეთის მუნიციპალიტეტის საკრებულოს თავმჯდომარემ ალეკო მამეშვილმა შეკრებილ საზოგადოებას გააცნო დღის წესრიგით გათვალისწინებული საკითხები. რიგით პირველი იყო “2010 წლის ბიუჯეტის დამტკიცების შესახებ” დადგენილებაში ცვლილებების შეტანა, მეორე და უმთავრესი _ “ოზურგეთის მუნიციპალიტეტის 2011 წლის ბიუჯეტის დამტკიცების შესახებ” დადგენილება.
დღის წესრიგის პირველ საკითხზე ანუ რატომ მოხდა ცვლილება 2010 წლის ბიუჯეტში, ისაუბრა მუნიციპალიტეტის გამგებელმა გიორგი ტაკიძემ. მისი თქმით, ოზურგეთის მუნიციპალიტეტის 2010 წლის დამტკიცებულ ბიუჯეტში ცვლილებებისა და დამატებების შეტანა უმიზეზოდ არ მომხდარა. 27 900 ლარით გაიზარდა ბიუჯეტი. ამ შემოსავლებიდან უნდა დაფინანსდეს საცხენოსნო კლუბი “მარულა” (3 000 ლარით), დასუფთავების ღონისძიებები (15 000 ლარით), რაც საახალწლო ღონისძიებების შემდეგ დასუფთავებისა და დალაგების სამუშაოების გამო გახდა აუცილებელი. აგრეთვე, სხვადასხვა ხარჯები დასჭირდა საახალწლოდ კულტურის ცენტრს, შეჭირვებულ ოჯახთა ერთჯერად დახმარებებს, შენობის დაცვის სამსახურს, უფასო სასადილოში აღრიცხულ ბენეფიციარებს.
ლელა ნაცვალაძემ ცხენები, ადამიანებთან ერთად, შეიცოდა და მოითხოვა პასუხი კითხვაზე, თუ შარშანდელი ბიუჯეტის მიხედვით, ცხენების შენახვას ბიუჯეტში ცვლილება დასჭირდა, წელს ამ ცხოველებს ჰაერით ხომ არ გამოკვებავენ, ჭამა არ უნდათო?
გიორგი ტაკიძემ ნაცვალაძეს განუმარტა, რომ მათ ჰყავთ მაძიებელი ინვესტორი, რომელიც შეისყიდის შპს “მარულას” და შეინარჩუნებს საცხენოსნო სპორტს. რაც შეეხება გაჭირვებულებს, ნაცვალაძემ კატეგორიულად მოითხოვა, განემარტათ, რა კრიტერიუმებით არჩევენ მათ, რაზეც ტაკიძემაც მტკიცედ უპასუხა, გაჭირვებულთა შორის გაჭირვებულებს ვეძებთო.
ახალი წლის ღონისძიებების დროს სხვადასხვა სამსახურებისთვის გაწეული ხარჯების შესახებ ნაცვალაძემ ეჭვი გამოთქვა და მოითხოვა, განემარტათ, კულტურის სახლს 2 600 ლარი მოსაწვევებისთვის როგორ უნდა დაეხარჯა, რაზეც გიორგი ტაკიძემ შენიშნა, რომ ეს არის კარნავალის დროს გასათამაშებელი ლოტოტრონისთვის განკუთვნილი თანხა, რომლის დროს გათამაშდება პრიზი და საჩუქარს თამაშში მონაწილე გამარჯვებული მიიღებს. საკრებულოს თავმჯდომარის მოადგილემ ავთანდილ მექვაბიშვილმა ლელა ნაცვალაძეს, რომელიც ჯერ დედაც არ გამხდარა, ახალი წლის ღონისძიებაში ბებიის როლი შესთავაზა: ქალბატონო, ლელა, თქვენც შეგიძლიათ, მიიღოთ მონაწილეობა, კარგი ბებია ხართო, თან ცვლილებების დამტკიცებაზე კენჭისყრა ითხოვა, რაზეც დარბაზიდან დასტური მიიღო.
დღის წესრიგით გათვალისწინებულ მეორე და უმთავრეს საკითხზე, “ოზურგეთის მუნიციპალიტეტის 2011 წლის ბიუჯეტის დამტკიცების შესახებ”, ოზურგეთის მუნიციპალიტეტის საკრებულოს დადგენილების დამტკიცების თაობაზე, საკრებულოს თავმჯდომარემ ალეკო მამეშვილმა ისაუბრა. მისი თქმით, ის ამაყია იმის გამოც, რომ 2011 წლის ბიუჯეტის შედგენის პროცესი დროულად მოხდა: _ კომისიებმა და ფრაქციებმა ათდღიან ვადებში მოამზადეს დასკვნები, რაც შემდეგ დროულად გადაეცა გამგეობას, ადგილობრივი მასმედიის საშუალებით მოხდა ამ პროექტის საზოგადოებისთვის გაცნობა, შემდეგ კი ჩატარდა სამი საჯარო განხილვა, გურიის ტელევიზიით გადაიცა და საკრებულოს ვებგვერდზე დევს ინფორმაცია. იმდენად აქტიურად მიმდინარეობდა განხილვები(?!), რომ უკვე მესამე შეხვედრაზე აღარ იყო ვნებათაღელვა და ამით მე ვარ ამაყი, _ დასძინა მან.
აღსანიშნავია, რომ 2011 წლის ბიუჯეტში ნარკოლოგიური ცენტრის დახმარებისთვის თანხის გათვალისწინებას, ოზურგეთის საზოგადოება მოწონებით შეხვდა.
საბოლოოდ გიორგი ტაკიძემ კიდევ ერთხელ ისაუბრა 2011 წლის ბიუჯეტის პროექტზე, რომლის მიხედვით შემოსულობები განსაზღვრულია 7 855 900 ლარით, რაც გასული წლის ბიუჯეტთან შედარებით შემცირებულია. საკრებულოს იმდღევანდელ სხდომაზე ოპოზიციურ ჰანგზე მოსაუბრე ერთადერთმა ხმამ _ ლელა ნაცვალაძემ ამჯერადაც გააპროტესტა ბიუჯეტის ასეთი “ქამარშემოჭერილობა” და ხმა “იგი შეინახა სენაკსა თვისსა”, რაზეც ნაციონალურ უმრავლესობას სინანული არ დასტყობია.
საბოლოოდ, ბიუჯეტის პროექტს კენჭი უყარეს და სამჯერ განხილულ-გასწორებული, საბოლოოდ დაამტკიცეს.
არა ერთი სამსახურის ხელმძღვანელი, რომელიც წლის საბოლოო სხდომაზე სიტყვით გამოვიდა, ძირითადად, ხელისუფლების მისამართით სამადლობელით შემოიფარგლა, რა თქმა უნდა, ხელში ღვინიანი ყანწის გარეშე.
