ჯერ იყო და სკოლებში მანდატურები შევიდნენ; შემდეგ თბილისის საჯარო სკოლებში ვიდეოთვალი დაამონტაჟეს; მოიმატა ქუჩებში დამონტაჟებული ვიდეოკონტროლის აპარატების რაოდენობამ. ახლა ჯანდაცვის მინისტრი გვამცნობს, რომ, თურმე, აფთიაქების შენობის პერიმეტრზე, როგორც გარეთ, ისე შიგნით, სათვალთვალო კამერის დამონტაჟება სავალდებულო გახდება. ამ ღონისძიებების გატარების შემდეგ, საფუძვლიანი ხდება ოპოზიციის ბრალდება, რომ საქართველოში პოლიციური რეჟიმი დამკვიდრდა.
“გურია ნიუსი” დაინტერესდა, რას ფიქრობს მოსახლეობა ვიდეოკონტროლის და თვალთვალის შესახებ:
მიხეილი, 55 წლის: _ ვიდეოთვალის დამონტაჟება ძალიან ძვირი დაუჯდება აფთიაქებს და კერძო მეწარმეების. ჩემი აზრით, სულაც არ არის აუცილებელი აფთიაქის წინ დამონტაჟდეს ვიდეოთვალი. ზედმეტად ერევიან ადამიანების ცხოვრებაში, არის ფსიქოლოგიური მომენტიც _ უნდათ ან “აწყობთ”, რომ ადამიანები ჰყავდეთ თვალთვალის ქვეშ. ვიდეოთვალი უნდა იყოს გზაჯვარედინებზე, მაგისტრალებზე, ბანკებთან, მაგრამ მთელ ქალაქში ნამდვილად არ არის საჭირო.
ბადრი, 64 წლის: _ აფთიაქში ვიდეოთვალი რა საჭიროა, ვერ ვიგებ. იქნებ, რაღაც მინდა შევიძინო, ისეთი რამ, რისი გამოჩენაც არ მინდა _ არ დავაკონკრეტებ, რას. ამ დროს რატომ უნდა მითვალთვალოს კამერამ? ჩემი აზრით, უნდა დამონტაჟდეს იქ, სადაც საჭიროება მოითხოვს. უსიამოვნო შეგრძნებაა, როცა კამერით გითვალთვალებენ, რა შეიძინე ან საით წახვედი. თითქოს, მართული ხარ ადამიანი, ალბათ, ერთგვარი ზეწოლის ძლიერი იარაღია _ შიშის სინდრომს ბადებს, მოქმედებს ადამიანების ფსიქიკაზე.
ინგა, 48 წლის: _ სადაც არის საჭირო, იქ დაამონტაჟონ. არ არის სასიამოვნო, როცა იცი, რომ კამერით ფიქსირდება შენი გადაადგილება. ისეთი შეგრძნება ჩნდება, ვიღაცა გიყურებს. რაც ძალიან უსიამოვნოა. თითქოს პოლიციურ ქვეყანას ვაშენებთ.
კესო, 22 წლის: _ კარგია, რომ ვიდეოთვალი დამონტაჟდა ქალაქში. ღამით აღარ იქნება გაქურდვის ან დანაშაულის ჩადენის საშიშროება. ვფიქრობ, რომ არ უნდა იყოს ცუდი.
ნინო, 48 წლის: _ ნამდვილად კარგია ყველაფრისთვის. თუნდაც იმისთვის, რომ თავისუფლად გავიაროთ ქუჩაში და არ შეგვეშინდეს.
ნანა, 31 წლის: _ კარგია, იმიტომ, რომ თუ ვინმე რამეს მოიპარავს, დაფიქსირებული იქნება. ერთ-ერთი მკვლელობაც, მგონი, ვიდეოთვალით დაფიქსირებული კადრიდან გაიხსნა.
