გაყინული დეპუტატები, ახალი წევრი და კომპიუტერები თავმჯდომარეებისთვის

(გურია ნიუსი, ლანჩხუთი) _ ორშაბათს, ლანჩხუთის მუნიციპალიტეტის საკრებულოს მორიგი სესია გაიმართა, რომელიც, წესით, პარასკევს უნდა გამართულიყო, მაგრამ დიდთოვლობის გამო გადაიდო _ საკრებულოს მაჟორიტარი დეპუტატები სესიაზე ჩამოსვლას ვერ ახერხებდნენ.
პირველ საკითხად საკრებულოს ახალი წევრის უფლებამოსილების ცნობა განიხილეს. როგორც უკვე გაუწყეთ, საკრებულოს უმრავლესობის წევრმა, კახა ხელაძემ პირადი განცხადების საფუძველზე უფლებამოსილება შეიწყვიტა, მისი ადგილმონაცვლე კი მმართველი პარტიის სიაში მარინა გოგიჩაიშვილი აღმოჩნდა. საკრებულოს თავმჯდომარემ ქალბატონ მარინას წარმატებები უსურვა: _ ძალიან სასიამოვნოა, რომ ქალბატონი მარინა შეუდგა დეპუტატის უფლებამოსილების გახორციელებას. ის ყველასთვის ნაცნობი და ახლობელი ადამიანია. პირადად დიდი ხანია, ვიცნობ და მოხარული ვარ, რომ ის ჩვენსგვერდით იქნება, _ აღნიშნა ჩიტიძემ.
ამის შემდეგ ბიუჯეტში შესატანი ცვლილებები განიხილეს. საფინანსო სამსახურის უფროსმა, როლანდ ლაშხიამ იმ მიზეზებზე ისაუბრა, თუ რატომ გახდა აუცილებელი ცვლილებების შეტანა _ გასულ წელს ბიუჯეტში ნაშთი დარჩენილა და მისი ასახვა ახალ ბიუჯეტში ცვლილებების გარეშე ვერ მოხდებოდა.
განიხილეს მუნიციპალიტეტის 2011 წლის შესყიდვების გეგმაც. ამასთან დაკავშირებით საკრებულოს წევრს, ამირან გიგინეიშვილს შენიშვნა ჰქონდა: _ 40 ათასი ლარი რომ გიწერიათ პოლიციის მანქანის შეძენისთვის _ ეს თანხა საიდან არის?! ადგილობრივი ბიუჯეტიდან მოიტანეთ, თუ ტრანსფერი გახორციელდა და შემდეგ ჩვენი სახელით ვყიდულობთ? მას უპასუხეს, რომ ეს თანხა ჩვენს ბიუჯეტშია ასახული. არავის დაუკონკრეტებია, რომ ამით თვითმმართველობის კანონი ირღვევა.
ამის შემდეგ, 18 საკითხი უცებ განიხილეს. მომხსენებელმა, მუნიციპალიტეტის იურიდიული სამსახურის უფროსმა, შოთა ჩაგუნავამ ძირითადი მუხლები ჩაიკითხა. ეს საკითხები იმდენჯერ გვაქვს განხილული, ჯობია ერთად ვუყაროთ კენჭიო და ასეც გააკეთეს. არც მომხსენებელს მოუხდა ტრიბუნასთან დიდხანს ყოფნა და არც შეკრებილ ხალხს _ ცივ დარბაზში. უნდა აღინიშნოს, რომ სესია საკმაოდ ცივ დარბაზში გაიმართა, რის გამოც სესიის დასაწყისში საკრებულოს თავმჯდომარემ მოიბოდიშა, მომავალში ამ უხერხულობასაც გამოვასწორებთ და სითბოც იქნებაო. არ არის გამორიცხული, რომ ის გაზაფხულის მოსვლას გულისხმობდა.
სესიაზე ასევე გაირკვა, რომ მალე ქალაქის ცენტრში, ყოფილი სასტუმროს მიმდებარე ტერიტორიაზე პოლიციის ახალი შენობა გვექნება.
რევაზ ჩიტიძე: _ ქალაქის ცენტრში პოლიციის ახალი შენობის მშენებლობა აპრილის თვეში დაიწყება და ოქტომბერში ან ნოემბერში დასრულდება. ეს იქნება საკმაოდ ლამაზი არქიტექტურით გამორჩეული შენობა, რომელიც ქალაქის იერსახეს დაამშვენებს.
სესიაზე გადაწყდა, რომ შსს-ს მშენებლობისთვის საჭირო ფართს პირდაპირი წესით გადასცემენ.
ცვლილებები შევიდა ლანჩხუთის მუნიციპალიტეტის თვითმმართველი ერთეულის პროგრამების დამტკიცებაში. გასულ წლებში დახმარების თანხა პირდაპირ ირიცხებოდა საავადმყოფოს ანგარიშზე. იყო საუბრები, რომ ეს პროცედურა გარკვეულ სირთულეებთან გახლდათ დაკავშირებული. ხშირ შემთხვევაში, პაციენტებს, რომლებსაც მუნიციპალიტეტი ეხმარებოდა, სხვადასხვა სამედიცინო დაწესებულებებში უწევდათ მკურნალობის კურსის გავლა. ამიერიდან იმ ადამიანებს, რომლებსაც დაეხმარებიან და ეს შეეხება იმათ, ვისაც სოციალური სააგენტოს მიერ მინიჭებული აქვს 70 ათასიდან 100 ათას ქულამდე, პირად ანგარიშზე ჩაურიცხავენ თანხას (არაუმეტეს 500 ლარისა).
სესიაზე გაირკვა, რომ მალე  საკრებულოს ყველა კომისიისა და ფრაქციის თავმჯდომარეს კომპიუტერებს შეუძენენ. ასევე ითქვა ისიც, რომ საკრებულოს თუ გამგეობის თანამშრომლებს ერთიან ქსელში უნდა შეეძლოთ მუშაობა და ამ პრობლემის გადაწყვეტაც მოხდება. ამისთვის კი კონსულტაციების გავლა, როგორც სესიაზე ითქვა, ამირან გიგინეიშვილთან მოუწევთ.
სესიის დასასრულს ბოლო დღეებში ჩვენს მუნიციპალიტეტში შექმნილ მდგომარეობაზე ისაუბრეს.
ლანჩხუთის მუნიციპალიტეტის გამგებელი გიორგი გოგუაძე: _ ბოლო 5 დღეა, რაც სტიქიამ აქტიურად შემოგვიტია. თოვლის საფარმა ზოგიერთ სოფელში ნახევარ მეტრსაც გადააჭარბა. გუშინ იყო ძალიან ძლიერი წვიმა და ქარი. დღეისთვის არსებული მდგომარეობით, არც ერთი სოფელში არ შექმნილა გადაადგილების პრობლემა. ჩვენი ტექნიკით აქტიურად შევძელით სოფლებში არსებული თოვლის საფარის გაწმენდა. ცოტა რთული მდგომარეობა შეგვექმნა აცანაში _ იქ გზები აღმოჩნდა ცუდ დღეში. ასევე ცუდ დღეშია სოფელ აცანაში ერთი ოჯახი _ჯიჯიეშვილების ეზოში მეწყერი ჩამოწვა, მაგრამ, საბედნიეროდ, არავინ დაშავებულა. სასწრაფო სამედიცინო დახმარების მანქანებს სოფლებში ასვლის პრობლემა არ ჰქონიათ. ძირითადი პრობლემა, რაც ბოლო დღეებში შეიქმნა, არის ელექტროენერგიის მოწოდება _ სოფელ წყალწმინდაში გაითიშა 110 კილოვატიანი მაღალი ძაბვის ხაზი. ქალაქის ტერიტორიაზე შუქი არ უნდა გათიშულიყო, რადგან აქ ინდივიდუალური გამრიცხველიანება დასრულებულია, ხაზები და ბოძებიც შეცვლილია. მიზეზი ის იყო, რომ ქალაქში არსებული ტრანფორმატორები წყობიდან გამოვიდა. ისინი მოძველებულია და მათი შეცვლა უნდა მომხდარიყო. რაც შეეხება სოფლებს, აქ თითქმის ყველგან მოხდა ძველი ხაზების მწყობრიდან გამოსვლა. სარემონტო სამუშაოები ამ წუთებშიც გრძელდება. ჩვენი ტექნიკით დავეხმარეთ ენერგოკომპანიას, სამწუხაროდ, სრული ქაოსი იყო ენერგოსექტორში, _ თქვა გამგებელმა.