(გურია ნიუსი, ლანჩხუთი) _ ბოლო დროს ლანჩხუთელები სულ უფრო აპროტესტებენ იმ ფაქტს, რომ ქალაქის ცენტრში, ავტობუსის მოლოდინში, მათ ელემენტარული პირობები არ აქვთ და ყურყუტი, წვიმაშიც კი, ღია ცის ქვეშ უწევთ. აღნიშნულთან დაკავშირებით თავისი მოსაზრება აქვს ავტოსალაროს ხელმძღვანელ ჯუმბერ რამიშვილს:
_ წიგნი მაქვს, სადაც წერია, თუ რა მოთხოვნები უნდა დავაკმაყოფილოთ. ლანჩხუთში ავტოსადგური არ არსებობს. ჩვენ გვაქვს ავტოსალარო. კარგია, რომ ავტოსადგური იყოს, მაგრამ ამას ბევრი რამ სჭირდება. მეც მინდა რომ იყოს, მაგრამ ამის გასაკეთებელი ფული სად არის? თავი ძლივს გაგვაქვს.
_ თქვენ ეთანხმებით იმ აზრს, რომ ლანჩხუთში ნორმალური ავტოსადგური არ არსებობს?!
_ არ არის და საიდან იარსებებს? ჩვენ მხოლოდ სალარო გვაქვს. რაც კანონით გვევალება, იმას ვასრულებთ. გვაქვს მოსაცდელი, სადაც მგზავრებს შეუძლიათ დაელოდონ ავტობუსს. ამბობენ, რომ წვიმაში გვიწევს ლოდინიო. მოსაცდელში ხალხი არ ჩერდება და რა ვქნათ?! ჩვენი ავტობუსები და “მარშრუტკები” გაჩერებაზე გასვლამდე 15 წუთით ადრე დგებიან. მანამდე ჩვენთან რატომ არ ჩერდება ეს ხალხი?! ასე იმიტომ არის, რომ ურჩევნიათ, რაიმე გამვლელ ტრანსპორტს გაჰყვნენ.
_ ბევრი უკმაყოფილოა იმითაც, რომ 16 საათის შემდეგ ავტობუსები აღარ მოძრაობენ.
_ ამაში ხალხს ნამდვილად ვეთანხმები. საქმე იმაშია, რომ ბოლო რეისი _ სუფსა-ურეკი 17:30 გადის, ჯაპანისკენ კი 16:30-ზე. პირობას გაძლევთ, რომ ეს გამოსწორდება. ჩვენ დავავალებთ ავტობუსის მძღოლებს, საღამოს რეისებიც შეასრულონ. კიდევ ერთი საკითხი უნდა აღვნიშნო _ გვეუბნებიან, რკინიგზის სადგურთან გადადითო. დღესვე გადავალთ, მაგრამ ეს არავითარ შედეგს არ მოგვცემს. იქ თუ მგზავრი არ ჩამოვიდა, რა ვქნათ?! ადრე ავტოსადგური შუხუთში იყო, ახლა ავდგებით და იქ გადავალთ.
_ არ გვგონია, ეს თქვენთვის უმჯობესი იყოს.
_ ეს კერძო საწარმოა და მოგება თუ არ ნახა, ისე მუშაობას აზრი ეკარგება. ჩვენც გვინდა, რომ ბარგის შემნახველი საკანი იყოს, ტუალეტი გვქონდეს, ცალკე ბავშვთა მოსაცდელი იყოს, მაგრამ ამას ჩვენი ძალებით ვერ გავაკეთებთ. გეთანხმებით, რომ ყველაფერი მოწესრიგებული უნდა იყოს, მაგრამ თავად მგზავრებმაც უნდა შეგვიწყონ ხელი _ როცა იცი, რომ შენი ავტობუსი 10 წუთში გავა, ე.წ. “ხიშნიკს” არ უნდა გაჰყვე. ჩვენმა ავტობუსებმა თუ არ იმუშავეს, გავჩერდებით. ჩვენ, სალაროში, გამოსაჩენ ადგილზე, გამოკრული გვაქვს ყველა რეისის განრიგი; 5 წლამდე ბავშვების მგზავრობა უფასოა; 5-დან 10-წლამდე კი 50%-იანი შეღავათია. დღეს ყველაფერი გაძვირდა. რა ქნან ამ მძღოლებმაც? ტრანსპორტი მოძველებულია და შეკეთება ხშირად სჭირდება.
_ ცოტა ხნის წინ ხომ ჩამოვიდა 2 ახალი ავტობუსი, ის თქვენს ბალანსზე არ არის?
_ ჩამოვიდა, მაგრამ რუსული წარმოებისაა. მასაც პრობლემები აქვს. ჩვენ ბალანსზე არც ერთი ტრანსპორტი არ არის. ჩვენ ხელშეკრულება გვაქვს “ავტოსთან” და ის გვემსახურება.
დავით გოგუაძე, ავტოსალაროს წარმომადგენელი: _ ის 2 ავტობუსი ჩვენს ბალანსზე არც არის. რაც შეეხება მომსახურებას, ვცდილობთ, ტრანსპორტი გამართულ მდგომარეობაში გვყავდეს. დღეს ავტობუსები მოძველებულია. კიდეც დაიწერა, “მუზეუმის ექსპონატებს” გვანანო. არც მთლად მასეა საქმე. დღეს ყოველდღიური შრომა გვიწევს იმისათვის, რომ მუნიციპალიტეტს ტრანსპორტი მოემსახუროს. ავტობუსები თუ “მარშრუტკები” კერძო საკუთრებაშია და მძღოლს ადვილად ვერ მოსთხოვ, იმუშავეო.
_ თქვენთან ტაქსებიც შემოდის?
_ არა. ადრე კი იყო, მაგრამ მას შემდეგ დიდი დრო გავიდა.
_ მოსახლეობის გულისტკივილი ჩვენი აზრით, მისაღები უნდა იყოს _ ხალხი რასაც ხედავს, იმას ამბობს.
_ გეთანხმებით, მაგრამ მხოლოდ ჩვენი დადანაშაულება არ შეიძლება. ჩვენც გვაქვს პრობლემები და ვცდილობთ, გავუმკლავდეთ.
