სამწვრთნელო საქმიანობას გამოცდილი სპეციალისტი სოსო ფილია დაუბრუნდა _ იგი ფოთის “კოლხეთს” ჩაუდგა სათავეში.
გამოცდილ სპეციალისტს ვითარების გამოსასწორებლად ჩემპიონატის მეოთხედზე ცოტათი მეტი აქვს მარაგში.
“გურია ნიუსი” სოსო ფილიას ესაუბრა:
_ ბატონო სოსო, უპირველესად გილოცავთ კლუბში დაბრუნებას. თუ არ მეშლება, უკვე მეოთხედ ჩაუდექით “კოლხეთს” სათავეში.
_ დიახ, ჩემი გამოთვლითაც ასეა (იცინის). მოლოცვისთვის დიდი მადლობა.
_ ურთულეს ვითარებაში ჩაიბარეთ გუნდი. რისი იმედი გაქვთ?
_ გეთანხმებით, ურთულესი ვითარებაა. სწორედ ასეთ დროს უნდა დაუდგე გუნდს გვერდში და ჩემი მხრიდან სხვანაირად არც იქნებოდა _ “კოლხეთის” წინაშე ვალდებულება მაქვს, ნებისმიერ დროს, როცა ჩემი თავი დასჭირდება, ვემსახურო. რა თქმა უნდა, წარმატების იმედი რომ არ მქონდეს, კლუბში არც მოვიდოდი.
_ ვისგან მიიღეთ შემოთავაზება?
_ სანამ გადაწყვეტილებას მივიღებდი, მანამდე მქონდა შეხვედრები ქალაქის ხელმძღვანელობასთან. თითქმის ყოველ საღამოს, სამუშაო საათების დასრულების შემდეგ, ქალაქის მერთან გოჩა ლემონჯავასთან ერთად საათობით ვისხედით და განვიხილავდით, როგორ უნდა გადაგვერჩინა “კოლხეთი” და არა მხოლოდ კლუბი _ ჩვენი გეგმები უფრო დიდია: მთლიანად ფოთში ფეხბურთის განვითარება! თავის ქებად ნუ ჩამითვლით და ადამიანების ამოცნობა კარგად მეხერხება _ ბატონი გოჩა ნამდვილად წუხს მთლიანად ქალაქის პრობლემებზე და მათ შორის ერთ-ერთი უპირველესია “კოლხეთის” მდგომარეობა. სწორედ ბატონმა მერმა მომცა რწმენა, რომ კლუბში დაბრუნება ღირდა!
_ ბატონო სოსო, კარგია, მერს რომ აწუხებს კლუბის პრობლემა, მაგრამ დღემდე ქალაქი ვერ ახერხებს კლუბის დაფინანსებას, ყოველ შემთხვევაში, სრულყოფილად მაინც. ვინ მოიტანს კლუბში ფულს?
_ შეიქმნება საბჭო, რომელშიც შევლენ ჩვენი მეგობრები, ბიზნესმენები, რომელთაც აწუხებთ კლუბის პრობლემები. ეს ადამიანები გვერდით დაგვიდგებიან. ამ დროისთვის 10 ასეთი ბიზნესმენი გვყავს და ვვარაუდობთ, რომ მათი რაოდენობა 15-მდე გაიზრდება. სწორედ ისინი უხელმძღვანელებენ “კოლხეთს”.
_ ვინ არის კლუბის ახალი პრეზიდენტი?
_ ჯერჯერობით, ეს საკითხი ღიაა, რადგან სწორედ ზემოთ ნახსენებმა საბჭომ უნდა აირჩიოს პრეზიდენტი. ალბათ, ორ-სამ დღეში ყველაფერი დალაგდება და პრეზიდენტიც გვეყოლება.
_ როგორც ვიცით, ცვლილებებია სამწვრთნელო შტაბში…
_ ჩემთან ერთად გუნდში მოვიდნენ ნუგზარ მიქაბერიძე და მამუკა მიქავა, რომელიც მეკარეებს გაწვრთნის. გუნდში რჩება და ჩემი ასისტენტი იქნება დათო მახარაძე. მოსაგვარებელი გვაქვს ექიმის და ადმინისტრატორის საკითხი. ამისთვისაც, მაქსიმუმ, სამი დღე დაგვჭირდება.
_ სადებიუტო შეხვედრა რთული გექნებათ _ მოქმედ ჩემპიონებს მასპინძლობთ!
_ რა თქმა უნდა, ურთულესი შეხვედრა იქნება. ფრეც არ იქნება, ალბათ, ურიგო შედეგი, თუმცა ჩვენ გამარჯვებისთვისაც ვიბრძოლებთ. ნურავინ ჩამოგვწერს _ “კოლხეთი” ყველაფერს გააკეთებს, რომ ღირსეულად იასპარეზოს და რაც მთავარია, ლიგაში ადგილი შეინარჩუნოს. ამისთვის ჩვენ არ ვაპირებთ არც ახალი ფეხბურთელების მოყვანას და არც არავის გუნდიდან გაშვებას.
_ შესაძლოა, არაკორექტულად და ამ დროისთვის არასაჭიროდ ჩამითვალოთ, მაგრამ მაინც უნდა გკითხოთ _ “კოლხეთმა” ლიგაში ადგილი რომ ვერ შეინარჩუნოს, თქვენი კლუბთან ურთიერთობა როგორ გაგრძელდება?
_ მე არ მოვსულვარ გუნდში სამი თვით და ეს არ არის მხოლოდ “კოლხეთზე” მორგებული პროექტი _ ვაპირებთ ფოთში ფეხბურთის განვითარებას, ბავშვთა ფეხბურთით დაწყებული და “კოლხეთით” დამთავრებული. რა თქმა უნდა, კლუბს აქ მთავარი ადგილი ეკუთვნის, მაგრამ თუ “კოლხეთი” ლიგაში ვერ დარჩა, ეს არ გახდება კარგი წამოწყების და დიდი პროექტის ჩაშლის საფუძველი! ჩვენ მუშაობა უნდა გავაგრძელოთ ნებისმიერი შედეგის დროს, თუმცა, ამ ეტაპზე მთავარი საზრუნავი ლიგაში დარჩენაა და ამისთვის მაქსიმუმი უნდა გავაკეთოთ.
