14 მარტს ოზურგეთის მუნიციპალიტეტის საკრებულოს სხდომა გაიმართა. სხდომაზე, დღის წესრიგის მიხედვით, ოთხი საკითხი განიხილეს. სხდომას 36 დეპუტატი ესწრებოდა.
პირველი საკითხი _ “ოზურგეთის მუნიციპალიტეტის 2011 წლის ბიუჯეტის დამტკიცების შესახებ” _ ოზურგეთის მუნიციპალიტეტის საკრებულოს 2010 წლის 29 დეკემბრის #49 დადგენილებაში ცვლილებებისა და დამატებების შეტანას შეეხებოდა. ასევე განიხილეს ოზურგეთის მუნიციპალიტეტის 2011 წლის დამტკიცებულ ბიუჯეტში შესატანი ცვლილება, რომელიც 2011 წლის 5 მარტს, 9 აპრილის ქუჩის #10-ში მდებარე შენობის დაწვას შეეხებოდა, სადაც მუნიციპალიტეტის კულტურის ცენტრი და მოსწავლე-ახალგაზრდობის სახლი ფუნქციონირებდა. ვინაიდან დამწვარი შენობის აღდგენა შეუძლებელი იყო, ორივე ორგანიზაციას ფუნქციონირების გასაგრძელებლად შენობა ესაჭიროება. მუნიციპალიტეტმა ამისთვის ოზურგეთში დოლიძის ქუჩის #10-ში მდებარე ყოფილი სამედიცინო სასწავლებლის შენობა გამოყო, რომელიც სახელმწიფო საკუთრებაა და გარემონტების შემდეგ, შესაძლებელი იქნება, ორივე ორგანიზაციამ ფუნქციონირება განაგრძოს. ამისთვის 2011 წლის დამტკიცებულ ბიუჯეტში გასატარებელია ცვლილებები. მუნიციპალიტეტის საკრებულომ და გამგეობამ მიზანშეწონილად მიიჩნიეს შემცირებულიყო ხარჯები. კონკრეტულად: საკრებულოს ხარჯები _ 2 000 ლარით ( მანქანის შეძენა _ 600 ლარი, ტრანსპორტის მოვლა-შენახვის ხარჯი _ 400 ლარი, სამივლინებო ხარჯი _ 1 000 ლარი); გამგეობის ხარჯები _ 3 000 ლარით (შენობის კაპიტალური რემონტი); სარეზერვო ფონდი _ 3 000 ლარით; მოსწავლე-ახალგაზრდობის სახლის ხარჯები _ 3 000 ლარით; კულტურის ცენტრის ხარჯები _ 12 000 ლარით; ამხანაგობების ხელშეწყობა _ 7 000 ლარით; სოც-კულტურული ღონისძიებების პროგრამული დაფინანსება _ 30 000 ლარით (სხვადასხვა ღონისძიებების ტექნიკური აღჭურვილობა, აპარატურა, განათება). სულ გამოთავისუფლდება 60 000 ლარი.
აღნიშნული თანხებიდან 55 500 ლარი გამოყენებული იქნება დოლიძის ქუჩა#10-ში მდებარე ყოფილი სამედიცინო სასწავლებლის შენობის კაპიტალური რემონტისათვის. 4 500 ლარი გამოიყოფა მუნიციპალიტეტის საკუთრებაში არსებული დაზიანებული სამასალე ხეების მოჭრისთვის.
სხდომაზე ოზურგეთის მუნიციპალიტეტის სოფელ ოზურგეთის მაჟორიტარმა დეპუტატმა გია ხუჭუამ საკრებულოს თავმჯდომარესა და მუნიციპალიტეტის გამგებელს მიმართა, რომ დიდი ხანია, რაც ითქვა სოფელ ოზურგეთის კოლმეურნეობის შენობის კულტურის ცენტრად გადაკეთების შესახებ: _ თუკი ამდენი თანხა უნდა დაიხარჯოს სამედიცინო სასწავლებლის გარემონტებაში, მაშინ გადავიდნენ სოფელ ოზურგეთში.
საკრებულოს თავმჯდომარის მოადგილემ ავთანდილ მექვაბიშვილმა თქვა, რომ მარტო მოსწავლე-ახალგაზრდობის სახლში 450 ბავშვია გაერთიანებული და ისინი ვერ შეძლებენ იქ სიარულს.
ოპოზიციონერი დეპუტატი, თემურ სალუქვაძე გია ხუჭუას ინიციატივას გამოეხმაურა: _ მოვიცადოთ, შევჯერდეთ და მივიღოთ კარგი პროდუქტი. თანხის ხარჯვა მაინც მიმდინარეობს და ნუ დავხარჯავთ ისე, რომ შედეგზე არ იყოს ორიენტირებული. კულტურის ცენტრს რეაბილიტაციისთვის ნორმალურად გამოეყოს ხარჯები და გაკეთდეს.
ოზურგეთის მუნიციპალიტეტის საკრებულოს თავმჯდომარემ ალეკო მამეშვილმა მხარი დაუჭირა გია ხუჭუას წინადადებას _ მან სურვილი გამოთქვა, თავად დაეთვალიერებინა სოფელ ოზურგეთის ყოფილი კოლმეურნეობის შენობა და ენახა, რა რესურსი იყო იქ ამისთვის.
ოპოზიციონერმა ლელა ნაცვალაძემ სხდომაზე მუნიციპალიტეტის საკრებულოს თავმჯდომარეს მიმართა: _ ბატონო ალეკო, ყველაფერი თქვენი დაუდევრობის ბრალია. თუ შენობა ამორტიზირებული იყო და დეკემბერში მას ცეცხლი კიდევ გაუჩნდა, რატომ არ მოხდა ამაზე რეაგირება? სად იყო დარაჯი, რომელიც მუნიციპალიტეტის ბიუჯეტიდან ხელფასს იღებს? რას გააკეთებთ იმისთვის, რომ აღნიშნული შემთხვევა დროულად იყოს გამოძიებული? ჩვენს სინამდვილეში არის ბევრი ასეთი ფაქტი _ ყოფილი სამმართველოს, ბაზრის, ცენტრალური უნივერმაღის დაწვის შემთხვევები და კულტურის სახლის კიდევ ერთი შემთხვევა. ეს შემთხვევები ბურუსითაა მოცული და ერთმანეთს ძალიან ჰგავს, დღემდე გამოუძიებელია და საზოგადოებაში ეჭვს ბადებს. საკრებულომ ყველა ღონე იღონოს და საზოგადოებას ეს ეჭვები გაუფანტოს, _ თქვა ნაცვალაძემ, თუმცა მისი ამ შენიშვნისთვის ყურადღება არავის მიუქცევია.
სხდომის მნიშვნელოვანი გადაწყვეტილება ერთ-ერთი ახალშექმნილი სამსახურის გაუქმება იყო _ დეპუტატებმა იმსჯელეს ოზურგეთის მუნიციპალიტეტის არასამეწარმეო (არაკომერციული) იურიდიული პირის _ “ურეკი-შეკვეთილის განვითარების ცენტრის” _ მიმართ ლიკვიდაციის პროცესის დაწყების თაობაზე და სალიკვიდაციო ღონისძიებების გატარების შესახებ, რაც დადებითად გადაწყდა კიდეც _ გაუქმდა აიპ “ურეკი-შეკვეთილის განვითარების ცენტრი”, რადგან ტურიზმის დეპარტამენტმა აიღო ვალდებულება და დაინტერესდა ამ კურორტებით.
_ ნეტავ, სხვა აიპ-ებსაც ხომ არ ემუქრება გაუქმება? მაგალითად, თუნდაც, “სოფლის განვითარების ცენტრს” ან “გომისმთას”? _ კითხულობს ლელა ნაცვალაძე და პასუხს ამაოდ მოელის.
