(გურია ნიუსი, ოზურგეთი) _ ცვლილება, რომელიც ორსულთა კონსულტაციების დაფინანსებას ეხება, ძალაში პირველ აპრილს შევიდა, თუმცა, ჯერჯერობით, მოსახლეობისთვის ამ საკითხის შესახებ არ არის ცნობილი და ბევრი ჩვენი გაზეთის საშუალებით გაიგებს: თუ 13 კვირის თავზე, ორსულები არ მიაშურებენ სამშობიარო სახლს და სოციალური მომსახურების სააგენტოს, მაშინ მათი ვიზიტები ექიმთან ფასიანი იქნება. ოზურგეთის სამშობიარო სახლის დირექტორი ამბობს, რომ ასეთი მიდგომა ბევრ გაურკვევლობას გამოიწვევს, სოციალური მომსახურეობის ოზურგეთის რაიონული განყოფილების უფროსის ოთარ რევიშვილის თქმით კი, “ყველაფერი იმისთვის კეთდება, რომ ამ კუთხით მდგომარეობა მოწესრიგდეს”.
როგორც “გურია ნიუსთან” საუბარში ოზურგეთის სამშობიარო სახლის დირექტორი დათო მდინარაძე ამბობს, აღრიცხვაზე მდგარი ყველა ორსულის ოთხ ვიზიტს სამშობიაროში სახელმწიფო აფინანსებდა, ანუ კონსულტაციები ცხრა თვის განმავლობაში იყო უფასო _ ეს იქნებოდა ექოსოსკოპია, ანალიზები და სხვა დახმარება: _ პირველი აპრილიდან შემოიღეს ვაუჩერული სისტემა, რაც ნიშნავს, რომ 13 კვირის ვადამდე, ჩვენ ორსულს ვაძლევთ ფორმა 100-ს, იგი, პირადობის მოწმობის ასლით მიდის სოციალური მომსახურების სააგენტოში და მათ აჰყავთ აღრიცხვაზე, შემდეგ აძლევენ ვაუჩერს. 13 კვირის და ერთი დღის შემდეგ რომ მოვიდეს ჩვენთან ორსული და დააგვიანოს რეგისტრაცია, მაშინ მათ კონსულტაციებს სახელმწიფო აღარ დაუფინანსებს. ასეთ შემთხვევაში, უსახსრობის გამო, ორსული კონსულტაციაზე აღარ მოვა, რაც გამოიწვევს ბევრ გართულებებს. ჩვენთან ორსული ქალბატონები 13 კვირის შემდეგაც მოდიოდნენ და ისინი მაინც ხვდებოდნენ სახელმწიფოს დაფინანსების პროგრამაში, რაც პირველი აპრილიდან ვეღარ მოხერხდება.
_ რატომ გახდა ასეთი გადაწყვეტილების მიღება აუცილებელი?
_ ვერაფერს გეტყვით. ალბათ, სახელმწიფოს არ აქვს იმის ფუფუნება, რომ ეს ოთხი ვიზიტი დააფინანსოს.
_ ორსულმა თუ ვერ მოასწრო ვადებში ჩატევა, რა დაუჯდება თითო კონსულტაცია?
_ დაახლოებით, 40-60 ლარამდე. სამწუხაროდ, ასე იქნება.
ოთარ რევიშვილი: _ ყველა ორსულმა, რომელსაც უნდა უფასო კონსულტაციების გავლა, მნიშვნელობა არ აქვს, სად არის ჩაწერილი და სად ცხოვრობს, უნდა მოგვმართოს ჩვენ. ვაუჩერები იმ ორსულებს დაურიგდებათ, რომლებიც აღრიცხვაზე დადგებიან ორსულობის 13 კვირამდე.
_ რამ გამოიწვია სახელმწიფოს ასეთი მიდგომა?
_ ეს პროგრამა მანამდეც არსებობდა. უბრალოდ, ახლა ჩვენი სააგენტო განახორციელებს მას. აქ ყველაფერი მარტივია _ 13 კვირა საკმაო დროა იმისთვის, რომ ორსულმა მოასწროს აღრიცხვაზე დადგომა. ვაუჩერსაც უპრობლემოდ მიიღებს _ ჩვენს სააგენტოში მათ არ მოუწევთ რიგში დადგომა. პირიქით, გამარტივდა ეს ყველაფერი(?!), _ გვითხრა რევიშვილმა.
რამდენად გაამართლებს სახელმწიფოს კიდევ ერთი “სავაუჩერო ექსპერიმენტი”, ამას დრო გვიჩვენებს, მანამდე კი, ვაფრთხილებთ მომავალ დედებს, რომ დროულად დადგნენ აღრიცხვაზე და ზედმეტ ხარჯებს თავი აარიდონ.
