“დეოკუპაცია ხანგრძლივი პროცესია”

პარლამენტის ტერიტორიული მთლიანობის აღდგენის კომიტეტის თავმჯდომარე შოთა მალაშხია თვლის, რომ მთავარია, დეოკუპაციის შესახებ მომზადდეს ყველა დოკუმენტი, რომლებიც შემდეგ უნდა წარადგინონ გაეროში, ეუთოსა და ნატოში.

_ დეოკუპაცია რთული პროცესია და მარტო ჩვენზე არ არის დამოკიდებული _ აქ დიდი როლი აკისრიათ საერთაშორისო ორგანიზაციებს და სხვა ქვეყნებს. გვჭირდება ქვეყნის გარეთ ამ მიმართულებით სერიოზული სამუშაოების ჩატარება. განვიხილავთ საკითხებს, თუ რა უფლებები და საშუალებები გვაქვს იმისთვის, რომ ოკუპირებულ რეგიონებში გამოვასწოროთ არსებული მდგომარეობა. საერთაშორისო ორგანიზაციების მიმართ გვექნება კონკრეტული წინადადებები, თუ რა საკითხები უნდა გადაწყდეს თანმიმდევრობით.

_ აფხაზეთში უცხოური კომპანიები ინვესტიციების ჩადებას გეგმავენ.

_ წინა მოწვევის პარლამენტშიც მქონდა ანალოგიური ინფორმაცია, მაგრამ როცა ეს ინფორმაცია საელჩოებში გადავამოწმეთ, არასწორი აღმოჩნდა. დღეს ეს საკითხი უკვე რეგულირდება საქართველოს კანონმდებლობით _ ნებისმიერი კომპანიის წინააღმდეგ, რომელიც ოკუპირებულ ტერიტორიებზე იმოქმედებს საქართველოს ხელისუფლების ნებართვის გარეშე, გამოვიყენებთ ბერკეტებს და მათ სასამართლოს წინაშე მოუწევთ წარდგომა. თუ უცხოური ინვესტიციები ჩაიდება, ამის პრობლემა არ არის, ხოლო თუ წმინდა რუსული კომპანია დააპირებს შემოსვლას, რომელსაც ანგარიშები აქვს გახსნილი საზღვარგარეთ, ჩვენ მის წინააღმდეგ ამ ბერკეტს ავამოქმედებთ. თუმცა, ასეთი ფაქტები ამ ეტაპზე არ არის დადასტურებული.

_ რა პოლიტიკური დატვირთვა აქვს ნეიტრალურ პასპორტებს, რომლის შემოღებასაც ახლა აპირებთ?

_ ეს არის ნოვაცია. ზოგადად, ნეიტრალური პასპორტები საერთაშორისო დონეზე არ აღიქმება კარგ ტონად. ასეთი ტიპის პასპორტები შემოაქვთ მაშინ, როდესაც სახელმწიფო მოქალაქეების გარკვეულ რაოდენობას არ აძლევს თავის პასპორტს და გასცემს ნეიტრალურ, უფრო დაბალი რანგის პასპორტს. ჩვენ ეს მოვიფიქრეთ იმიტომ, რომ აფხაზეთის მოსახლეობას ჰქონდეს უფლებრივად აღჭურვილი რაიმე დოკუმენტი, რომელიც გამოიყვანს რუსული ორბიტიდან და, ასევე, ადგილზე არ შეექმნას პრობლემები. მათ მიეცემათ სხვა სახელმწიფოებში გადაადგილების შესაძლებლობა, თუმცა, ჯერ კიდევ გასარკვევია, სხვადასხვა ქვეყნები შეუშვებენ თუ არა მათ საკუთარ ტერიტორიაზე ამ პასპორტებით. ეს რთული პროცესია, თუმცა, რაც მთავარია, ჩვენ ამ საქმეს მივიყვანთ ბოლომდე.

_ რა ნაბიჯები იდგმება სახალხო დიპლომატიის მიმართულებით?

_ საუბარია არასამთავრობო სექტორის წახალისებაზე. ჩვენ არა ერთი შეხვედრა გვქონდა მათთან _ არის აფხაზური ორგანიზაციები, მეომართა კავშირი, უხუცესები და ა.შ. ჩვენი მხრიდან არის ბევრი ინიციატივა, თუმცა, ურთიერთობა საკმაოდ შეზღუდულია.

_ რა მიგაჩნიათ დეოკუპაციის მიმართულებით ქართული დიპლომატიის წარმატებად?

_ მთავარია, ამ ტერიტორიებს ორი წლის შემდეგ დაერქვათ ოკუპირებული, დღეს მთელი მსოფლიო საუბრობს, რომ იქ მოხდა ქართველების ეთნოწმენდა და რუსეთი არის უკანონო ოკუპანტი. 21-ე საუკუნეში არის შესაძლებლობები, რომ ეს საკითხები სწრაფად მოგვარდეს. საზოგადოების მაქსიმალური მობილიზებაა საჭირო, რომ პრობლემები დაიძლიოს.