ოზურგეთის მუნიციპალიტეტის სოფელ ნაგომარში 400 კომლი ცხოვრობს. აქაურები ყველაზე მეტს ხელისუფლების მხრიდან უყურადღებობაზე საუბრობენ და სოფელში დაგროვილი პრობლემების მოუგვარებლობის გამო სწუხან. 28 აპრილს, პოლიტიკური ორგანიზაცია “თავისუფალი დემოკრატების” გურიის რეგიონული ორგანიზაციის ხელმძღვანელი, ოზურგეთის მუნიციპალიტეტის საკრებულოს წევრი თემურ სალუქვაძე ნაგომრელებს ეწვია. შეხვედრა სოფლის ცენტრში, ყოფილი კულტურის სახლის წინ შედგა. თემურ სალუქვაძემ სოფლის განვითარების პროგრამით გახორციელებული სამუშაოები მოიკითხა და მოისმინა, პირველ რიგში, რა სჭირდება სოფელს, რისი გაკეთება არის აუცილებელი და რას ითხოვენ ამ ეტაპზე.
_ ხალხი დაშინებულია _ მხოლოდ პენსია გვაქვს, იმასაც წამართმევენ და ვერ მოვალ შეხვედრაზეო, ამბობენ. აქ არჩევნები რომ ჩატარდა, პოლიცია და შავი სამყარო ერთად ცდილობდნენ, ხმები მოეგროვებინათ, “სომხური კარუსელიც” დაატრიალეს. ამ ხელისუფლებას ავტორიტეტი დაკარგული აქვს ხალხში, არავითარი ძალაუფლება არ აქვს რწმუნებულს და მაჟორიტარს. მოისპო ტყე _ საუკეთესო ჯიშის ხეებს ჭრიდნენ ისე, რომ მეტყევეს არავინ არაფერს ეკითხებოდა.
_ ამდენ შიმშილით და უბედურებით დაიღალა ხალხი. ცხოვრების არანაირი პირობები ჩვენ არ გვაქვს. სამედიცინო მომსახურება ისეთი ძვირია, ელემენტარულად ჩვენი თავის და ჯანმრთელობის მიხედვა ჩვენ არ შეგვიძლია.
_ ყველაზე მეტად გზის გაკეთება გვჭირდება, სოფლის საყანე ფართობი წალეკა მდინარემ, უნდა გაიწმინდოს სანიაღვრე არხი, თორემ, ცოტა ხანში, სულ წაიღებს ყველა ფართობს. ჯერ საგაზაფხულო სამუშაოები არ დაწყებულა, რადგან მიწის დამუშავების საშუალება არ გვაქვს _ თუ ხელშეწყობა არ იქნა, სიმინდს ვერ დავთესავთ, თუმცა ხელისუფლება ჩვენს დასახმარებლად ჯერჯერობით არაფერს არ აკეთებს _ გამოუყონ სოფელს ტრაქტორები! ცხოვრების ელემენტარული პირობები არ გვაქვს _ ავად რომ გავხდეთ, წამლის საყიდლად ქალაქში უნდა ჩავიდეთ, რაც 4 ლარი გვიჯდება. არ შეიძლება, ამხელა სოფელში ერთი აფთიაქი მაინც იყოს?
_ შუქი ოდნავი ნიავის დროსაც კი ითიშება, მერე ორ დღეს შეკეთებას უნდებიან, გადასახადს კი იმაზე მეტს გვახდევინებენ, ვიდრე ვხარჯავთ _ უთოფო ყაჩაღობაა ენერგოკომპანიის მხრიდან! სოფელში არ არის გაზი შემოყვანილი, გზებზე არავინ ზრუნავს. არც ხელისუფლებას და არც ოპოზიციას არ ვახსოვართ. რამდენი ხანია, 100-დოლარიან პენსიას გვპირდება პრეზიდენტი და ახლა ამბობენ, სექტემბრიდან 100 ლარი გექნებათო! პენსიონერს ნორმალურად ცხოვრების უფლება არ აქვს?!
_ რამდენიმე ოჯახი მეწყერსაშიშ ზონაში ცხოვრობს. ნოდარ წიქარიძის ოჯახი გეოლოგებმა შეისწავლეს და უთხრეს, მალე მეწყერი წაიღებს შენს სახლ-კარსო. თითქმის საძირკვლამდე მოვიდა მეწყერი, ადგილობრივმა ხელისუფლებამ უთხრა, სანამ საძირკველი არ დაგენგრევა, ვერ დაგეხმარებითო. თუ სახლები თავზე დაგვენგრა, მერე მაგათი დახმარება რაღაში გვჭირდება?!
_ ახლახან ადიდებულმა ყურეფამ 1000 კვადრატული მეტრი თხილის ფართობი წამართვა, წაიღო ყანის ფართობის ნაწილიც. თუ ასე გაგრძელდა, ალბათ, მთლიანად წაიღებს. არიან ოჯახები, რომლებსაც ყველაფერი წაართვა მდინარემ. ერთ ხიდს ძირი გამოუთხარა, მეორე კი სულ მოანგრია. სერიოზული დახმარება და ყურადღება გვჭირდება, წინააღმდეგ შემთხვევაში, მშიერი დარჩება ხალხი.
ასეთია მოსახლეობის მოსაზრებები. ხალხი ამბობს, რომ ყველა პრობლემის მოსაგვარებლად ქუდზე კაცი გამოვა, ოღონდ ყურადღება და მხარდაჭერა სჭირდებათ ადგილობრივი ხელისუფლებისგან: _ ჩვენც ვიმუშავებთ ფიზიკურად, ოღონდ რაიმე გაკეთდეს სოფელში. თქვენი გაზეთის იმედი გვაქვს, რომ ჩვენს სათქმელს და გულისტკივილს მიიტანთ ხელისუფლებამდე, იქნებ, ყურადღება მოგვაქციონ! _ იმედს არ კარგავენ ნაგომრელები.
