რეზო ცქვიტინიძის ფოტორეპორტაჟი
გუბაზეულის ხეობა
სოფელი ხიდისთავი
ამ სოფელში ცნობილ მეურნეს, ახალგაზრდა კაცს, ნერგების გამომყვან თემურ გუდავაძის ოჯახს ვესტუმრეთ, სადაც განგვაცვიფრა მასპინძლის მიერ გამოყვანილმა სხვადასხვა ჯიშის ნერგების სიმრავლემ და ხარისხმა. ბატონი თემური დასავლეთ საქართველოს ამარაგებს საკუთარი ხელით გამოყვანილი ნერგებით. როგორც თვითონ ამბობს, ბოლო ერთი თვის განმავლობაში 4 000 ძირი მსხლის და 3 800 ძირი ატმის ნერგი გაყიდა.
_ ყველაზე მეტი მოთხოვნაა ატმისა და იაპონური ხურმის ნერგებზე. ამის გარდა, სახლში ვყიდი 500 კგ თაფლს და 3 ტონა ბულგარულ წიწაკას, _ ამბობს იგი.
სოფელი ხევი
“გურია ნიუსი” 80 წლის მარგალიტა მამალაძის უკიდურესად გაჭირვებულ ოჯახს ესტუმრა. სამი წლის უკან, ამ ქალბატონს მეუღლე გარდაეცვალა და უკიდურესად გაუუარესდა მდგომარეობა. სოციალურ დახმარებას სამი წლის განმავლობაში იღებდა, თუმცა ახლა მოუხსნეს. როგორც კი მეზობლებმა შეგვნიშნეს, მაშინვე მოიყარეს ეზოში თავი და არაერთი საყვედური გამოთქვეს ხელისუფლების მისამართით: _ ჩვენ, მეზობლები ვიტანჯებით ამის შემხედვარე. ჩვენთვის არ გვაქვს არაფერი და მარგალიტას რით და როგორ დავეხმაროთ?! სოციალურ აგენტთა ასეთი დამოკიდებულება ამ ოჯახის მიმართ, დანაშაულის ტოლფასია, _ თქვეს მათ.
სოფელი ნაბეღლავი
ნაბეღლავში შესვლისას, რაც თვალში მოგვხვდა, ნაბეღლავი-ბახმაროს მიმართულებით გზის მშენებლობაა, რომელსაც “გზამშენი-18” ახორციელებს თემურ ჯახვას ხელმძღვანელობით. სოფლის შარაზე ჯოხგაჩრილ, ზურგზე მოდებულ ჩანთიან ასაკოვან ქალბატონს დარეჯან მეფარიშვილს წამოვეწიეთ, რომელიც საცალფეხო ბილიკით, მთის წვერზე წამოსკუპებული სახლისკენ მიემართებოდა. იგი ძალზე უშუალო მოსაუბრე აღმოჩნდა და გვითხრა: _ დღეს, ბატონო, ბევრს ეკუთვნის დახმარება, მაგრამ არ ეხმარებიან. მე არ მხდება სული შიმშილით, ოთხი სული ვართ და ერთი მუშაობს… თქვენ, ჟურნალისტები კი მაგრად დადექით და სხვებს მიეხმარეთ.
_ იმ დასანტროვ ტელევიზორში რომ ერთს აცხადებენ და მეორეს აკეთებენ, სკვარამში წავიდა მაგისთანა დამპირებელი… _ ასეთია ამ ქალბატონის მიერ საქართველოში დღეს არსებული საინფორმაციო სივრცის შეფასება.
სოფელი ქვაბღა
ცოლ-ქმარი _ აკაკი ბერიძე და ესმა ჭელიძე, რომლებიც ჩვენი ჩავლისას ბოსტანში მუშაობდნენ, თვლიან, რომ დღევანდელ ყოფაში სიცოცხლის გადარჩენა საკუთარი შრომით უნდა შევძლოთ: _ სხვა გზა როცა არ არის, საკუთარი შრომით უნდა დავიპუროთ სული, _ ამბობენ ისინი. აგერ, ბატონო, ნაბეღლავის უზარმაზარი ქარხანა გვაქვს ყურისძირში, მაგრამ ახლომახლო სოფლებიდან არავის ამუშავებენ; მიზეზად კი ასახელებენ იმას, რომ არჩევნებში თითქოს მხარი არ დავუჭირეთ.
სოფელი ზოტი
მეწისქვილე დავით ანთაძე დაუზარელად გვიყვება სოფლის ამბავს: _ ზოტში გამოკეტილ ოჯახებს ვერსად ნახავთ. კი, ბატონო, ზოგიერთი ახალგაზრდა ქალაქში გადავიდა საცხოვრებლად, მაგრამ ხშირად ჩამოდის, აქაურ საქმეს მოითავებს და ისევ უკან ბრუნდება. ძირითადი მოსახლეობა მესაქონლეობით და მიწის დამუშავებით არის დაკავებული. სოფელში თითქმის ყველას ტექნიკა გვაქვს; ზამთარში, მართალია, დიდი თოვლი მოდის, მაგრამ არასდროს გზა არ ჩაგვკეტვია _ ჩვენვე ვწმენდთ ტრაქტორების საშუალებით. უამრავი წისქვილებია აქ. ზამთარში პურიც გვაქვს და მჭადიც, არავის არ ჰყავს 10 და 15 ძროხაზე ნაკლები. ამიტომაცაა სოფელი ეკონომიკურად ძლიერი. მაგრამ მაინც მინდა აღვნიშნო, რომ ვინც ავადაა და მუშაობა არ შეუძლია, მშველელი ნაკლებად ჰყავს; სოციალური დახმარება გაჭირვებულებს იშვიათად ენიშნებათ _ თითო-ოროლა ოჯახებს თუ წყალობენ აგენტები.
_ რეზო ჩერნობილშია ნამყოფი; დასხივება მიიღო, რის გამოც, კბილები დაკარგა; ჯანმრთელობას უჩივის და ფიზიკურადაც ვერ მუშაობს. ხშირად სჭირდება ექიმი, მაგრამ უსახსრობის გამო ვერ მიდის ექიმთან. სოციალური დახმარება არ ეძლევა, ყოველთვის მაღალი ქულებით ხდება მისი შეფასება, _ თავისი ოჯახის ამბავს ჰყვება რეზო ჭელიძის დედა ქალბატონი სურიე.
გელა პაქსაძისა და ნანული ირემაძის ოჯახიც უკიდურესად მძიმე ეკონომიკურ მდგომარეობაშია. ქალბატონი ნანული 5 წელია, ფილტვების სიმსივნით დაავადდა. 5 წლის მანძილზე დახმარება ეძლეოდა, თუმცა, 7 თვის წინ მოუხსნეს, არც პოლისი აქვს.
_ დახმარება შეუმოწმებლად მომიხსნეს და დამპირდნენ, კომპიუტერში გაუგებრობა იყო და ახლა დაგინიშნავთო, მაგრამ ვატყობ, მომატყუეს _ სამი ქულა მაქვს ზედმეტი და ამიტომაც არ მაძლევენ, _ ამბობს ავადმყოფი ქალი, _ სანათესავომ სატელიტური ანტენა დამიდგა ტელევიზორს რომ ვუყურო და მძიმე ფიქრებთან მარტო არ ვიყო… დიდი ხანია სახლში ძველი, დაშლილი სატვირთო მანქანაც გვიდგას, თუმცა, ახლა ვის შეუძლია მაგის გაკეთება ან მაგაზე მუშაობა?! ალბათ, ამან განაპირობა ის ზედმეტი სამი ქულა, რომელმაც პოლისის და სოციალური დახმარების გარეშე დამტოვა, _ გულისტკივილს გვიზიარებს ქალბატონი ნანული.
თენგიზ გუდავაძე
მარგალიტა მამალაძე
მარგალიტა მამალაძის სახლი
ნანული ირემაძე
ცოლ-ქმარი ესმა ჭელიძე და აკაკი ბერიძე
დარეჯან მეფარიშვილი
ბახმაროს გზის მშენებლობა
დავით ანთაძის წისქვილი
დავით ანთაძე
სურიე ჭელიძე
