საქართველოს თავდაცვის სამინისტრომ სამხედრო აღლუმის პროგრამა გაავრცელა. სამინისტროს ვებგვერდზე გამოქვეყნებული ინფორმაციით, 26 მაისს საქართველოს დამოუკიდებლობის დღის დაწყებას საზოგადოებას აკაკი წერეთლისა და სიმონ ჩიქოვანის ხმა ამცნობს.
აღლუმს საქართველოს შეიარაღებული ძალების გაერთიანებული შტაბის უფროსი, გენერალ მაიორი დევი ჭანკოტაძე უხელმძღვანელებს. სამხედრო აღლუმს საქართველოს პრეზიდენტი, სამხედრო ძალების უმაღლესი მთავარსარდალი მიხეილ სააკაშვილი ჩაიბარებს. მიხეილ სააკაშვილი საპრეზიდენტო ბრწყინვალების ორდენით 15 ადამიანს დააჯილდოებს. რამდენიმე სამხედრო დაჯილდოვდება ასევე ორდენებით.
პირველად, აღლუმების ისტორიაში, საზეიმო ცერემონიის ფარგლებში თავდაცვის ეროვნული აკადემიის კურსადამთავრებულები სამხედრო ფიცს დადებენ. აღლუმზე საქართველოს სახელმწიფო ჰიმნს თავდაცვის სამინისტროს სასულე ორკესტრის თანხლებით მომღერალი ნინი ბადურაშივილი შეასრულებს.
აღლუმში მონაწილეობას მიიღებს მედროშეთა კოლოფი, ასევე კადეტთა სამხედრო ლიცეუმის მსმენელები, გაერთიანებული შტაბისა და სახმელეთო ჯარების სარდლობის პირადი შემადგენლობისგან დაკომპლექტებული სააღლუმე კოლოფი, წვრთნებისა და სამხედრო განათლების სარდლობის სხვადასხვა ქვედანაყოფების პირადი შემადგენლობა, ოთხივე სამხედრო ბრიგადე, ცალკეული მსუბუქი ქვეითი ბატალიონი, ქართული არტილერიის ქვედანაყოფების წარმომადგენლები, საინჟინრო ბრიგადე, ცალკეული კავშირგაბმულობის ბატალიონი, სახმელეთო ჯარების საავიაციო ქვედანაყოფებისგან დაკომპლექტებული კოლოფი, გვარდია.
აღლუმში მონაწილე ქვეითი პირადი შემადგენლობის შემდეგ საზეიმო მსვლელობას განაგრძობს შეიარაღებული ძალების მძიმე ჯავშანტექნიკა, საარტილერიო სისტემები და საფრენი აპარატები. 2011 წლის 26 მაისის აღლუმზე არ იქნება წარმოდგენილი მუხლუხა ტექნიკა. ტექნიკის მსვლელობა დაიწყება ახალი, საქართველოში წარმოებული ჯავშანტრანსპორტიორი “დიდგორით”. ეს არის, როგორც უშუალოდ აღლუმზე ისე საქართველოს შეიარაღებულ ძალებში ერთ-ერთი მთავარი სიახლე. ასევე ჰამერის ტიპის შეჯავშნული ავტომობილი, ჯავშანტრანსპორტიორი “კობრა”, ჯავშანტრანსპორტიორი “ვულფი”, ჯავშანტრანსპორტიორი – ბტრ-80, ჯავშანტრანსპორტიორი “ეჯდეერი”, საარტილერიო სისტემა “მსტა”, საარტილერიო სისტემა “გიოცინტ”, 152 მმ თვითმავალი საარტილერიო დანადგარი “დანა”, ზალპური ცეცხლის რეაქტიული სისტემა “რმ-70”.
შეიარაღებული ძალების მძიმე ჯავშანტექნიკისა და საარტილერიო სისტემების შემდეგ აღლუმში საფრენი აპარატები ჩაერთვებიან: შვეულმფრენი UH-1, შვეულმფრენი მი-8, შვეულმფრენი მი-24, მსუბუქი საბრძოლო გამანადგურებელი “ლ- 39”, მოიერიშე თვითმფრინავი სუ-25. სუ-25 მოიერიშე თვითმფრინავების გადაფრენის შემდეგ აღლუმის საზეიმო მსვლელობა დამთავრდება.
აღლუმს, პირველად აღლუმების ისტორიაში, ნაციონალური ბალეტი “სუხიშვილების” შესრულებით ცეკვა “ხორუმი” დაასრულებს. “ხორუმს” სუხიშვილები საქართველოს შეიარაღებული ძალების საველე – სამხედრო ფორმებში შეასრულებენ. ცეკვის დასასრულს ვერტმფრენიდან ჩამოყრიან კანფეტებს და ტრიბუნების მიმდებარე ტერიტორიიდან ჰაერში ბუშტებს გაუშვებენ.
