“ნოდარ დუმბაძის შემოქმედება მამხნევებს და კარგ განწყობაზე მაყენებს”

(გურია ნიუსი, ლანჩხუთი) _ ლანჩხუთის თეატრს ახალი რეჟისორი ჰყავს. მას შემდეგ, რაც ეს პოსტი “ქართულ პარტიაში” გადასულმა გია ქურიძემ დატოვა, ვაკანსია ირმა მენაღარიშვილმა შეავსო.

იგი ლანჩხუთში დაიბადა და გაიზარდა. პროფესიით პედაგოგია, თუმცა, ხელოვნებამ თავი ისე შეაყვარა, რომ რეჟისორობა დაიწყო და კარგადაც გამოსდის. რატომ უყვარს ბავშვებთან ურთიერთობა, რატომ და ვისი გავლენით აირჩია პროფესია _ ამ და სხვა თემებზე თავად გვესუბრება.

_ პირველი სკოლა დავამთავრე, შემდეგ კი _ სულხან-საბას სახელობის პედაგოგიური ინსტიტუტი რუსული ფილოლოგიის განხრით. 1990 წლიდან მეორე საჯარო სკოლაში ვმუშაობ. მყავს მეუღლე და ორი ქალიშვილი.

_ რატომ აირჩიეთ პედაგოგობა? ხშირად ბავშვები ამ გადაწყვეტილებას საყვარელი მასწავლებლის გამო იღებენ. თქვენ შემთხვევაში როგორ იყო?

_ ჩემი პირველი მასწავლებელი მაყვალა გვარჯალაძე გახლდათ. შემდეგშიც კარგი პედაგოგები მასწავლიდნენ, თუმცა, ის, რომ პედაგოგი გავმხდარიყავი, მაყვალა მასწავლებლის გამო მოხდა. ეს პროფესია მან შემაყვარა.

_ რეჟისორობა რატომღა გადაწყვიტეთ?

_ მაყვალა მასწავლებლის თაოსნობით შევქმენით საბავშვო თეატრი, რომლის მუსიკალური გამფორმებელი და დეკორატორი მე ვიყავი. ამავე დროს, მონაწილეობასაც ვიღებდი სპექტაკლებში. როცა პედაგოგი გავხდი, სკოლაში მომიხდა ღონისძიებების გაკეთება… და ასე, დღეს უკვე კულტურის ცენტრში ვარ.

_ თავადაც კარგად მღერით და ორგანიზატორული ნიჭიც გაქვთ…

_ ვმღერი და შესაბამისი მუსიკალური განათლებაც მაქვს მიღებული. რაც მთავარია, მიმაჩნია, რომ კარგი შემფასებელი ვარ. ახლახან ერთ-ერთ კონკურსში გავიმარჯვე ჩემ მოსწავლეებთან ერთად. გადავიღე ფილმი “გიყვარდეთ სიცოცხლე”, რომელიც ნარკომანიის წინააღმდეგ იყო მიმართული. ეს რეგიონული კონკურსი გახლდათ და ჩემი მოსწავლეები ექსკურსიით დააჯილდოვეს. ერთი რამ მინდა ვთქვა _ ხელოვნება ყველა ადამიანის ცხოვრების საფუძველია, ის ყველა ადამიანში დევს, ოღონდ უნდა დაინახო და წინა პლანზე წამოსწიო.

_ როგორი დედა ხართ?

_ ყურადღებიანი. ვცდილობ, შვილებისთვის ყველაფერი გავაკეთო. მინდა სასახელო, მართლმადიდებელი ქრისტიანები გაიზარდონ. როცა სცენარზე ვმუშაობ, ვცდილობ სხვებისაგან ჩემი შვილები არ გამოვარჩიო.

_ თქვენ მიერ მომზადებული არა ერთი ღონისძიება გვინახავს, მაგრამ კულტურის ცენტრში 26 მაისის კონცერტი პირველი იყო, რომელმაც საზოგადოების მოწონება დაიმსახურა.

_ იდეა, რომ 26 მაისს საქართველოს ყველა კუთხე წარმოგვედგინა, ქალბატონ სოფო ჭელიძისგან მოდიოდა. ჩვენი ქვეყნის დამოუკიდებლობა მისი კუთხეების გარეშე ხომ წარმოუდგენელია? გავიხსენეთ ტკივილიანი აფხაზეთი და ოსეთი, თუმცა, იუმორითაც კარგად იყო გაჯერებული. ეს პირველი ღონისძიებაა, რაც კულტურის ცენტრში გავაკეთე. სასიამოვნო იყო შემოქმედებით ჯგუფთან მუშაობა. ღონისძიებას კარგი წამყვანი ჰყავდა _ გოდერძი ქურიძე.

_ საინტერესო პერსონაჟები ვიხილეთ ბავშვთა საერთაშორისო დღისადმი მიძღვნილ კონცერტზეც.

_ ძალიან მონდომებული ბავშვები არიან. მუშაობისას ვცდილობ, კარგად შევარჩიო ხასიათი. ასე “გაჩნდა” ფისო, თაგუნია, ყვავი, ძროხა, მუხა _ “რწყილი და ჭიანჭველას” პერსონაჟები. ისინი ამ ლამაზი ღონისძიების გაფორმებაში გვეხმარებოდნენ და თავიანთი როლებიც შესანიშნავად მოირგეს. თუმცა, იმ პატარა გოგო-ბიჭების შესახებაც უნდა აღვნიშნოთ, რომლებიც კულტურის ცენტრის შემოქმედებითი წრეების აღსაზრდელები არიან. ეს დღე ხომ მათთვის განსაკუთრებული დღეა _ ყველაფერი მათთვის კეთდება და პატარებიც სულმოუთქმელად ელოდებიან ამ დღესასწაულს.

_ რომელი მწერალი, პოეტი და ნაწარმოები მოგწონთ?

_ გამორჩევა ძალიან მიჭირს. ქართულ პოეზიას ძალიან ბევრი შემოქმედი ჰყავს. მოდი ასე ვიტყვი _ რაც ნებისმიერ დროს მამშვიდებს და კარგ განწყობაზე მაყენებს, ნოდარ დუმბაძის შემოქმედებაა. როცა მას ვკითხულობ, სულიერად ვმშვიდდები, ვისვენებ და ახალი იდეებიც მიჩნდება.

_ მუდამ დაკავებული ხართ საზოგადოებრივი საქმიანობით. ოჯახისათვის დრო გრჩებათ?

_ ოჯახში იციან, რომ ეს საქმე ძალიან მიყვარს და სხვანაირად არ შემიძლია. ხელს მიწყობენ და მგულშემატკივრობენ, რაც ძალიან მახარებს და ძალას მმატებს. ისე, დიასახლისობა არც თუ ურიგოდ გამომდის.

_ რომ შეგეძლოთ, რას შეცვლიდით თქვენ ცხოვრებაში?

_ უნაკლო ქვეყნად არავინაა. შეიძლება რაღაცები არ მომწონს, მაგრამ მაინც არაფერს შევცვლიდი, რადგან ეს ჩემი ცხოვრებაა და ვთვლი, რომ ყველაფერი უფლის ნებაა.

_ სამომავლო გეგმებზე რას გვეტყოდით?

_ კულტურის ცენტრში საბავშვო დასი ფუნქციონირებს. მათთან მუშაობა ახლახან დავიწყე. მონდომებული ბავშვები არიან. ამჟამად ოტია იოსელიანის ერთ-ერთ პიესაზე ვმუშაობთ. ცენტრი სეზონს საანგარიშო კონცერტით დახურავს. ახალ სეზონს კი როგორ და როდის დავიწყებთ, ამის შესახებ მაყურებელს აუცილებლად ვაცნობებთ.