და მკაცრად გააფრთხილა, რომ უახლოეს დღეებში იმ სარემონტო სამუშაოებს შეამოწმებდა, რომელიც მიმდინარეობს ან უნდა გახორციელდეს. მან ოზურგეთის მუნიციპალიტეტის გამგებელს გია ტაკიძეს ერთი კვირის ვადა მისცა, რომ ურეკში სეზონისთვის ყველაფერი მზად ყოფილიყო.
4 ივნისს, ვალერი ჩიტაიშვილმა, ოზურგეთის მაჟორიტარ დეპუტატ გოჩა შანიძესთან, ვიცე-გუბერნატორ ლელა თავართქილაძესთან, მუნიციპალიტეტის გამგებელ გია ტაკიძესთან, საკრებულოს თავმჯდომარე ალეკო მამეშვილთან და ჟურნალისტებთან ერთად, ურეკში გაწეული სამუშაოები შეამოწმა.
პირველად, გუბერნატორმა ურეკში ის ადგილი მოინახულა, სადაც პლაჟზე გასასვლელი მოეწყობა. ამ სამუშაოს ტენდერში გამარჯვებული შპს “კონცეპტი” ასრულებს. გუბერნატორის თქმით, გასასვლელის მოწყობა ძალიან მნიშვნელოვანია დამსვენებლებისთვის. ჩიტაიშვილი, ასევე, გარე განათების მონტაჟით, შიდა გზების მიმდინარე სარემონტო სამუშაოთი, დასუფთავების საკითხით, სამაშველო სამსახურის და მეველეთა მუშაობით დაინტერესდა.
გაზეთ “გურია ნიუსის” მისამართით ჩინოსნებისგან რამდენიმე რეპლიკა გაისმა _ გუბერნატორის მოადგილე ლელა თავართქილაძე ურეკში გუბეების არსებობით დაინტერესდა და მუნიციპალიტეტის გამგებელს გია ტაკიძეს ირონიულად მიმართა:
_ ბატონო გია, ურეკში გუბეები არის?!
გამგებელმა იგივე ტონით უპასუხა:
_ არ ვიცი, გუბეები?! ვნახოთ, წავიდეთ, თუმცა, როცა გაზეთ “გურია ნიუსში” ფოტოები გამოქვეყნდა, გზა უკვე მოწესრიგებული იყო.
_ ბატონო გია, ფოტოები 25 ივნისს არის გადაღებული.
_ ნუ, არ ვიცი, მაგრამ, როცა გაზეთი გამოვიდა და სტატია დაიბეჭდა, ურეკში გუბეები უკვე აღარ იყო, _ ნიშნისმოგებით გვითხრა გამგებელმა, თუმცა, ნამდვილად ვერ გავიგეთ, ეს ნიშნისმოგება “გურია ნიუსს” რატომ ეკუთვნოდა გურული ჩინოვნიკებისგან _ ჩვენ ის ავსახეთ, რაც ვნახეთ, ანუ ჩვენი მოვალეობა შევასრულეთ, ხოლო ხელისუფლებამ თუ გზა დააგო, ეს მისი მოვალეობაა და სწორედ ამისთვის ჰყავს მოსახლეობას ის დაქირავებული. თუ ჩინოვნიკები ფიქრობენ, რომ გაკეთებული საქმეებით ჩვენ “მოგვიკლავენ გულს”, მწარედ ცდებიან _ ჟურნალისტები სწორედ იმიტომ ვწერთ პრობლემების შესახებ, რომ მათ კეთილი ინებონ და ყურები გამოიფხიკონ. და კიდევ ერთი, მთელი წლის განმავლობაში, სეზონის დადგომამდე, ურეკში და სხვა ზღვისპირა სოფლებში ადგილობრივი მოსახლეობა ცხოვრობს. ხელისუფლებას, ადგილობრივსაც და ცენტრალურსაც, ასე განცხრომით სწორედ ისინი არჩენენ და ხელისუფლებაც, ვალდებულია, არა მარტო ტურისტების და დამსვენებლებისთვის, პირველ რიგში, ადგილობრივი მოსახლეობისთვის გაისარჯოს!
_კი, ბატონო, ეს ცენტრალური გზაა და დააგეთ, მაგრამ რა ხდება ურეკის შიდა გზებზე? ორმოები რომაა, იმას რა ეშველება? როდის დაამთავრებთ სულ? _ იკითხა ჩიტაიშვილმა და კონკრეტულად გზის ის მონაკვეთი შეამოწმა, სადაც ჩვენმა ფოტოობიექტივმა 25 ივნისს გუბეები დააფიქსირა.
ვალერი ჩიტაიშვილი: _ აქ მართლაც შეუძლებელი იყო გადაადგილება. კაპიტალურად გავაკეთებთ მას შემდეგ, რაც წყალი და კანალიზაცია მოწესრიგდება, თუმცა ისე დატოვება, როგორც იყო, არ შეიძლებოდა.
გია ტაკიძე: _ ჩვენ ნაწილობრივ დავაგეთ გზა და ორ დღეში ურეკის შიდა გზებს სრულად მოვაწესრიგებთ. აქ ყველა უკანონო მშენებლობა ავიღეთ. წელს არც ერთი უკანონო ნაგებობა არ იქნება ურეკში.
ურეკის რწმუნებულმა მერაბ გოგიტიძემ გუბერნატორთან საუბარში აღნიშნა, რომ ურეკში პრობლემების 80% მოგვარებულია!
_ ბატონო ვალერი, ურეკის პრობლემები 80%-ით არის მოგვარებული, პირადად მე ვარ პასუხისმგებელი, რომ ხვალ მოსახლეობას წყალი ექნება, _ “ცოტა” არარეალური დაპირება უპატაკა მან გუბერნატორს.
ვალერი ჩიტაიშვილი რამდენიმე ობიექტის ნახვის შემდეგ ჟურნალისტებს მიუბრუნდა:
_ ასეთი დასუფთავებული თუ იქნება ურეკი, როგორც ახლაა, ხომ მაგარია, არა? მთავარი სისუფთავეა _ ხომ მეთანხმებით? ჟურნალისტებთან ერთად, ხუთი დღის… ორი კვირის შემდეგ კიდევ ჩამოვალ და შევამოწმებ.
_ ბატონო ვალერი, ურეკში წყლისა და კანალიზაციის პრობლემა როდის გადაიჭრება?
_ ჭაბურღილები იმუშავებს, მაგრამ მიდის პროექტზე მუშაობა. ვგულისხმობ დიდ პროექტებს, რომელიც წელს ნამდვილად ვერ მოესწრება _ ეს არის საკმაოდ დიდი პროექტი, რომელიც მარტო ურეკის წყალმომარაგებას არ გულისხმობს. ეს შეეხება ურეკი-შეკვეთილის წყლისა და კანალიზაციის პრობლემის მოგვარებას, აქ მარტო რეაბილიტაციაზე არ არის საუბარი, არამედ, იგულისხმება ახალი ქსელის მოწყობა, _ გვიპასუხა გუბერნატორმა.
ვალერი ჩიტაიშვილის თქმით, მეველეების მუშაობა არ არის დამაკმაყოფილებელი:
_ მესმის, ძნელია, მაგრამ მე მინდა, რომ დამსვენებლებისთვის იყოს შექმნილი ყველა ის პირობა, რაც აუცილებელია მაქსიმალური კომფორტისთვის. მე თქვენ, ჟურნალისტებს, გაფართოებულ თათბირზე შეგპირდით, რომ თქვენთან ერთად წამოვიდოდი და დავათვალიერებდი ურეკში ჩატარებულ სამუშაოებს. თქვენც ნახეთ, რომ სამუშაოები ჯერ არ არის დასრულებული და ისევ მიმდინარეობს, თუმცა, კიდევ გვექნება იმის საშუალება, რომ ისევ ჩამოვიდეთ და დავათვალიეროთ ურეკი. თუმცა, პირველი შედეგებით უკმაყოფილო არ ვარ, მაგრამ მინდა უფრო უკეთესი და ვიცი, რომ კიდევ ბევრია გასაკეთებელი. ამ ეტაპზე, ერთადერთი, რაც არ მომეწონა, მეველეების მუშაობაა.
ურეკის შემდეგ, გურული ჩინოსნები ოზურგეთის მუნიციპალიტეტის სოფელ ლაითურს ესტუმრნენ და სოფლის განვითარების პროგრამით გარემონტებული სარიტუალო სახლი მოინახულეს.
ელზა ცხელიშვილი, სოფელ ლაითურის რწმუნებული: _ ეს შენობა, ფაქტობრივად, დანგრეული იყო და მის გარემონტებას 14 600 ლარი დაჭირდა, რაც ხალხის მოთხოვნით გაკეთდა.
ვალერი ჩიტაიშვილი: _ მომავალში ჩვენ გვექნება კიდევ უფრო მეტი თანხები სოფლებისთვის და შესაბამისად, თქვენც გექნებათ იმის საშუალება, სხვა პროექტებიც განახორციელოთ.
გურიის გუბერნატორს, რიტუალების სახლის გახსნისას, რამდენიმე ლაითურელი დაბის პრობლემების შესახებ ესაუბრა: _ ჩვენი სოფლის ძირითადი პრობლემა უწყლობაა. როდის შეძლებთ, ბატონო ვალერი ამ პრობლემის მოგვარებას?
_ წყალი არის ყველაზე მნიშვნელოვანი რამ, მაგრამ ეს ძალიან დიდ თანხებთან არის დაკავშირებული და სოფლის პროექტებით, თავისთავად, არ გაკეთდებოდა. თუ გავაკეთებთ, უნდა გაკეთდეს ბოლომდე. უნდა დავიწყოთ ციხის მშენებლობაც. ეს პროცესები, მინდა ერთმანეთზე იყოს მიბმული და პარალელურად გახორციელდეს, _ თქვა ჩიტაიშვილმა.
“გურია ნიუსი” ურეკსაც და უწყლო, მაგრამ ციხის მშენებლობის მოლოდინში მყოფ ლაითურს არაერთხელ ეწვევა; პრობლემებს არ დამალავს და ამით, მოსახლეობასთან ერთად, თუ ჩინოვნიკებს გონიერება ეყოფათ და კარგად გაიაზრებენ, ხელისუფლებასაც გაუწევს სამსახურს.
