(გურია ნიუსი, ჩოხატაური) _ გასულ კვირას, ცენტრალური საარჩევნო კომისიის თავმჯდომარემ, ზურაბ ხარატიშვილმა ჩოხატაურში შეხვედრა გამართა და ცსკ-ს მიერ არჩევნების შემდეგ გაწეული მუშაობის შესახებ ისაუბრა.
_ ჩვენი მთავარი პრობლემა ნდობაა. მთავარი მიზანი კი _ ამ ნდობის მოპოვება, _ აღნიშნა ხარატიშვილმა. მისივე თქმით, საარჩევნო ადმინისტრაცია ყოველთვის იქნება საჯარო და გამჭვირვალე.
_ ჩვენთვის მთავარი ამოცანაა, რომ ვიყოთ დამოუკიდებლები და მიუკერძოებლები. მე გაძლევთ გარანტიას, რომ ეს ასეც იქნება. ჩვენ გვესმის, რომ პრობლემები ბევრია და ვეცდებით ისინი მოვაგვაროთ, _ თქვა ცსკ-ს თავმჯდომარემ
მისივე ინფორმაციით, განსაკუთრებულ ყურადღებას ცენტრალური საარჩევნო კომისია რეგიონულ მედიასთან ურთიერთობას დაუთმობს. საქართველოს რეგიონული მედიის ასოციაციის თავმჯდომარე ია მამალაძე ადასტურებს ურთიერთთანამშრომლობის სურვილს ცენტრალური საარჩევნო კომისიის მხრიდან:
_ თანამშრომლობის სურვილის ასე აქტიურად გამოხატვა, ძალიან მნიშვნელოვანი სიახლეა _ მსგავსი აქტიურობა აქამდე არ ყოფილა გაცხადებული და რა თქმა უნდა, თუ იგი მართლაც რეალური და მოსაზრებათა ურთიერთგაზიარებაზე იქნება დაფუძნებული, არჩევნების ნორმალურად წარმართვას წაადგება, _ ამბობს ია მამალაძე.
ჩოხატაურში ყოფნისას, ხარატიშვილმა სამომავლო გეგმებზეც ვრცლად ისაუბრა და აღნიშნა, რომ სკოლებში და უმაღლეს სასწავლებლებში საარჩევნო სისტემების სწავლა, ხელს შეუწყობს განათლებული თაობის აღზრდას. მანვე დავალება მისცა ჩოხატაურის საოლქო საარჩევნო კომისიის თავმჯდომარეს, რომ მოიძიოს ის სტუდენტები, რომლებმაც სასწავლებლებში უკვე გაიარეს არჩევნების სამართლის კურსები:
_ მოძებნეთ, აიყვანეთ თქვენთან სტაჟიორებად. შესაძლებელია მოხდეს მათი უბნებში დასაქმებაც. ჩვენთვის, ჩვენი ქვეყნისთვის ეს ძალიან მნიშვნელოვანია. უკეთესი საარჩევნო გარემოს შესაქმნელად აუცილებელია ადამიანმა თავიდანვე იცოდეს რა არის არჩევნები, რატომ არის მნიშვნელოვანი ის ქვეყნისთვის და როგორ უნდა მოიქცეს უკეთესი საარჩევნო გარემოს შესაქმნელად. როცა სკოლაში გასწავლიან არჩევნების სამართალს და შემდგომ, ცოდნას გაიღრმავებ უმაღლეს სასწავლებელში, ეს იმას ნიშნავს, რომ იცი არჩევნების პასუხისმგებლობა, _ თქვა ხარატიშვილმა.
ცსკ-ს თავმჯდომარის თქმით, არჩევნებამდე დარჩენილი დრო კომისიის წევრებთან, არასამთავრობო ორგანიზაციებთან და მედიასთან ურთიერთობას დაეთმობა.
