(გურია ნიუსი, ლანჩხუთი) _ როგორც ცნობილია, ორიოდე კვირის წინ, გურიაში “ა” ჰეპატიტის ათეულობით შემთხვევა დაფიქსირდა. ამის გამო, ბოტკინის სავარაუდო ეპიდემიაზე საუბრობდნენ. “ა” ჰეპატიტით სკოლის მოსწავლეები არიან დაავადებულები. არადა, ამის შესახებ ინფორმაცია კარგა ხანს გასაიდუმლოებული იყო. მართალია, გურიაში “ა” ჰეპატიტის გავრცელების არც მიზეზია დადგენილი და ჯერჯერობით, არც პანიკის საფუძველს ხედავენ, მაგრამ თუ ორი კვირის წინ ლანჩხუთის საავადმყოფოს მთავარი ინფექციონისტი 15 შემთხვევაზე საუბრობდა, დღეს საზოგადოებრივი ჯანდაცვის სამსახურში უკვე 28 შემთხვევის შესახებ აცხადებენ.
“გასულ კვირაში 2 შემთხვევა დაფიქსირდა, ეს არ არის საშიში მაჩვენებელი, ინფექციის პიკი უკვე იყო, თუმცა, არ გამოვრიცხავთ, რომ ინფიცირებულთა რაოდენობა გაიზარდოს ან საერთოდ, შეჩერდეს მისი გავრცელება,” _ გვითხრეს საზოგადოებრივი ჯანდაცვის სამსახურში.
რამდენიმე დღეა, ქალაქში გავრცელდა ინფორმაცია, რომ ახალგაზრდა ქალბატონს, რომელიც ფაქტობრივად დაუზუსტებელი მიზეზების გამო გარდაიცვალა, ჰეპატიტი ჰქონდა. ამბობენ, რომ ქალბატონს მწერმა უკბინა, ამას კი “ა” ჰეპატიტიც დაემატა. ფაქტია, მხოლოდ ის, რომ პაციენტი გაურკვეველი მიზეზით გარდაიცვალა.
ჩვენ საზოგადოებრივი ჯანდაცვის ცენტრის დირექტორს, ლადო ჩხაიძეს დავუკავშირდით:
_ ბატონო ლადო, გავრცელდა ხმები, რომ ქალბატონის გარდაცვალების მიზეზი შესაძლოა ჰეპატიტი იყო. ხომ არ არის რაიმე გარკვეული?
_ არა, ეს არაზუსტი ინფორმაციაა, რამაც შესაძლოა უსაფუძვლო პანიკა გამოიწვიოს. კატეგორიულად ვაცხადებთ, რომ ჰეპატიტი აქ არაფერ შუაშია. როგორც ვიცი, საქმე გვაქვს ბორეილოზთან, თუმცა, ამის შესახებ ინფექციონისტები უფრო ზუსტ პასუხს გაგცემენ.
ამის შემდეგ ლანჩხუთის მთავარ ინფექციონისტს, ნატო მენაღარიშვილს ვესაუბრეთ:
_ სამწუხაროდ, ჩვენ არ გვაქვს დადასტურებული ინფორმაცია, რომ ქალბატონის გარდაცვალების მიზეზი არის ბორეილოზი. ჩვენც მხოლოდ გავრცელებული ინფორმაციიდან გამომდინარე ვსაუბრობთ. ეს დაავადება არ შედის იმ 65 ინფექციას შორის, რომლის შესახებაც გვაქვს დეტალური ინფორმაცია. როგორც ჩანს, ეს ინფექცია საქართველოში გავრცელებული არ არის. ახლა ჩვენ ვცდილობთ გავარკვიოთ ამ დაავადების სპეციფიკა.
_ შეგიძლიათ გვითხრათ ქალბატონის გარდაცვალების მიზეზი რა გახდა?
_ ვერ გეტყვით, ამის შესახებ ინფორმაცია არ გვაქვს. როცა ის თავიდან მიიყვანეს “ავერსის” კლინიკაში, ჩვენ დავინტერესდით, ხომ არ გვქონდა საქმე ინფექციურ დაავადებასთან და თავდაპირველი სიმპტომებითა და ანალიზებით, როგორც კლინიკაში გვითხრეს, ინფექციური დაავადების ნიშნები არ ყოფილა. შემდეგ ის თბილისში გადაიყვანეს და სამწუხაროდ, ქალბატონი გარდაიცვალა. ჩვენამდეც მოვიდა ხმები, რომ საუბრობენ მწერის ნაკბენზე, რასაც ნამდვილად შეუძლია დამბლის გამოწვევა. რაც შეეხება “ა” ჰეპატიტს, მწერს მისი გადატანა მხოლოდ იმ შემთხვევაში შეუძლია, თუ ის ფეკალიებიდან ინფექციას გადაიტანს საკვებზე და ამ საკვებს ადამიანი მიიღებს. მწერის კბენით ჰეპატიტი არ გადადის.
