ტაკიძე დაკავებისთანავე თბილისში, მოდულის შენობაში გადაიყვანეს, მიუხედავად იმისა, რომ ის არა შსს-მ, არამედ პროკურატურამ დააკავა. რატომ მოხვდა დაკავებული გამგებელი შსს-ს დაქვემდებარებულ შენობაში და რატომ დაკითხეს ის მოდულში, არავინ იცის. პროკურატურა დაჟინებით ამტკიცებს, რომ საქმე ანტიკორუფციულმა დეპარტამენტმა გახსნა. მთავარი პროკურატურის ოფიციალური განცხადებით, საბიუჯეტო თანხების მითვისების ფაქტები გამგეობის დოკუმენტაციის შესწავლისას გაირკვა, თუმცა, როგორც ოზურგეთის გამგეობაში გვითხრეს, პროკურატურას არავითარი დოკუმენტაცია ტაკიძის დაკავებამდე შენობიდან არ წაუღია. გარდა ამისა, ოფიციალური ვერსიით, დასუფთავების სამსახურის უფროსს, ტაკიძე სამსახურეობრივ მფარველობას უწევდა, არადა, ამ სტრუქტურას საკრებულო ქმნის და სუბსიდირებას უწევს. პროკურატურის მიერ დასახელებული მილიონ ასი ათასიც სადავო ციფრია, რადგან არც 2010 და არც 2011 წლის ბიუჯეტში დასუფთავების სამსახურისთვის ამ რაოდენობის თანხა არ არის გამოყოფილი. გასულ წელს, დასუფთავების სამსახურს ოზურგეთის ბიუჯეტიდან 375 ათასი ლარი ჰქონდა გამოყოფილი. 2011 წელს _ 449 ათასი ლარი, რაც სულ 842 000 გამოდის. შესაბამისად, ამ შეკრებილ თანხას პროკურატურის მიერ დასახელებულ მილიონ ასიათასამდე 258 000 ლარი უკლია.
როგორც ჩვენთვის გახდა ცნობილი, გამოძიებას ტაკიძის წინააღმდეგ მხოლოდ ერთი, კურდღელაშვილის აღიარებითი ჩვენება აქვს. კურდღელაშვილი ივლისის დასაწყისში დააკავეს. როგორც გვითხრეს, იგი 80 000 ლარის გადახდის და ტაკიძის წინააღმდეგ აღიარებითი ჩვენების მიცემის სანაცვლოდ, საპროცესო გარიგების საფუძველზე გამოუშვეს. თან პირობა ჩამოართვეს, რომ ჩვენების შესახებ არავისთან არაფერს იტყოდა. ჩვენი წყარო, რომელიც პროკურატურასთან დაახლოებული პირია, ამბობს, რომ დასუფთავების სამსახურის ყოფილ უფროსზე გამოძიებამ სერიოზული ზეწოლა მოახდინა და აღიარებითი ჩვენება რვა დუბლად ჩააწერინეს. კომპეტენტური წყაროს ინფორმაციით, ყველა დუბლი ერთმანეთისგან მკვეთრად განსხვავდება.
წყაროს ინფორმაციით, პროკურატურა კურდღელაშვილზე მისი თანამშრომლის, დავით კოპლატაძის ჩვენებით გავიდა, რომელსაც საპროცესო გარიგება საკმაოდ სოლიდური თანხის და აღიარების სანაცვლოდ გაუკეთეს. გავრცელებული ინფორმაციით, ციხიდან გამოსულმა კოპლატაძემ თავის მოკვლა სცადა, თუმცა, ამ ინფორმაციას მისი და, ხათუნა კოპლატაძე კატეგორიულად უარყოფს და ჭორს უწოდებს. პროკურატურას კოპლატაძის აღიარებითი ჩვენება არ გამოუქვეყნებია და სავარაუდოდ, არც გამოაქვეყნებს, რადგან, როგორც ჩვენი წყარო ამბობს, კოპლატაძის ჩვენებაში ძალიან ბევრი თვალშისაცემი უზუსტობაა.
უზუსტობებია კურდღელაშვილის ჩვენებაშიც. კურდღელაშვილის ჩვენებით, ტაკიძე მას ხელშეკრულების გაფორმების სანაცვლოდ ჰპირდებოდა ლობირებას, რაც კანონთან შეუსაბამოა.
ქრთამის ამღების კვალობაზე, საკმაოდ მოკრძალებულია ტაკიძის ქონებრივი დეკლარაცია. ჩვენ შევძელით მოგვეპოვებინა ინფორმაცია, რომელიც ადასტურებს, რომ გამგებელს რამდენიმე სესხი აქვს აღებული; ერთ-ერთი კი, რამდენიმე თვის წინ, ოპერაციისთვის დასჭირდა.
ტაკიძის თანამშრომლები ამბობენ, რომ კურდღელაშვილის დაკავების შემდეგ გამგებელს არანაირი მღელვარება არ დასტყობია.
გამოძიების მტკიცებით, საქმე 180 000 ლარის მითვისებას ეხება. საუბარია საწვავზე, რომლითაც გამოძიების ვერსიით, ტაკიძე და კურდღელაშვილი ფულს “ათეთრებდნენ”. ოფიციალური ინფორმაციით, ოზურგეთის ტერიტორიაზე 320 ბუნკერი დგას და მას 5 მანქანა და 2 ტრაქტორი ემსახურება. როგორც გვითხრეს, დასუფთავებისთვის თვეში 8500 ლიტრი ბენზინია საჭირო, რაც წელიწადში 102 000 ლიტრი გამოდის. ლიტრი 2 ლარად რომ ვიანგარიშოთ, გამოვა, რომ ოზურგეთის დასუფთავებისთვის წელიწადში 204 ათასი ლარი იყო საჭირო. ეს თანხა ორ წელზე გამრავლებით 408 000 ლარი გამოდის. ამას მინუს სადაო 180 000 ლარი, დარჩა 228 000. ეს თანხა თვეებზე განაწილებული გამოვა 9500 ლარი, რომლითაც 4750 ლიტრი საწვავის ყიდვა იქნებოდა შესაძლებელი, რაც თვის განმავლობაში, ოზურგეთის დასუფთავებას არანაირად არ ეყოფოდა და ასეთ შემთხვევაში, ნაგავი გაუტანელი დარჩებოდა, რაც მოსახლეობისთვის შეუმჩნეველი არ იქნებოდა.
“გურია ნიუსმა” ერთგვარი ექსპერიმენტი ჩაატარა. ოზურგეთის მუნიციპალიტეტის საკრებულოდან, საკრებულოს ბეჭდიანი, ერთ-ერთი ბენზინგასამართი სადგურის 10-ლიტრიანი საწვავის ტალონი ითხოვა. ეს ტალონი ბენზინგასამართ სადგურზე მიიტანა და გაყიდვა ითხოვა. აღმოჩნდა, რომ ეს შესაძლებელი იყო, ოღონდ იმ შემთხვევაში, თუკი გადამხურდავებელს აღნიშნულ ათ ლიტრ საწვავზე 3 ლარს დავუტოვებდით. არაოფიციალურ საუბრებში, ბენზინგასამართი სადგურის თანამშრომლებმა გვითხრეს, რომ ასეთი შემთხვევები ხშირია და ტალონებს, უმეტეს შემთხვევაში, თანამდებობის პირები ყიდიან. ის ადამიანები, რომლებსაც საწვავი ჩვენ მიერ შევსებული ბიუჯეტიდან ეძლევათ მხოლოდ და მხოლოდ საქმის გასაკეთებლად.
ბენზინგასამართი სადგურის თანამშრომლების თქმით, დღეში მხოლოდ რამდენიმე ათეული ლიტრი საწვავის ტალონის გაყიდვაა შესაძლებელი, რადგან სხვა შემთხვევაში, “დამწვარი პონტია”. მათივე თქმით, გამორიცხულია, გურიაში ერთი სამსახურის ბეჭდიანი 5 000 ლიტრი საწვავის ტალონი ბენზინგასამართ სადგურზე კორუფციული სქემით გაიყიდოს, რადგან ეს ძალიან დიდი ციფრია.
წყაროს თქმით, გამოძიება სწორედ ამ საკითხზე მუშაობს. თუმცა, ჯერჯერობით უცნობია, მხოლოდ ტაკიძეზე გადატყდება ეს ჯოხი თუ გამოძიება იმ ჩინოვნიკებითაც დაინტერესდება, რომლებსაც 200, 300, 500 და 700 ლიტრი საწვავი ყოველთვიურად ეძლევათ.
ტაკიძის ოჯახის წევრები პრესასთან კომენტარებს არ აკეთებენ. როგორც ამბობენ, გამოძიების და ხელისუფლების მოთხოვნის შესაბამისად, ეს მათ თავად ეჭვმიტანილმა სთხოვა. არსებული ინფორმაციით, ტაკიძის მეუღლე, ქეთევან სეფერთელაძე სამსახურიდან დაითხოვეს, თუმცა გურიის სამხარეო პოლიციის მთავარი სამმართველოს უფროსი, გიგა ჯაფარიძე ამ ინფორმაციას უარყოფს.
უცნობია, რატომ თქვა ტაკიძის დაცვაზე უარი, გამოცდილმა ადვოკატმა, ექსპერტ ბუღალტერმა, აკადემიკოსმა ჯუმბერ მახარაძემ. ჩვენ მიერ მოპოვებული ინფორმაციით, 6 აგვისტოს, მას შემდეგ, რაც ადვოკატმა ტაკიძის დაცვაზე უარი განაცხადა, ტაკიძე დაკითხვის ოთახში ხელახლა შეიყვანეს და მას რამდენიმე საათის განმავლობაში ჰკითხავდნენ. როგორც ჩვენი წყარო ამბობს, ახალნაოპერაციები ტაკიძის ჯანმრთელობის მდგომარეობა არც თუ სახარბიელოა, თუმცა, ამ დრომდე პატიმარი საავადმყოფოში არ გადაუყვანიათ.
წყაროს ცნობით, დაკავებულ ტაკიძეს მესამე დღეს მეუღლე შეახვედრეს. წესით და კანონით, 3 დღის დაკავებულ პატიმარს არავის ახვედრებენ, თუმცა, როგორც ჩანს, ტაკიძისთვის გამონაკლისი დაუშვეს. როგორც ჩვენი წყარო ამბობს, ეს გამონაკლისი გამოძიების ინტერესებშია, რადგან მათი მეთოდები მსგავსს “გამონაკლისებს” ითვალისწინებს. წყაროს თქმით, მეუღლესთან შეხვედრის შემდეგ გამომძიებლები, მოდულის შენობაში ტაკიძეს რამდენიმე საათის განმავლობაში უმეორებდნენ, რომ მას გარეთ შესანიშნავი ოჯახი ელოდება და თუ ჩუმად იქნება, ოჯახს 15 წელს ვერ ნახავს.
