“ქართული ოცნება” შიშის და ჩურჩულის გარეშე _ ბერა ივანიშვილის კლიპი

ბერა ივანიშვილის ახალი კლიპი “ქართული ოცნება” ინტერნეტსივრცეში 14 ოქტომბერს, 9 საათსა და 44 წუთზე გავრცელდა.

კლიპის ინტერნეტპრეზენტაციამდე რამდენიმე საათით ადრე, ბერამ ფეისბუქში, საკუთარ კედელზე ანონსი გააკეთა: “ქართული ოცნება” _ დღეს, საღამოს 8 საათზე!!! ყველასთვის გასაგები მიზეზების გამო ეს კლიპი ტელევიზიით არ გავა. მხოლოდ თქვენთვის, მხოლოდ ამ გვერდზე! ჩვენ ერთი დიდი ოჯახი ვართ და ერთმანეთს ვაძლიერებთ. შიშის და ჩურჩულის დრო დამთავრდა… _ ასე დააანონსა ბერა ივანიშვილმა საკუთარი კლიპი.

კლიპის ლოდინში ბერას ოფიციალური გვერდის ლაიქერების რაოდენობა თითქმის 1000 ადამიანით გაიზარდა და 145 000 გადააჭარბა.

გავრცელებული ინფორმაციით, პრეზენტაციის დაგვიანების მიზეზი ტექნიკური ხარვეზები გახდა.

_ ბოდიშით დაგვიანებისთვის. ყველა მედია საშუალებამ უარი თქვა ამ კლიპის გაშვებაზე, მხოლოდ youtube-ზე შევძელით მისი ატვირთვა. ქართული ოცნება!!! გაუზიარეთ ყველას!!!” _ ასეთი პროლოგი დაურთო  ბერამ ფეისბუქზე ახალ კლიპს. მომღერალს არ დაუკონკრეტებია, რომელმა მედია საშუალებებმა თქვეს უარი კლიპის პრეზენტაციაზე.

რაც შეეხება თავად კლიპს, ბერამ იგი მამის პოლიტიკაში მოსვლას მიუძღვნა. გამოქვეყნებიდან  15 წუთში კლიპს 400-ზე მეტმა ადამიანმა გაუკეთა კომენტარი. უმრავლესობამ ბერას სათქმელის შემოქმედებაში გამოხატვა დადებითად შეაფასა, ნაწილმა  პოლიტიკიდან შორს ყოფნა ურჩია, უმცირესობამ კი აღნიშნა, რომ  “დიდი ვერაფერი”.

“ქართული ოცნების” ყველა კადრი თბილისშია გადაღებული და მასში ახალგაზრდები მონაწილეობენ, რომლებსაც შავი მაისურები აცვიათ წარწერით _ “ქართული ოცნება”.

“ვერ წამართვი მიწა, ვერ წამართვი ღირსება, სანამ ვარ ქართველი, საქართველო იქნება, გპირდები ეს ყველაფერი მორჩება, როგორ გავჩერდე მთელი თაობა მომყვება,” _ ეს სიმღერის ფრაგმენტებია, რომელიც ფეისბუქზე უკვე პოსტებად გამოჩნდა.

“მე მესმის ქართულად, მიყვარს ქართულად, გრძნობებს განვიცდი ქართულად. მომავალი ჩვენია, ავიხდინოთ ქართული ოცნება” _ ასე ასრულებს ბერა თავის სიმღერას.

აღსანიშნავია რომ კლიპის ინტერნეტში გამოჩენიდან რამდენიმე წუთში, ასობით ქართველმა ისეთი მაისურის შეძენის სურვილი გამოთქვა, როგორიც ბერას კლიპში ახალგაზრდებს აცვიათ.

ჩვენი ინფორმაციით, ფრაზა _ ავიხდინოთ ქართული ოცნება” ბიძინა ივანიშვილის ერთ-ერთი საარჩევნო მესიჯი გახდება.