(გურია ნიუსი) _ რამდენიმე დღის წინ, “გურია ნიუსის” რედაქციამ ჩოხატაურის მუნიციპალიტეტის გამგეობიდან ორი პრესრელიზი მიიღო. ერთში საუბარი იყო პრეზიდენტის ბახმაროში ვიზიტზე, მეორეში კი მოკლედ იყო მოთხრობილი გასულ კვირაში გამგებლის ლელა იმედაშვილის მიერ გახორციელებული აქტივობების შესახებ.
სანამ მედიასთან ამგვარი ურთიერთობის შესახებ ჩვენს მოსაზრებას გაგაცნობდეთ, გთავაზობთ პრესრელიზს, რომელიც ბახმაროში ხელისუფლების ვიზიტს ეხება, ხოლო მეორე პრესრელიზი იმდენად მოკლე და ზოგადია, ვფიქრობთ, მისი მკითხველისთვის ასე მშრალად მოწოდებას არავითარი აზრი არ აქვს.
ბახმარო ევროპული დონის მთის კურორტი იქნება
როგორ უნდა მიიზიდოს ბახმარომ ქართველი და უცხოელი დამსვენებელი, რა მდგომარეობაა ბახმაროში ამ დროისთვის და რა უნდა გაკეთდეს სამომავლოდ, რომ კურორტზე ასვლა ტურისტებს არა მარტო ზაფხულში, არამედ ზამთრის სეზონზეც შეეძლოთ? ამის გასარკვევად, საქართველოს პრეზიდენტი მიხეილ სააკაშვილი, ეკონომიკისა და რეგიონალური განვითარების მინისტრებთან ერთა, ბახმაროს ეწვია და კურორტის განვითარების გეგმით დაინტერესდა. პრეზიდენტმა მინისტრებისგან კურორტის შესახებ ინფორმაცია ადგილზე მოისმინა.
მიხეილ სააკაშვილი იმ ავსტრიელი სპეციალისტების მიერ გაკეთებული დასკვნითაც დაინტერესდა, რომელიც უცხოელმა ექსპერტებმა 2008 წელს ბახმაროში ყოფნის დროს დადეს.
ბახმაროს ევროპულ კურორტად გარდაქმნის პერსპექტივა ასეთია: საზაფხულო კურორტი ბახმარო მალე უკვე ზამთრის კურორტის ფუნქციასაც შეითავსებს. დაიწყება სამთო-სათხილამურო ტრასის პროექტზე მუშაობა. კურორტი ინფრასრტუქტურულად და ტურისტული მიმართულებით განვითარდება და უახლოეს მომავალში ბახმაროში ჩამოსული ტურისტების რაოდენობა გაორმაგდება, რაც საბოლოო ჯამში გააუმჯობესებს არა მარტო ჩოხატაურის, არამედ რეგიონის სოციალურ და ეკონომიკურ მდგომარეობას.
კურორტზე თავდაპირველად შიდა გზები და კანალიზაცია მოწესრიგდება. მთლიანად მოგვარდება წყლის პრობლემაც. აშენდება დასასვენებელი კომპლექსები. სულ მალე, ბახმარო დამსვენებლებს განახლებული ინფრასტრუქტურით უმასპინძლებს.
საქართველოს პრეზიდენტმა მინისტრებს პირველი კონკრეტული დავალებები მისცა:
_ დაიწყება მუშაობა შიდა ინფრასტრუქტურის მოწესრიგებაზე: წყალი, კანალიზაცია. ამაზე გეგმა გაკეთდება და ქვეყნის ინფრასრტუქრურული პროექტების საერთო გეგმებში შევა;
_ წელსვე აუცილებლად დაიდგმება ქარის მიმართულების შემსწავლელი აპარატები, რომ ზუსტად იყოს ცნობილი, რომელია ქარიანი ადგილი, რაც ზამთრის კურორტისთვის ძალიან მნიშვნელოვანია;
_ გაკეთდება კურორტის განვითარების გენერალური გეგმა, სად უნდა აშენდეს სასტუმროები, სპა-კომპლექსები. მოხდება პერსპექტიული ინვესტორების ჯგუფის მოძიება და გაზაფხულზე უკვე დაიწყება პირველი სასტუმროების მშენებლობა.
რამაზ ნიკოლაიშვილი, საქართველოს რეგიონული განვითარებისა და ინფრასტრუქტურის მინისტრი: _ ჩვენ ვმუშაობთ ბახმაროს განვითარების გენერალურ გეგმაზე, ეს რთული და ხანგრძლივი პროცესია. პარალელურად დავიწყებთ აღდგენით სამუშაოებს. პირველ რიგში, თავისთავად მნიშვნელოვანია ინფრასტრუქტურა, ვმუშაობთ გზაზე, რომლის დიდი ნაწილი აშენებულია და დავასრულებთ მომდევნო წლისათვის. ასევე, ვმუშაობთ წყლის საკითხის დალაგებაზე და თავისთავად ელექტროფიკაცია. ამ კომუნიკაციებს, ვვარაუდობთ, რომ მომდევნო წლისთვის უკვე დავასრულებთ.
ვერა ქობალია, ეკონომიკისა და მდგრადი განვითარების მინისტრი: _ ბახმარო არის ერთ-ერთი ყველაზე ცნობილი და საინტერესო დასასვენებელი ადგილი საქართველოში, მაგრამ მნიშვნელოვანია ინფრასტრუქტურულად გაუმჯობესდეს, რომ შემოვიყვანოთ წყალი, ელექტროენერგია, ავაშენოთ ტურისტული კომპლექსები და მივცეთ საშუალება აქ ადგილობრივ და არამარტო ადგილობრივ მოსახლეობას, ტურისტებს, დამსვენებლებს, უფრო კომფორტულად დაისვენონ და გაატარონ დრო.
მაია სიდამონიძე, ტურიზმის დეპარტამენტის თავმჯდომარე: _ ბახმაროს აქვს უზარმაზარი პოტენციალი, რომ სამომავლოდ აქ მრავალი სახის ტურისტული პროდუქტი განვითარდეს და ჩამოყალიბდეს, როგორც ეკოტურიზმში, ასევე სათავგადასავლო და სამკურნალო ტურიზმში. ამჯერად, იგი ძირითადად არის დატვირთული ზაფხულის სეზონის განმავლობაში, შესაძლებელია მისი ზამთრის კურორტად გარდაქმნა.
ვალერიან ჩიტაიშვილი, გურიის გუბერნატორი: _ ბახმაროს განვითარება შეუქცევადი პროცესია და ამ მიმართულებით პირველი კონკრეტული დავალებები უკვე გაცემულია. იგი უახლოეს მომავალში ჩამოყალიბდება ერთ-ერთ მაღალგანვითარებულ კურორტად, სადაც ტურიზმის ყველა მიმართულების ამოქმედების საშუალება გაჩნდება. პროექტის გახორციელებაში აქტიურად არის ჩაბმული რეგიონული განვითარებისა და ინფრასტრუქტურის, ეკონომიკისა და მდგრადი განვითარების სამინისტროები, ტურიზმის ეროვნული სააგენტო, გურიის სამხარეო ადმინისტრაცია და ჩოხატაურის მუნიციპალიტეტი. მომზადებულია ბახმაროს რეკრეაციული ზონის მიწათსარგებლობის გეგმა, რომელიც კურორტის განვითარების გეგმის ერთ-ერთი შემადგენელი ნაწილია. საბოლოოდ დაზუსტებულ გეგმას ეკონომიკისა და მდგრადი განვითარების სამინისტრო უახლოეს დღეებში წარუდგენს საქართველოს მთავრობას. ბახმარო, მთელი თავისი ინფრასტრუქტურით, ხელს შეუწყობს ადამიანთა მასობრივად დასაქმებას, ინვესტორებისა და ტურისტების მოზიდვას, მომსახურების დარგების განვითარებას.
ჩოხატაურის მუნიციპალიტეტის გამგეობის პრესსამსახური
როგორც ხედავთ, ჩოხატაურის მუნიციპალიტეტის ახლადდანიშნულმა გამგებელმა ლელა იმედაშვილმა მედიასთან ურთიერთობის “თავისებური” მეთოდი შემოგვთავაზა _ იგი, კვირაში ერთხელ, პრესრელიზის სახით მოგვაწვდის, თუ რა სახის საქმიანობები განახორციელა გამგეობამ გასულ პერიოდში. რასაკვირველია, ამ პრესრელიზებში მოცემული იქნება თავად ადგილობრივი ხელისუფლების დამოკიდებულება ამა თუ იმ მოვლენის მიმართ.
ასეთი მიდგომა, ალბათ, გამართლებული იქნებოდა იმ მედიასაშუალებებთან ურთიერთობის დროს, რომლებსაც თავად ხელისუფლება გამოსცემს და არა დამოუკიდებელ მედიასთან. ამიტომ, ჩვენი აზრით, უფრო მისაღებია, თუ ხელისუფლების აქტივობებს დაესწრება დამოუკიდებელი მედიის ჟურნალისტი, ობიექტურად გააშუქებს მიმდინარე მოვლენებს და დასვამს კითხვებს, რომელიც ვითარებიდან გამომდინარე გაუჩნდება. წინააღმდეგ შემთხვევაში, ხელისუფლების მიერ მოწოდებულ პრესრელიზებში, თავად ხელისუფლება საკუთარი საქმიანობების შესახებ კრიტიკული ვერ იქნება და ყოველთვის ეცდება, ეს საქმიანობები წარმატებულად წარმოაჩინოს, რისი გაზეთში გამოქვეყნებასაც სარეკლამო ხასიათი ექნება.
ჩვენ სხვადასხვა პარტიებისგანაც უამრავი პრესრელიზები მოგვდის, სადაც ისინი თავიანთი მოღვაწეობის პოპულარიზაციას ეწევიან. თუ კი ჩვენ სახელისუფლებო ორგანოებს დავუთმობთ ფართს, მაშინ რატომ უნდა ვუთხრათ უარი მსგავს მომსახურებაზე სხვებს და ჩავაყენოთ ისინი დისკრიმინაციულ მდგომარეობაში?
რაც შეეხება კონკრეტულ, ზემოთ მოყვანილ პრესრელიზს, რომლის მიხედვითაც ბახმარო მალე თანამედროვე, მიმზიდველ და ფეშენებლურ კურორტად გადაიქცევა, ვიტყვით, რომ ჩვენ, ამ სამომავლო გეგმას, რასაკვირველია, მივესალმებით, მაგრამ აღვნიშნავთ _ ბახმაროში შეხვედრას რომ დამოუკიდებელი ჟურნალისტი დასწრებოდა, იგი აუცილებლად დასვამდა შემდეგ კითხვებს:
_ რაში იხარჯება წლების განმავლობაში ბიუჯეტიდან ბახმაროს კეთილმოწყობისთვის გამოყოფილი თანხები, როცა კურორტს კეთილმოწყობისა არაფერი ეტყობა?
_ როდის მოგვარდება აქილევსის ქუსლად ქცეული წყლის პრობლემა?
_ რატომ ახდევინებენ დამსვენებლებს შუქის გაუგებარ და დაუსაბუთებელ სოლიდურ გადასახადს უცნობი პირები ყოველგვარი საბუთის გამოწერის გარეშე და სად მიდის ეს ფული?
_ რატომაა დღემდე გასაიდუმლოებული განაშენიანების გეგმა?
მსგავსი კითხვების სია შეიძლება კიდევ გაგრძელდეს, მაგრამ პასუხგაუცემელია მთავარი კითხვა _ რა ბედის ელის ბახმაროს ფეშენკურორტად ქცევის შემთხვევაში იმ მოქალაქეებს, რომლებსაც ათეული წელია იქ სახლები უდგათ? როგორც ჩვენი წყარო ამტკიცებს, ბახმაროში მიწების ჩამორთმევის პროცესი გაგრძელდება და იგი უფრო მწვავე ხასიათს მიიღებს _ მიწებს ჩამოართმევენ ან “საკუთარი ნებით” ჩააბარებინებენ ყველას, რომელთა სახლებიც ინვესტორს ხელს შეუშლის ინვესტიციის გახორციელებაში. მსგავსი პრეცედენტი ხელისუფლებისთვის უცხო არაა _ ორი წლის წინანდელი “ბახმაროს საკნდალის” გარდა, ხელისუფლებამ ყოველგვარი კომპენსაციის გარეშე ჩამოართვა მიწები გონიოს 300-ზე მეტ მცხოვრებს, რომელთაც საკუთრების დამადასტურებელი მოწმობა ვარშალომიძემ საკუთარი ხელით გადასცა; ანალოგიური მდგომარეობაა საირმეში, სვანეთშიც, სადაც მესტიელთა აბსოლუტური უმრავლესობა საძოვრის გარეშე დარჩა.
ასე რომ, კიდევ ერთხელ ვიმეორებთ _ პრესასთან მხოლოდ პრესრელიზებით ურთიერთობის ფორმა “გურია ნიუსისთვის” მისაღები არაა. უმჯობესი იქნება, გამგებელმა ხელისუფლების მიერ ჩატარებულ ღონისძიებებზე ჟურნალისტი მიიწვიოს და ჩვენც ჩვენი თვალით დანახულს და ჩვენი ყურით გაგონილს ობიექტურად მივაწვდით მკითხველს, ხოლო “გურია ნიუსის” ობიექტურობასა და პროფესიონალიზმში, ვფიქრობთ, რომ ქალბატონ ლელას ეჭვი არ ეპარება!
ასე რომ, ჩვენ ლელა იმედაშვილს ურთიერთობის მსოფლიოში აპრობირებულ და ყველა დემოკრატიული ხელისუფლებისთვის მისაღებ ფორმას ვთავაზობთ. მიიღებს თუ არა იგი ამ შეთავაზებას, მისი გადასაწყვეტია!
