“ცვლილებები კანონის სრული დაცვით მოხდება”

ლელა იმედაშვილი ჩოხატაურის მუნიციპალიტეტის გამგებლის პოსტზე, ერთ თვეზე მეტია, რაც დაინიშნა და უკვე კონკრეტული საკადრო ცვლილებებიც გახორციელდა, რამდენიმე ცვლილებას უახლოეს დღეებში ელიან. გამგებელთან საუბარიც ამ თემით დავიწყეთ.

_ ქალბატონო ლელა, მოსვლის დღიდანვე აღნიშნეთ, რომ გამგეობაში საკადრო ცვლილებები გახორციელდებოდა. აპირებთ თუ არა კონკურსების გამოცხადებას, თუ როგორც ხელისუფლების სტილია, მოვალეობის შემსრულებელს დანიშნავთ, რასაც კონკურსის გამოცხადება არ სჭირდება, სამაგიეროდ, ეს “მოვალეობის შემსრულებელი” მანამდე იქნება, სანამ ხელისუფლებას დასჭირდება.

_ ცვლილებები საჭიროების მიხედვით, კანონის სრული დაცვით მოხდება.

_ ერთ-ერთი სამსახურის უფროსი, ზაალ ბერძენიშვილი უკვე გაათავისუფლეთ. რა გახდა მისი გათავისუფლების რეალური მიზეზი?

_ პირადი განცხადება (ზაალ ბერძენიშვილი ამ თემაზე ამ დრომდე არ აკეთებს კომენტარებს, თუმცა, როგორც ამბობენ, მისი თანამდებობა კონკრეტულ მშენებლობას შეეწირა, რომლის შესახებ მასალას ჩვენ უახლოეს ხანში შემოგთავაზებთ. ავტ.)

_ არსებული ინფორმაციით, ჩოხატაურის გამგეობაში თანამშრომელთა გადანაცვლებები მოხდება. როგორც ჩვენი წყარო ამბობს, კადრები ერთმანეთს ადგილს გაუცვლიან და ახალი სახეების ხილვის დაპირება დაპირებად დარჩება.

_ საკადრო ცვლილებები ჩემი თვითმიზანი არ არის და ეს მე მოსვლისთანავე აღვნიშნე. თუმცა, საჭიროების მიხედვით, მოსვლიდან ერთ თვეში, იურიდიულ და ზედამხედველობის სამსახურებს ახალი ხელმძღვანელები ჰყავთ, ქონების სამსახურში ერთი ახალი კადრი შემოგვემატა, ერთი კომპიუტერული სპეციალისტი ავიყვანეთ. თუმცა, არც ადამიანთა გადაჯგუფებაა ურიგო და ამაზეც ვიფიქრებ.

_ ჩვენი ინფორმაციით, მალე მუზეუმების გაერთიანების დირექტორს, ნათია კალანდაძეს გაათავისუფლებთ და მის ადგილზე მუზეუმის თანამშრომელს, თეა ბაიაჯანს დანიშნავთ. გვითხრეს ისიც, რომ კულტურის სამსახურის უფროსად მუსიკალური სკოლის დირექტორი, ქეთევან გიორგაძის დანიშვნა გსურთ, ხოლო დოდო მამალაძეს მუსიკალურ სკოლაში გადაიყვანთ…

_ ცვლილებები გაგრძელდება ჩოხატაურში არსებული ადამიანური რესურსების მაქსიმალური გამოყენებით.

_ ქალბატონო ლელა, რამდენიმე დღის წინ, თანამშრომლებთან ერთად ასუფთავებდით ჩოხატაურის ქუჩებს. საინტერესოა, თუ ქუჩები გამგებელმა და ხალხმა უნდა დაასუფთავოს, რაში გვჭირდება დასუფთავების სამსახური? თუ გამგებლის მიერ ქუჩების დასუფთავება პიარია, ხალხისთვის თავის მოწონება და მეტი არაფერი?

_ ეს გახლდათ დასუფთავების აქცია, რომელშიც გამგეობის ყველა თანამშრომელი მონაწილეობდა. გამგებელი, ვფიქრობ, თავად უნდა იყოს მაგალითის და არა მხოლოდ დირექტივების მიმცემი. მსგავსი ტიპის აქციებს ხშირად ნახავთ ჩოხატაურში და საქმე საქმისთვის თუ პიარისთვის _ ამაზე მერე ვისაუბროთ. იმ დღეს დაბის ერთი პატარა ნაწილი, ვფიქრობ, იმ ადამიანებმა დაასუფთავეს, რომლებიც აქაურობის გულშემატკივრები არიან.

_ დღეს საქართველოში პირველი თოვლი მოვიდა (საუბარი ჩაწერილია 7 ნოემბერს). რამდენად მზად არის ჩოხატაურის მუნიციპალიტეტი ზამთრისთვის? გასულ წელს ტექნიკის დროულად მობილიზაცია ვერ მოხდა და ამის გამო ბევრ სოფელს პრობლემა შეექმნა.

_ ზამთრის სეზონისთვის ჩოხატაურის მუნიციპალიტეტი მზად არის და ვიმედოვნებ, არანაირი დაბრკოლება არ შეგვექმნება.

_ სოფელ შუაფარცხმის წყალსადენზე მინდა გკითხოთ. უხარისხოდ გაკეთებული მილებიდან რამდენიმე დღეა, წყალი გამოდის და როგორც სოფლის მოსახლეობა ამბობს, სასაფლაო და მიმდებარე ტერიტორიაზე მცხოვრებთა ეზოები იტბორება. იქვე თქვენი მოადგილეც ცხოვრობს. რატომ ვერ ხერხდება ამ პრობლემის მოგვარება?

_ ფარცხმის წყალსადენის რეაბილიტაციის მესამე ეტაპის სამუშაოებისთვის ინფრასტრუქტურული პროექტებიდან გამოცხადებულია ტენდერი. პროექტმა გაიარა ლევან სამხარაულის სახელობის სასამართლო ექსპერტიზის ეროვნული ბიუროს ექსპერტიზა და სამუშაოები მალე დაიწყება.

_ ქალბატონო ლელა, პრეზიდენტის განცხადების თანახმად, იმ გლეხებს, რომლებმაც ჰიბრიდული სიმინდი დათესეს, მაგრამ არ ამოვიდა, ზარალი აუნაზღაურდებათ. თუ იცით, რამდენი ადამიანს აუნაზღაურდება ზარალი ჩოხატაურში და როგორი ფორმით მოხდება ეს _ მხოლოდ თესლის საფასური ჩამოეწერებათ თუ რეალური ზარალის საფასურს მიიღებენ?

_ ამაზე ზუსტი პასუხი ამ ეტაპზე არ მაქვს, დეტალები მოგვიანებით გახდება ცნობილი და ჩვენ ამას საჯაროს გავხდით.