გურიის გუბერნატორის, ვალერი ჩიტაიშვილის თქმით, თოვლს პრობლემები არც ერთ მუნიციპალიტეტში არ შეუქმნია: _ ახლა ლანჩხუთში ვიმყოფები (საუბარი ჩაწერილია 12 ნოემბერს). ნაადრევად მოსული თოვლის გამო პრობლემები არ შექმნილა _ არც აქ, არც ოზურგეთში და არც ჩოხატაურში. პირადად ვესაუბრე გამგებლებს და ვიცი, რომ ყველგან მობილიზებულები არიან. დიდი თოვლიც რომ მოვიდეს, პრობლემები არ შეიქმნება და გზები არ ჩაიკეტება, _ აღნიშნა “გურია ნიუსთან” საუბრისას ჩიტაიშვილმა
“გზამშენი 18”-ის დირექტორის მოვალეობის შემსრულებლის, ვახტანგ ჭანტურიას განმარტებით, მათი ზედამხედველობის ქვეშ მყოფი გზები (ცენტრალური გზები) გაწმენდილია და პრობლემებიც გამორიცხულია. ჭანტურიას თქმით, ჩოხატაური-ბახმაროს გზა ჩხაკაურამდე გაწმენდილია.
_ გუშინ (საუბარი ჩაწერილია 12 ნოემბერს) დავასრულეთ ჩოხატაური-ბახმაროს გზის გაწმენდა. რამდენიმე მეტრი გვაქვს დარჩენილი უშუალოდ კურორტამდე. ბახმაროში დაახლოებით 1 მეტრი თოვლია, რომელსაც გუშინდელი დანათოვარი დაემატებოდა. როგორც ვიცით, ორშაბათიდან გამოიდარებს და გზას ბოლომდე გავწმენდთ. კურორტზე დასაწყებ სამუშაოებს პრობლემები არ შეექმნება.
_ რომ არ გამოიდაროს და ბახმაროში თოვლის საფარმა 3 მეტრს მიაღწიოს, გაქვთ იმის ტექნიკური საშუალება რომ გზები გაწმინდოთ?
_ ამხელა თოვლი თუ მოვიდა, ტექნიკურად ვერ მოვახერხებთ.
_ გამოდის, რომ ბახმაროში ნაციონალური მედიასაშულებებით გაპიარებული ძვირად ღირებული დანადგარები ვერ დაიდგმება და პრეზიდენტის განცხადება თუ დაპირება ტელეეთერის არქივს შემორჩება?
_ არა, ეგ გამორიცხულია. დეკემბრის ბოლოს, იანვარში მოდის ბახმაროში დიდი თოვლი. მაგ დრომდე კი დიდი დროა…
_ ნოემბრის დასაწყისშიც არ მოდის ხოლმე თოვლი, მაგრამ ახლა მოვიდა…
_ როგორც გითხარით, გზა ბახმარომდე თითქმის გაწმენდილია. რაც შეეხება დიდ თოვლს, თუ ასეთი რამ მართლა მოხდა, ძველ თხილამურებს გამოვიყენებთ და დანიშნულების ადგილამდე, რომელიც ჩვენ მიერ გაწმენდილი გზიდან დაახლოებით 500 მეტრშია, უპრობლემოდ მივალთ. დანადგარებს კი, ვერტმფრენით ჩამოიტანენ. თუმცა, ამინდის პროგნოზის მიხედვით ორშაბათიდან გამოიდარებს და ჩვენც გავაგრძელებთ მუშაობს _ დანადგარები ბახმაროში რამდენიმე დღეში უნდა დაიდგას, _ გვითხრა ჭანტურიამ.
გუბერნატორისგან განსხვავებით, “ენერგო პრო ჯორჯიას” ჩოხატაურის სერვისცენტრის ხელმძღვანელის, სერგო გეგეშიძის თქმით, თოვლმა მაღალმთიან სოფლებში პრობლემები გამოიწვია: _ თოვლის საფარი მაღალმთიან სოფლებში საკმაოდ დიდი იყო და პრობლემები შექმნა. ბევრგან დენი გამოირთო. დაბაში, გამგეობასთან, ნაძვის ტოტი მოტყდა და შუქი რამდენიმე ხნის განმავლობაში გაითიშა. ახლა (საუბარი ჩაწერილია 12 ნოემბერს) აღდგენილია. ამ წუთებში მუშაობა მიმდინარეობს ბუკნარში, სადაც სერიოზული დაზიანებაა; დენის გარეშეა დარჩენილი ზემოსურები, სადაც წაქცეულმა ხეებმა მაღალი ძაბვის გადამცემი ხაზები დაწყვიტა. დღეს სურებში ასვლას ვერ მოვახერხებთ _ ამ სოფელში დენის აღდგენას ხვალ შევძლებთ, _ გვითხრა გეგეშიძემ.
ჩოხატაურის მუნიციპალიტეტის გამგებლის, ლელა იმედაშვილის თქმით, მუნიციპალიტეტი თოვლს მომზადებული შეხვდა:
_ ჩოხატაურში თოვლის საფარი დიდი არ არის და ჩვენც ყველანაირად მომზადებულები ვართ. დილით (საუბარი ჩაწერილია 12 ნოემბერს) დაბაში გამოირთო დენი, თუმცა, ამ წუთებში პრობლემა აღმოფხვრილია. პრობლემა შეიქმნა მაღალმთიან სოფლებში და ბუკნარშიც, სადაც ამ დრომდე მუშაობენ ენერგოკომპანიის წარმომადგენლები. დენის მიწოდება შეუწყდა ზემო სურებსაც, თუმცა, სოფელს საკუთარი ჰესი აქვს და შესაბამისად, ელექტოენერგიაც ჩართული აქვთ.
_ მოსახლეობამ შეშის მომარაგება ვერ მოასწრო. აქვს თუ არა მუნიციპალიტეტს იმის საშუალება, რომ მოსახლეობას დაეხმაროს?
_ მუნიციპალიტეტი მზადაა დაეხმაროს ყველას, შესაძლებლობის ფარგლებში.
_ კონკრეტულად როგორი სახის იქნება ეს დახმარება? თქვენ თვითონ შეარჩევთ იმ ადამიანებს, რომლებსაც უნდა დაეხმაროთ თუ მომართვის საფუძველზე?
_ საჭიროების მიხედვით _ დაბისა და სოფლის რწმუნებულებთან ვართ მუდმივ კავშირზე და გადაწყვეტილებას მივიღებთ მათი მოთხოვნის მიხედვით. არავის სიცივის გამო საფრთხე არ ექნება.
_ უკვე მოგმართათ ვინმემ?
_ ჯერ არა. ჩვენ, მთელი დღეა, ადრიანი დილიდან, სამსახურში ვართ და მობილიზებული გვყავს ტექნიკა. მზად ვართ დავეხმაროთ ყველას, თუ ამის საჭიროება იქნება, _ აღნიშნა იმედაშვილმა.
