გავრცელებული ინფორმაციით, რეპრესირებულთა ოჯახების საკომპენსაციო თანხა, საშუალოდ, 200-300 ლარს არ აღემატება, მაქსიმუმი კი 500 ლარია. კილაძეების _ რეპრესირებული ოჯახის შვილების მიერ, სტრასბურგის სასამართლოს გადაწყვეტილების შესაბამისად მიღებულმა საკომპენსაციო თანხამ, 4 000 ევრომ, საქართველოში, სხვა რეპრესირებულ ოჯახებსაც გაუჩინა იმედი. გავრცელდა ინფორმაცია, რომ რეპრესირებულთა ოჯახები, მორალური ზიანის საკომპენსაციო თანხას, 10 000 ლარს მიიღებდნენ, მაგრამ იმედი გაუცრუვდათ _ მათ მიაჩნიათ, რომ სახელმწიფომ ისინი მოატყუა.
ამის შესახებ კომენტარი ახალგაზრდა იურისტთა ასოციაციის ოზურგეთის ოფისის ხელმძღვანელს, თამაზ ტრაპაიძეს ვთხოვეთ. სწორედ საია-ს ადვოკატი იცავდა კილაძეების ინტერესს. თამაზ ტრაპაიძე ამბობს, რომ ინფორმაცია კომპენსაციის შემცირებაზე არ შეესაბამება სიმართლეს:
_ ინფორმაცია იმის შესახებ, რომ შემცირდა საკომპენსაციო თანხა, სინამდვილეს არ შეესაბამება. რაც შეეხება კილაძეებს, მათ სტრასბურგის სასამართლომდე, საქართველოში გაიარეს ყველა სასამართლო ინსტანცია. საქართველოს ახალგაზრდა იურისტთა ასოციაცია იცავდა მათ ინტერესებს და სტრასბურგის სასამართლომ დააკმაყოფილა კილაძეებს სარჩელი _ ამ პირებს, ანუ პირველი რიგის მემკვიდრეებს, მიანიჭეს 4000 ევროს ოდენობით საკომპენსაციო თანხა. გარდა ამისა, სტრასბურგის სასამართლომ დაავალდებულა საქართველოს ხელისუფლება, სხვა რეპრესირებულებსაც და პირველი რიგის მემკვიდრეებსაც მიაკუთვნოს საკომპენსაციო თანხა. აქედან გამომდინარე, საქართველოს ხელისუფლებამ ცვლილებები შეიტანა კანონში და ამ ცვლილების შესაბამისად, პირების, რომლებიც იყვნენ რეპრესირებულები და რეპრესირებულების პირველ რიგის მემკვიდრეების კომპენსაციის თანხის ოდენობა უნდა გადაწყვიტოს სასამართლომ. ამდენად აქ მოხდება დიფერენცირება, თუ რა სახის მორალურ ზიანზეა საუბარი. ამაში იგულისხმება, მოხდა თუ არა რეაბილიტაცია და სხვა. სასამართლოზეა დამოკიდებული, თუ რა სახის კომპენსაციას მიანიჭებს რეპრესირებულს.
ამ საკითხზე განსხვავებული აზრი აქვს ერთ-ერთ რეპრესირებულს, რომელმაც ჯერ კიდევ ვერ მოახერხა ყველა დოკუმენტის შეგროვება. იგი მიიჩნევს, რომ კილაძეების მსგავსი რეპრესირებულიც რომ იყოს, საქართველოს ხელისუფლება საკომპენსაციოდ მაინც მიზერულ თანხას გამოუყოფს:
_ 500 ლარზე მეტი ჯერ არავის მიუღია. აბა, ჩვენი ხელისუფლება 4 000 ევროს ექვივალენტს ხომ ვერ გადაგვიხდის? რეპრესირებულები ბევრია საქართველოში. მიუღებელია ჩემთვის ასეთი ტყუილი, მაგრამ ვის მივმართო? ვინ მომცემს მეტს? არადა, დოკუმენტების შეგროვება, სასამართლო პროცესი და ნერვების მოშლა არ ღირს მაგ ფასად. ეს დაცინვაა და მეტი არაფერი. ამით ევროპასთან მოიბანეს პირი, რეპრესირებულებზე ვცემთ კომპენსაციებსო. სხვა არაფერი.
