18 ნოემბერს, ოზურგეთის მუნიციპალიტეტის საკრებულომ რიგგარეშე სხდომა მოიწვია, რომლის დღის წესრიგშიც სამი საკითხი იდგა.
პირველი და უმთავრესი საკითხის _ “ოზურგეთის მუნიციპალიტეტის 2012 წლის ბიუჯეტის დამტკიცების შესახებ” ოზურგეთის მუნიციპალიტეტის საკრებულოს დადგენილების მისაღებად საჯარო ადმინისტრაციული წარმოების დაწყების თაობაზე, _ საკრებულოს თავმჯდომარემ ალეკო მამეშვილმა ისაუბრა. თანამომხსენებელმა ლია ქათამიძემ მომოიხილა ეს პროექტი, _ კერძოდ, ოზურგეთის მუნიციპალიტეტის 2012 წლის ბიუჯეტის პროექტით შემოსავლების მოცულობა განისაზღვრა გრანტების გარეშე 2380. ათასი ლარით. 2011 წლის დამტკიცებულ ბიუჯეტთან შედარებით, შემოსავლები შემცირებულია 33.0 ათასი ლარით.
მეორე საკითხზე, _ “ოზურგეთის მუნიციპალიტეტის 2011 წლის ბიუჯეტის დამტკიცების შესახებ”, საკრებულოს 2010 წლის 29 დეკემბრის #49 დადგენილებაში ცვლილების შეტანის შესახებ”, _ ლია ქათამიძემ და კობა ხაბალაშვილმა ისაუბრეს. ლია ქათამიძემ ყურადღება გაამახვილა გაზრდილ საშემოსავლო ნაწილზე და თქვა, რომ ამ თანხიდან უნდა მოხდეს სახალწლო ნობათის შეძენა უკიდურესად გაჭირვებულთათვის.
დღის წესრიგის მესამე საკითხიც მეორე საკითხის ოდნავ სახესხვაობა იყო და იგივე დადგენილებაში ცვლილებებს შეეხებოდა. ზედამხედველობის სამსახურის უფროსმა შუქრი გარიჩიძემ წამოაყენა წინადადება მუნიციპალიტეტის ტერიტორიაზე, ქარსაფარ თუ გამწვანების ზოლში არსებული უვარგისი და ნახევრად დაზიანებული ხეების მოჭრის თაობაზე, რომელსაც შეშის სახით გაჭირვებულებს დაურიგებენ. კენჭისყრით ეს საკითხიც დადებითად გადაწყვიტეს. სამაგიეროდ კი, ახალი ნარგავები უნდა გააშენონ. დეპუტატებმა არაერთ საკითხზე ისაუბრეს, მათ შორის, ასკანის მაჟორიტარმა ლევან ნინიძემ საკრებულოს სხდომის მონაწილეებს ორიგინალური იდეა შესთავაზა: გავა დრო, ჩვენ აღარ ვიქნებით დეპუტატები და ერთი ბაღი მაინც გავაშენოთ ჩვენი მცირედი სახსრებითო.
ალეკო მამეშვილმა დეპუტატებს აუწყა, რომ 25 ნოემბრამდე აქვთ საშუალება, მოსაზრებები წარუდგინონ გამგეობას.
_ უნდა დავიწყოთ ადმინისტრაციული წარმოება, იქნება ცხარე დებატები, თითოეული აიპ-ის თითოეული თეთრი უკლებლივ უნდა დავიანგარიშოთ, _ თქვა მან.
