ტელეკომპანია “მაესტროს” მაუწყებლობა 30 ნოემბერს დილიდან შეწყდა, რადგან შენობაში დილიდან ეროსი კიწმარიშვილი დაცვასთან ერთად შევიდა და თანამშრომლებს მუშაობის დაწყების საშუალება მისცა.
კიწმარიშვილის განცხადებით, 30 ნოემბერს, დილით, ადრე მივიდა “მაესტროში”, მაგრამ კარი ჩაკეტილი დახვდა, ამის შემდეგ “გამოიყენა თავისი ალპინისტური გამოცდილება და ტელეკომპანიის ეზოში ღობეზე გადაძრომით მოხვდა”.
_ სამი წლის განმავლობაში ტელეკომპანია “მაესტროს” ასაღორძინებლად ოთხმილიონნახევარი დოლარი მოვიზიდე და არხი რეიტინგული გავხადე. უფლება მაქვს, ჩავერიო ტელეკომპანიის მართვაში და, აქედან გამომდინარე, მივიღე გადაწყვეტილება, არხიდან დამეთხოვა “მაესტროს” პროდიუსერი მამუკა ღლონტი, გენერალური დირექტორი ილია კიკაბიძე, აგრეთვე, ლევან ჩიკვაიძე, _ განაცხადა კიწმარიშვილმა და განმარტა, რომ აღნიშნული პირები, რომლებსაც წილები აქვთ ტელეკომპანიაში სამსახურიდან გათავისუფლდნენ, როგორც თანამშრომლები.
კიწმარიშვილის თქმით, მას უნდოდა საეთერო სტუდიაში შესვლა, თუმცა ლევან ჩიკვაიძემ ტელეკომპანიის ყველა კარი ჩაკეტა და გასაღები გადააგდო: _ გუშინ ვაპირებდი მისვლას ტელეკომპანია “მაესტროში”, თუმცა თავი შევიკავე, რადგან საზოგადოებაში დიდი მოლოდინი იყო საღამოს ეთერში ბიძინა ივანიშვილის გადაცემასთან დაკავშირებით. გუშინდელი გადაცემის შემდეგ კი, დილით ადრე მივედი “მაესტროში” და დავიწყე კანონით მონიჭებული უფლებების გახორციელება, _ ამბობს “ქართული პარტიის” ლიდერი, რომელიც “მაესტროს” მმართველი კომპანიის დამფუძნებელია.
მოგვიანებით, ერთ-ერთი დამფუძნებლის მამუკა ღლონტის განცხადებით “მაესტრომ” მაუწყებლობა განაახლა:
_ ეროსი კიწმარიშვილი შემოიჭრა “მაესტროში”, აქ მას დახვდა ჩვენი მორიგე თანამშრომელი, “მაესტროს” ერთ-ერთი დამფუძნებელი, რომელზეც გასცა ბრძანება, რომ ღობიდან გადაეგდოთ. პოლიცია უსმენს მხოლოდ ეროსი კიწმარიშვილს. პოლიციამ არ მოისმინა არც დამფუძნებლების და არც გენერალური დირექტორის განცხადებები. დამფუძნებლების სახელით ვაცხადებ, რომ კონტრაქტი ეროსი კიწმარიშვილის კომპანიასთან შეწყვეტილია. მე ვიმყოფები ჩემს საკუთრებაში და ვახორციელებ იმ უფლება-მოვალეობას, რაც მე მონიჭებული მაქვს. “მაესტრო” ეცდება, გავიდეს ეთერში, _ განაცხადა ღლონტმა “მაესტროს” პირდაპირ ეთერში საუბრისას.
ღლონტის განცხადებით, აქვს საფუძვლიანი ეჭვი, რომ ეს ყველაფერი დაკვეთაა.
დღის მეორე ნახევარში, ტელეკომპანიის ეზოში “გამაგრებულ” კიწმარიშვილს, “მაესტროს” ჟურნალისტების კითხვებზე მოუწია პასუხის გაცემა. ამ საუბრის ჩაწერა “გურია ნიუსმა” შეძლო და სწორედ ამ საუბარში თქვა კიწმარიშვილმა ფრაზა, რომელიც სათაურშია გამოტანილი.
მას საუბარში ისიც თქვა, რომ ამ მოქმედებით ვერავინ ვერაფერს მოიგებს: _ ისინი ვერაფერს ვერ მოიგებენ, ისევ როგორც ვერც მე მოვიგებ თუ ასე გააგრძელებენ. წააგებთ თქვენც, საზოგადოებაც და ყველა.
კიწმარიშვილმა “მაესტროს” ჟურნალისტებთან საუბარი, უფლებადამცველ ნანა კაკაბაძის დანახვისთანავე შეწყვიტა და დაინტერესდა, როგორ მოხვდა ტელევიზიის ეზოში იგი. კაკაბაძეს კიწმარიშვილის მხრიდან მისი იქ ყოფნის გაპროტესტება გაუკვირდა და ამ უკანასკნელს შეახსენა, რომ მისი მოქმედებით ხელისუფლების წისქვილზე ასხამს წყალს.
უფლებადამცველმა ნანა კაკაბაძემ “გურია ნიუსთან” საუბარში განაცხადა, რომ “მაესტროში” განვითარებული მოვლენები ბევრ ეჭვს აჩენს:
_ დღეს, როდესაც იმედის ნიშანწყალი გამოჩნდა, რა ხდება, რა დაპირისპირება აქვს ეროსის და დანარჩენ მმართველ პირებს, არ გვაინტერესებს. საზოგადოების ინტერესებია ყველაზე მთავარი და ის, რომ ამის გათვალისწინება არ ხდება და ხდება ის, რაც უნდა ხელისუფლებას. ბუნებრივია, ეს ჩემში ეჭვებს იწვევს, _ გვითხრა კაკაბაძემ.
“გურია ნიუსის” შეკითხვაზე, ძალაში რჩება თუ არა მისი შეთავაზება ივანიშვილისთვის და ახლა გაყიდის თუ არა “მაესტროს” ერთ ლარად, კიწმარიშვილმა აღნიშნა, რომ ტელევიზიას არ ყიდის.
_ ბატონო ეროსი, თქვენ ხომ თქვით, რომ ივანიშვილს ერთ ლარად მიჰყიდდით “მაესტროს”?
_ ვაძლევდი ერთ ლარად იმ პირობით, რომ მენეჯმენტი, კომპანიის საინვესტიციო ვალდებულებები მრჩებოდა გარკვეულ წილად. ამაზე თქვა მან უარი და ყოველდღე შეთავაზებას არ ვაპირებ. მე შევთავაზე იმავე დღეს, როცა მან თქვა _ ეს ვის დაკარგვია, მე უფრო მაგარი ბიჭი ვარო.
_ ახლა აღარ გაყიდით ლარად?
_ მე “მაესტროს” არ გავყიდი, _ დააზუსტა ჩვენს გაზეთთან საუბრისას კიწმარიშვილმა.
ტელეკომპანიის თანამშრომლების განცხადებით, “მაესტროს” ჩვეულ რეჟიმში მუშაობა ამ სიტუაციაში წარმოუდგენელია. ჟურნალისტები ითხოვენ, რომ კიწმარიშვილმა ტელეკომპანიის ტერიტორია დატოვოს და ჟურნალისტებს მუშაობის საშუალება მისცეს.
