(გურია ნიუსი, ლანჩხუთი) _ სამშაბათს, კახა კუკავამ, რომელიც გურიას სტუმრობდა, გურულ “კონსერვატორთა” ლიდერი, მაკა კვირკველია ადგილობრივი ორგანიზაციის ხელმძღვანელად წარმოგვიდგინა.
კითხვაზე, რატომ არ ჩანს თქვენთან ბიძინა გუჯაბიძე? _ კახა კუკავამ ასე უპასუხა: _ დიახ, ჩვენ აზრთა სხვადასხვაობა გვაქვს და დავშორდით ერთმანეთს. ეს მოხდა 26 მაისის მოვლენების გამო _ მაშინ მათ (კონსერვატორებს გულისხმობს. ავტ.) თქვეს, რომ თუ ხალხს დაარბევდნენ, მოვიდოდნენ რუსთაველზე, მაგრამ არ მოვიდნენ. მაშინ მაკა კვირკველიამ ფეხი მოიტეხა, მე თავი გამიტეხეს… მოკლედ, აზრთა სხვადასხვაობა გვაქვს, თუმცა ამის გამო არ ვლანძღავთ და არ ვაკრიტიკებთ მათ.
_ დიახ, წამოვედი “კონსერვატიული პარტიიდან”. ეს გადაწყვეტილება მივიღე 26 მაისის მოვლენების შემდეგ. ფაქტობრივად, გადაწყვეტილი მქონდა, თუკი ვინმესთან ვიქნებოდი პოლიტიკაში, ეს იქნებოდა კახა კუკავას პოლიტიკური გუნდი, _ გვითხრა კვორკველიამ.
საინტერესოა, რომ კვირკველიას კუკავასთან გადასვლის შესახებ ინფორმაციას “კონსერვატიულ პარტიაში” არ ფლობდნენ და ჩვენგან გაიგეს!
“გურია ნიუსი” “კონსერვატორთა” პოლიტიკურ მდივანს, ლანჩხუთის ექს-მაჟორიტარს ბიძინა გუჯაბიძეს ესაუბრა:
_ ბატონო ბიძინა, გეცოდინებათ, მაკა კვირკველია “თავისუფალ საქართველოში” გადავიდა!
_ არ ვიცი.
_ კი, დღეს კახა კუკავას ადგილობრივი ორგანიზაციის პრეზენტაცია ჰქონდა ლანჩხუთში.
_ ჰო, ეტყობა, მაკა მივიდა ამ შეხვედრაზე, თუ კუკავა იყო ჩამოსული…
_ არა, ბატონო ბიძინა, თავადაც დაგვიდასტურა, რომ თქვენგან კუკავასთან გადავიდა! არ იცოდით?
_ არა, ნამდვილად შენგან გავიგე… გაკვირვებული ვარ.
_ არც ელოდით?
_ არა, რა თქმა უნდა!
_ ორგანიზაციაში ცვლილებებს მოახდენთ, ალბათ!
_ კი, რა თქმა უნდა, ცვლილებები იქნება და მაკა კვირკველიას იმედზე აღარ ვიქნებით, ფაქტია.
_ ბატონო ბიძინა, შეხვედრაზე კახა კუკავამ თქვა, რომ თქვენ დაგშორდათ მას შემდეგ, რაც 26 მაისს აქციაზე არ გახვედით… არადა, როგორც ვიცით, მან მანამდე დაგტოვათ…
_ დიახ, სწორადაც შეგინიშნავთ _ მან 26 მაისამდე თვეებით ადრე დაგვტოვა და არ ვიცი რაში დასჭირდა ამ ტყუილის თქმა. ჩვენ ვთვლიდით, რომ აქციაზე მისვლა არ იყო სწორი და მოვიქეცით ისე, როგორც ჩავთვალეთ საჭიროდ.
მკითხველს გავახსენებთ, რომ კვირკველია, თავიდან სწორედ გუჯაბიძის მაჟორიტარის ბიუროს ხელმძღვანელობდა მას შემდეგ, რაც ამ პოსტზე პოლიტიკაში წასული კახა ასკურავა შეცვალა, დღეს კი ლანჩხუთის საკრებულოს წევრია _ კვირკველია წინა მოწვევის საკრებულოშიც პარტიული სიით მოხვდა; გასული წლის თვითმმართველობის არჩევნებში კი ბლოკის _ “ეროვნული საბჭოს” სახელით იყრიდა კენჭს. მან მაშინ პრაიმერი მოუგო ბლოკში კონკურენტ ლელა ჩახვაძეს (უფრო ზუსტად, კვირკველიას კანდიდატმა გოგი გეგიაძემ მოუგო ჩახვაძის კანდიდატს გია ზენაიშვილს) და სიაში პირველი ნომერი მიიღო, რითაც საბოლოოდ, საკრებულოს მანდატი მოიპოვა. წინა საკრებულოში კვირკველია ფრაქცია “მაჟორიტარებს” ხელმძღვანელობდა; თუმცა, ფრაქცია ჩიბათის მაჟორიტარმა გიორგი ჩახვაძემ დატოვა და ამის გამო დაიშალა კიდეც.
ნაარჩევნებს, ბლოკში არსებული დიდი დაპირისპირების შესახებ გავრცელებული ხმები მაკა კვირკველიამ არ დაადასტურა და განაცხადა: _ მე ვარ იქ, სადაც უნდა ვიყო. ჩემი გუნდისთვის არც მიღალატია და არც ვუღალატებ!
