(გურია ნიუსი, ოზურგეთი) _ არასამთავრობო ორგანიზაცია “ახალგაზრდა პედაგოგთა კავშირთან” არსებული ხანდაზმულთა სახლის პრეზენტაცია, გასული კვირის ხუთშაბათს, ოზურგეთში, კონკრეტულად კი ანასეულში გაიმართა.
პროექტი, რომელიც დააფინანსა იაპონიის საელჩომ საქართველოში, 99 725 ამერიკული დოლარის ღირებულების იყო.
როგორც პრეზენტაციაზე იაპონიის ელჩმა განაცხადა, პროექტის მიზანია მოხუცებულთა მდგომარეობის გაუმჯობესება ოზურგეთში სათნოების სახლის შექმნის გზით.
როგორც პრეზენტაციაზე “ახალგაზრდა პედაგოგთა კავშირის” ხელმძღვანელმა მარინა თოფურიამ აღნიშნა, პროექტის ფარგლებში მოხდა ძველი შენობის რეაბილიტაცია და მისი საჭირო ინვენტარით აღჭურვა. მისი თქმით, ხანდაზმულთა სახლი განკუთვნილია 26 მოხუცისთვის. სახლში ასევე შესაძლებელი იქნება 20 ხანდაზმულზე დღის მომსახურების გახორციელება. სახლი ხანდაზმულებს უზრუნველყოფს შემდეგი სერვისებით: უსაფრთხო და კომფორტული მატერიალურ-ტექნიკური ბაზით; სანიტარულ-ჰიგიენური ნორმების დაცვით; სამჯერადი კვებით; ჯანმრთელობის დაცვით; ფსიქო-სოციალური რეაბილიტაციით (მოემსახურება მულტიდისციპლინური გუნდი, არტთერაპია); მიზნობრივი აქტივობებით ჴ დასვენების აქტივობებით.
აღსანიშნავია, რომ ხანდაზმულთა სახლის ინფრასტრუქტურა პროგრამული ნაწილის დაფინანსებას ელის. ორგანიზაცია იმედოვნებს, რომ საქართველოს შრომის, ჯანმრთელობისა და სოციალური უზრუნველყოფის სამინისტრო უარს არ იტყვის გურიაში ახალი სოციალური პროექტის დაფინანსებაზე.
გურიის გუბერნატორის, ვალერი ჩიტაიშვილის თქმით, მსგავსი ცენტრის გახსნა რეგიონში ძალიან მნიშვნელოვანია და ადგილობრივი ხელისუფლება აუცილებლად მიიღებს მონაწილეობას ცენტრის თანადაფინანსებაში.
