“ჩვენ მომავალი წლის ბიუჯეტი ქამრების მოჭერის ბიუჯეტი გვექნება. არა იმიტომ, რომ კრიზისია, არამედ იმიტომ, რომ გვინდა საქმე ძალიან კარგად გვქონდეს და არა _ საშუალოდ. ეს შეეხება ინფრასტრუქტურული პროექტების დროში გახანგრძლივებას, მიუხედავად იმისა, რომ ეს ისე არავის არ უხარია, როგორც მე. ეს ეხება, ასევე, ასევე მინისტრების მხრიდან ქამრების მოჭერას. სახელმწიფო აპარატში ხელფასებმა, რა თქმა უნდა, უნდა მოიმატოს, მაგრამ არ არის აუცილებელი, რომ მინისტრებმა იფრინონ ბიზნესკლასით _ არაფერი მოუვათ თუ ეკონომკლასით გაფრინდებიან; არ არის საჭირო, რომ იყიდონ ამდენი მანქანები _ არც ერთი მანქანა, გარდა წარმომადგენლობით ოპერატიული აუცილებლობისა, 15 ათასი ევროზე მეტი ღირებულების, არც ერთმა სახელმწიფო აპარატმა არ უნდა შეიძინოს; უნდა დაწესდეს ზედა ზღვარი სახელმწიფო ხარჯებზე. ხარჯები, რაც სახელმწიფოსთვის აუცილებელია და უნდა გვესმოდეს, რომ მინისტრისთვის ამ ისტორიულ დროში თანამდებობაზე ყოფნა საკმარისად დიდი პრივილეგიაა და დიდი მნიშვნელობა არ აქვს, გაიჯგიმება თუ არა ბიზნესკლასის სავარძელში თუ ჩვეულებრივ ხალხთან ერთად დაჯდება არც თუ ისე მდიდარი ქვეყნის ჯერჯერობით არც თუ ისე წამატებული მთავრობის წევრი, რადგან ბოლომდე წარმატებული მთავრობა იქნება მაშინ, როცა ქვეყანა იქნება წარმატებული”, _ ეს განცხადება მიხეილ სააკაშვილმა 2010 წლის 3 სექტემბერს გააკეთა.
ამ განცხადების შემდეგ, საქართველოში “ქამრების შემოჭერის” პროცესი დაიწყო. თუმცა, როგორც ფაქტები ცხადყოფენ “ქამრების მოჭერა” მხოლოდ მოსახლეობას მოუხდა, რადგან ოფიციალური დოკუმენტების თანახმად, მინისტრებმა და სხვა საჯარო მოხელეებმა ქამრები, შემოჭერის ნაცვლად, თითქმის სულ მოიხსნეს. მართალია, პრეზიდენტმა გარკვევით ბრძანა, რომ ჩინოვნიკებმა 15 000 ევროზე მეტი არც ერთ მანქანაში არ უნდა გადაიხადონ, მაგრამ როგორც ჩანს, ეს განცხადება მთავრობის წარმომადგენლებმა ყურად არ იღეს.
მინისტრები კი არა, ძვირადღირებულ ავტომანქანებს ადგილობრივი ჩინოვნიკები თითქმის ყოველ წელს ყიდულობენ. აღსანიშნავია, რომ ადგილობრივი ხელისუფლების მიერ ბოლო ორ წელიწადში შეძენილი თითოეული მანქანის ფასი 25 000 ლარზე ნაკლები არ არის.
რაც შეეხება ხელფასებს, ადგილობრივი ჩინოსნები აქაც გულუხვები არიან საკუთარი თავის მიმართ _ სოლიდურ ხელფასებს პრემიებს უმატებენ და ასე “იჭერენ ქამრებს” იმ ფონზე, როდესაც გურიაში ათობით ოჯახი სიცივისგან იყინება, ასობით ოჯახს პურის ფული არ აქვს და უმრავლესობა სამსახურის ძებნაში ქვეყნის გარეთ არის გადაკარგული.
გურული ჩინოსნების პრემიების, ხელფასების თაობაზე, ასევე ავტომანქანების, ტელეფონების და ძვირდაღირებული ტექნიკის ყოველწლიურ შენაძენზე, ჩვენი გაზეთი ბევრჯერ წერდა. ამჯერად ხელისუფლების უფრო მაღალი რანგის ჩინოვნიკების თვიურ შემოსავალს გაგაცნობთ, რომლის შესახებაც დოკუმენტები “ინფორმაციის თავისუფლების განვითარების ინსტიტუტმა” გამოაქვეყნა.
საქართველოს პრეზიდენტის, მიხეილ სააკაშვილის საშუალო შემოსავალი თვეში 4 720 ლარს შეადგენს; პრემიერ მინისტრის, ნიკა გილაურის _ 10 520 ლარს; 7 797 ლარი აქვს საშუალო თვიური შემოსავალი მთავრობის კანცელარიის უფროსს, დავით კერესელიძეს; სასჯელაღსრულების მინისტრის, ხათუნა კალმახელიძის საშუალო შემოსავალი თვეში 8 292 ლარს შეადგენს; ენერგეტიკის მინისტრის, ალექსანდრე ხეთაგურის _ 7 986 ლარს; ლტოლვილთა და განსახლების მინისტრის, კობა სუბელიანის საშუალო შემოსავალი თვეში 7 774 ლარია; ფინანსთა მინისტრის, დიმიტრი გვინდაძის _ 7 647 ლარი; კულტურის მინისტრი, ნიკოლოზ რურუა თვეში საშუალოდ 7 333 ლარს იღებს; საგარეო საქმეთა მინისტრი, გრიგოლ ვაშაძე _ 7 080 ლარს; სპორტის მინისტრი, ვლადიმერ ვარძელაშვილი _ 6 490 ლარს; შინაგან საქმეთა მინისტრი, ივანე მერაბიშვილი _ 6 221 ლარს; გარემოს დაცვის მინისტრი, გოგა ხაჩიძე _ 5 979 ლარს; განათლების მინისტრი, დიმიტრი შაშკინი _ 5 900 ლარს; თავდაცვის მინისტრი, ბაჩო ახალაია _ 4 779 ლარს; ეკონომიკის მინისტრი, ვერა ქობალია _ 3 553 ლარს; იუსტიციის მინისტრი, ზურაბ ადეიშვილი _ 3 540 ლარს; მინისტრის, ევროატლანტიკურ სტრუქტურებში ინტეგრაციის საკითხებში, გიორგი ბარამიძის საშუალო შემოსავალი თვეში 7 228 ლარია; მისი მოადგილე, ელენე ხოშტარია 5 785 ლარს იღებს; სახელმწიფო მინისტრის, დიასპორის საკითხებში, პაპუნა დავითაიას
საშუალო შემოსავალი თვეში 5 048 ლარს შეადგენს.
იუსტიციის მინისტრის პირველი მოადგილის თინა ბურჯალიანის შემოსავალი თვეში 9 075 ლარია; შინაგან საქმეთა მინისტრის პირველი მოადგილის, ეკატერინე ზღულაძის _ 8 990 ლარი; თავდაცვის მინისტრის მოადგილის, ნოდარ ხარშილაძის _ 8 962 ლარი; ფინანსთა მინისტრის მოადგილე გიორგი კერვალიშვილი თვეში 7 652 ლარს იღებს; ფინანსთა მინისტრის პირველი მოადგილე, პაპუნა პეტრიაშვილი _ 7 621 ლარს; იუსტიციის მინისტრის მოადგილე, გიორგი ვაშაძე _ 7 575 ლარს; სასჯელაღსრულების მინისტრის პირველი მოადგილე პაატა სულაბერიძე _ 7 030 ლარს; ლტოლვილთა და განსახლების მინისტრის პირველი მოადგილე თამარ მარტიაშვილი _ 6 138 ლარს; საგარეო საქმეთა მინისტრის მოადგილე ნინო კალანდაძე _ 5 543 ლარს; განათლების მინისტრის მოადგილე, ირინე ქურდაძე ჴ 5 426 ლარს; რეგიონალური განვითარების მინისტრის პირველი მოადგილე, ჯამბულ ბაკურაძე _ 5 336 ლარს.
პარლამენტის თავმჯდომარის, დავით ბაქრაძის თვიურის საშუალო შემოსავალი 7 653 ლარია; პარლამენტის თავმჯდომარის მოადგილის, გიგი წერეთლის _ 7 218 ლარი; პარლამენტის თავმჯდომარის პირველი მოადგილის, მიხეილ მაჭავარიანის _ 6 598; პარლამენტის თავმჯდომარის მოადგილის, ანზორ ბოლქვაძის _ 5 831 ლარი. დანარჩენი მოადგილეების თვიური საშუალო შემოსავალი კი ასეთია: რუსუდან კერვალიშვილი _ 5 820 ლარი; ფრიდონ თოდუა _ 5 811 ლარი; პაატა დავითაია _ 5 811 ლარი; ლევან ვეფხვაძე ჴ 5 811 ლარი.
მთავარი პროკურორის, მურთაზ ზოდელავას საშუალო შემოსავალი თვეში 8 947 ლარია; უზენაესი სასამართლოს თავმჯდომარის კონსტანტინე კუბლაშვილის _ 10 617 ლარი; საჯარო სამსახურის ბიუროს უფროსის, ირაკლი კოტეტიშვილის _ 10 208 ლარი; 8 117 ლარის საშუალო თვიური შემოსავალი აქვს გიორგი ხიზანიშვილს _ ექსპერტიზის ეროვნული ბიუროს უფროსს; საკონსტიტუციო სასამართლოს თავმჯდომარეს, გიორგი პაპუაშვილს თვეში საშუალოდ 7 975 ლარის შემოსავალი აქვს; სახელმწიფო შესყიდვების სააგენტოს თავმჯდომარეს, ტატო ურჯუმელაშვილს _ 7 533 ლარი; ქუთაისის სააპელაციო სასამართლოს თავმჯდომარეს მალხაზ გურულს _ 7 521 ლარი; კონტროლის პალატის თავმჯდომარეს, ლევან ბეჟაშვილს _ 7 231 ლარი; სააპელაციო სასამართლოს თავმჯდომარეს, ვალერიან ცერცვაძეს _ 7 073 ლარი; საკონსტიტუციო სასამართლოს თავმჯდომარის მოადგილეს, კონსტანტინე ვარძელაშვილს _ 6 442 ლარი; საზოგადოებრივი მაუწყებლის დირექტორის, გიორგი ჭანტურიას საშუალო შემოსავალი თვეში 5 500 ლარია; ფინანსური მონიტორინგის სამსახურის უფროსის, მიხეილ როინიშვილის _ 7 614 ლარი; დაცვის პოლიციის დეპარტამენტის თავმჯდომარე კახა ლეგაშვილი, თვეში საშუალოდ 7 222 ლარს იღებს; გამოცდების ეროვნული ცენტრის დირექტორი, მაია მიმინოშვილი _ 6 959 ლარს; დაცული ტერიტორიების სააგენტოს თავმჯდომარე, გიორგი შოვნაძე _ 6 538 ლარს; შინაგან საქმეთა სამინისტროს აკადემიის რექტორი, ხატია დეკანოიძე _ 5 966 ლარს; შინაგან საქმეთა სამინისტროს მომსახურების სააგენტოს უფროსი, ლევან სანაძე _ 5 910 ლარს; სასჯელაღსრულების დეპარტამენტის თავმჯდომარის დავით ჭაკუას საშუალო შემოსავალი თვეში 5 854 ლარია; სასაზღვრო პოლიციის უფროსის, ზაზა გოგავას _ 5 330 ლარი; საჯარო რეესტრის ეროვნული სააგენტოს თავმჯდომარის, სერგო წიქარიშვილის _ 5 144 ლარი; 4 426 ლარია ევრაზიის სატრანსპორტო დერეფნის საინვესტიციო ცენტრის დირექტორის, გიორგი ცაგარელის საშუალო თვიური შემოსავალი; საგამოძიებო დეპარტამენტის უფროსს, კობა გოგიბერიძეს 3 742 ლარი აქვს; გარემოს ეროვნული სააგენტოს უფროსს, შალვა ჯავახაძეს _ 3 478 ლარი; 3 200 ლარის საშუალო შემოსავალი აქვს თვეში ეროვნული არქივის დირექტორს, თეონა იაშვილს;
ენერგეტიკისა და წყალმომარაგების მარეგულირებელი ეროვნული კომისიის თავმჯდომარის, გურამ ჩალაგაშვილის საშუალო შემოსავალი თვეში 20 135 ლარს შეადგენს; კომუნიკაციების ეროვნული კომისიის თავმჯდომარის, ირაკლი ჩიქოვანის _ 20 100 ლარს; თბილისის მერის, გიგი უგულავას თვიური საშუალო შემოსავალი 7 697 ლარია.
საქართველოს პრეზიდენტის, 2005 წლის 25 იანვრის #43 ბრძანებულებით განსაზღვრულია თანამდებობის პირთა ყოველთვიური სარგოები. პრეზიდენტის ხელფასი 4 720 ლარით არის განსაზღვრული; პრემიერ მინისტრის _ 4 250 ლარით; მინისტრის _ 3 540 ლარით; პირველი მოადგილის _ 2 950 ლარით; მოადგილის _ 2 720 ლარით; პარლამენტის წევრის _ 2 000 ლარით; მერის _ 3 540 ლარით.
პროექტ “საჯარო ინფორმაციის მონაცემთა ბაზის” დირექტორი, ლევან ავალიშვილი ამბობს, რომ ზემოთ აღნიშნულ თანხებს, საჯარო მოხელეები კანონის დარღვევით არ იღებენ: _ დარღვევით არაფერს არღვევენ. უბრალოდ, კანონით განსაზღვრულია ხელფასი. მაგალითად მინისტრის ხელფასი განსაზღვრულია თვეში 3 540 ლარით. მაგრამ ამავე დროს ისინი იღებენ პრემიას, დანამატებს, სამივლინებოს. შესაბამისად გამოდის ის ერთიანი თანხა, რომელიც გამოვაქვეყნეთ.
_ ბატონო ლევან, რამდენად კანონიერია, ყოველ თვე საკუთარი თავისთვის პრემიების გამოწერა?
_ კანონდარღვევა იურიდიულად არ არის, მაგრამ ამ შემთხვევაში ირღვევა თვითონ სიტყვა _ “პრემიის” არსი, ანუ წახალისება კარგი საქმიანობისთვის. გამოდის, რომ ყოველ თვე რაღაც არაჩვეულებრივს აკეთებენ, _ აღნიშნა ავალიშვილმა.
