9 თებერვალს, ოზურგეთის სამედიცინო ცენტრში, 65 წლის ალექსანდრე მოროზოვი გარდაიცვალა. მარტოხელა მამაკაცი, მეზობლებმა, სახლში, 4 თებერვალს გაყინული იპოვეს და საავადმყოფოში გადაიყვანეს. მოროზოვმა 4 დღე იცოცხლა. როგორც ცენტრის კლინიკურმა დირექტორმა, დავით მდინარაძემ გვითხრა, მოროზოვის გარდაცვალების მიზეზი ზოგადი ათეროსკლეროზი, ალიმეტრალური დისტროფია, კახეფსია, ქვემო და ზემო კიდურების მშრალი განგრენა, სასქესო ასოს ნეკროზი, ჰიპომოლემოური შოკი, კუდუსუნის გავრცელებული ნეკრეოზი და გულსისძარღვათა მწვავე უკმარისობა გახდა.
მოროზოვი, ოზურგეთში, სამთო ქიმიის ქუჩაზე, ბინებში ცხოვრობდა და სოციალურად დაუცველ ფენას განეკუთვნებოდა. მეზობლების განმარტებით, მას ეკონომიკურად ძალიან უჭირდა და გათბობის არანაირი საშუალება არ ჰქონდა.
მიმართა თუ არა მოროზოვმა დახმარებისთვის ადგილობრივ გამგეობას და როგორ ეხმარებოდა მას ხელისუფლება ამ ეტაპზე, ჯერჯერობით, ჩვენთვის უცნობია. “გურია ნიუსი” ამ წუთებში დეტალებს არკვევს და ვრცელ მასალას ამ თემაზე მალე შემოგთავაზებთ.
აღსანიშნავია, რომ ოზურგეთის სამედიცინო ცენტრში ყინვისგან დაზარებული კიდევ ერთი პაციენტი, ოზურგეთის მუნიციპალიტეტის გამგეობის საფინანსო განყოფილების ხელმძღვანელი, გია ჩაგანავა მკურნალობს. როგორც მისმა მეუღლემ ჩვენთან სატელეფონო საუბრისას აღნიშნა, ჩაგანავას ყინვაზე ფეხი დაუცდა და მხოლოდ ამის გამო მოხდა საავადმყოფოში:
_ გადაიცა ინფორმაცია, რომ თითქოს გაიყინა. ასეთ რამეს ადგილი არ ჰქონია _ ნასვამი იყო, ყინვაზე ფეხი დაუცდა და დაიმტვრა, _ აღნიშნა ჩაგანავას მეუღლემ და დასძინა, რომ მას საავადმყოფოდან დღეს გამოწერენ.
