23 მარტს, “თავისუფალი დემოკრატების” თბილისის ოფისში ამერიკის შეერთებული შტატების ეროვნულ-დემოკრატიულმა ინსტიტუტმა, საერთაშორისო დემოკრატიულმა ინსტიტუტმა და “საერთაშორისო გამჭვირვალობა _ საქართველოს” წარმომადგენლებმა შეხვედრა გამართეს. შეხვედრაზე იმყოფებოდნენ ჰოლანდიის, თურქეთის, ბრიტანეთის, უნგრეთის, შვეიცარიის და იტალიის საელჩოების თანამშრომლები.
შეხვედრას ესწრებოდა ლანჩხუთელი “თავისუფალი დემოკრატების ” წარმომადგენელი ელგუჯა ჩხაიძე. მისი თქმით, გამომსვლელებს საშუალება ჰქონდათ დეტალურად ესაუბრათ რეგიონებში არსებულ სიტუაციაზე _ ძალადობრივ ქმედებებზე, რომელსაც გამუდმებით მიმართავს ადგილობრივი ხელისუფლება. დიპლომატები მოითხოვდნენ ამა თუ იმ გამომსვლელისგან, მოძალადე პირების დასახელებას: _ მე დავასახელე რამოდენიმე სახელმწიფო და ძალოვანი მაღალჩინოსანი, მაგრამ მინდა იცოდეს პოლიციის ყველა თანამშრომელმა, რომლებიც მოსახლეობის აღწერას აწარმოებენ ვითომდა წინასაარჩევნოდ, სინამდვილეში კი მხოლოდ მოქალაქეთა პოლიტიკური ორიენტაცია აინტერესებთ _ ძალიან მალე მათ ვინაობასაც დავასახელებ. უცხოელ დიპლომატებს და საერთაშორისო ორგანიზაციებს აღარ აქვთ იმის განცდა, რომ “ეს არჩევნები წინას ჯობდა “, როგორც ადრე ამბობდნენ. ხმამაღლა ვაცხადებთ, რომ ეს არჩევნები არ იქნება ადრინდელების მსგავსი, როცა ოპოზიცია პოზიციას თმობდა მთავრობის სასარგებლოდ. ჩვენ აშკარად ვგრძნობთ საერთაშორისო საზოგადოების დიდ ინტერესს ჩვენთან მიმდინარე პროცესებისადმი, _ აღნიშნა ჩხაიძემ.
სანამ თბილისში ქართველი ოპოზიციონერები და უცხოელი დიპლომატები ქვეყანაში არსებულ პოლიტიკურ პროცესებზე მსჯელობდნენ, ლანჩხუთში ხელისუფლებამ კიდევ ერთი უკანონობის ჩადენა მოასწრო: სოფელ ნიგვზიანის რწმუნებულის თანაშემწე ავთანდილ სურმანიძე პარტია “თავისუფალი დემოკრატების” წევრია. იგი 2008 წლიდან მუშაობს ამ თანამდებობაზე. სწორედ მის საქმეს შეეწირა კუდ-ის ლანჩხუთის ბიუროს უფროსის ბუხუტი ჩხაიძის თანამდებობა, როცა იგი სურმანიძეზე მუქარის საშუალებით ცდილობდა ზეწოლის მოხდენას, უარი ეთქვა არჩევნებში მონაწილეობაზე.
წინა ხუთშაბათს, ლანჩხუთში გამართული პრეზენტაციის პარალელურად, ნიგვზიანში “ნაციონალური მოძრაობა” მოსახლეობასთან შეხვედრას მართავდა. ასეთ შეხვედრაზე აუცილებელია რწმუნებულისა და მისი თანაშემწეების დასწრებაც. სწორედ ისინი ახდენენ მოსახლეობის შეკრების ორგანიზებას სამთავრობო შეხვედრებზე.
სურმანიძემ ამჯობინა დაეტოვებინა სამთავრობო შეხვედრა და ლანჩხუთში წავიდა ოპოზიციური პარტიის ოფისის გახსნაზე. ამიტომ აიძულებენ მას, რომ განცხადება დაწეროს სამსახურიდან წასვლის შესახებ.
_ 2010 წლიდან სამსახურში პოლიტიკურ დავალებებს არ ვასრულებ და მხოლოდ მოსახლეობასთან ურთიერთობით ვარ დაკავებული. იმ შეხვედრაზე გამგებელმა განაცხადა _ იმედი მაქვს, რომ არჩევნებში სურმანიძე ჩვენს სასარგებლოდ იმუშავებსო. სწორედ ამიტომ დავტოვე შეხვედრა და ლანჩხუთში გავემგზავრე, _ ამბობს სურმანიძე.
ავთანდილ სურმანიძეს თან ჰქონდა გამგებლის სახელზე დაწერილი განცხადება, რომელშიც იგი არ ეთანხმება მისი გათავისუფლების პოლიტიკურ მიზეზს და არ აპირებს უარი თქვას დაკავებულ თანამდებობაზე. “სამართლებრივი საფუძველი ჩემი გათავისუფლებისთვის არ არსებობს, რადგან მე კანონი არ დამირღვევია,” _ აღნიშნა მან.
