“ივანიშვილისა და “ნაცმოძრაობის” დაპირისპირება პოლიტიკური ფარსი და თამაშია!”

უბედნიერესი ადამიანი ვიქნებოდი, ახალგაზრდობის საუკეთესო წლები მშობლიურ საქართველოში გამეტარებინა. იცის ქართველმა მკითხველმა, რომ არა საკუთარმა სურვილმა, არამედ თავსმოხვეულმა აფხაზეთის ომმა მაიძულა ჩემთვის სანუკვარი სოხუმი დამეტოვებინა”, _ აცხადებს მინდის გულუა თავის წერილში.

“დაგვეთანხმებით, ჩემს სახელთან ასოცირებულმა პოლიტიკურმა პარტიამ (“განახლებული საქართველოსთვის”) სერიოზული განაცხადი გააკეთა 12 მაისს თბილისში, ბათუმსა და სამეგრელოს სხვადასხვა რეგიონებში, როცა დევნილთა მრავალათასიანი შეკრება მოეწყო. მიუხედავად, ხელისუფლების მხრიდან არაერთი ხელშემშლელი ფაქტორისა, პარტიამ ტესტი ნამდვილად ჩააბარა _ რაც მთავარია, 12 მაისი გამოცხადდა ქართველთა, აფხაზთა და ოსთა შერიგების დღედ და დაფუძნდა საერთაშორისო საქველმოქმედო ფონდი, რომელიც დევნილთა პრობლემების ოპერატიულად მოგვარებაზე იმუშავებს. როგორც შეკრებაზე პირდაპირ ჩართვაში განვაცხადე, მე უცხოეთში მცხოვრები რიგითი ქართველი _ მინდია გულუა ფონდის ანგარიშზე ვრიცხავ 25 მილიონ დოლარს (უკვე მყავს ბევრი მხარდამჭერი ჩემი აფხაზი და ოსი კოლეგების სახით) და მოვუწოდე ქართველ მეცენატს ბ-ნ ბიძინა ივანიშვილს გამოეჩინა გულისხმიერება და მიეღო მონაწილეობა აღნიშნული ფონდის ფორმირებაში.

გულწრფელად ვფიქრობდი, რომ ბ-ნი ბიძინა ჩემს წინადადებას სიამოვნებით დათანხმდებოდა და ამ ერთხელ მაინც (ხაზს ვუსვამ _ ერთხელ მაინც) შეიტანდა საკუთარ წვლილს აფხაზეთისა და სამაჩაბლოს რეგიონებიდან დევნილთა პრობლემების გადაწყვეტაში.

გაოცებული დავრჩი, როცა ქართულმა საინფორმაციო საშუალებებმა გაავრცელეს “ქართული ოცნების” პრესსპიკერის ქ-ნ მაია ფანჯიკიძის განცხადება, სადაც ის ხმამაღლა აცხადებს: “ბიძინა ივანიშვილს არავის შუამავლობა არ სჭირდება, რათა ქველმოქმედება გასწიოს… ივანიშვილი ვის, როგორ და რა სახით დაეხმაროს, ამაზე მას მინდია გულუას მითითება არ სჭირდება” (საინფორმაციო სააგენტო “ივერონი” _ 14 მაისი, 2012 წ.).

ასეთ “სიურპრიზს” ნამდვილად არ ველოდი. ვიფიქრე, კაცს ამდენი ხანი თავისი სისხლისა და ხორცის ყველაზე დაჩაგრულ ნაწილზე არ უფიქრია და იქნებ სინდისმა შეაწუხოს მეთქი (ხატი, რჯული, ივანიშვილის ფინანსები ჩემს გასამდიდრებლად ნამდვილად არ მჭირდება!). ვიცი, ივანიშვილის მეცენატობაზე საქართველოში ლეგენდები დადის, მაგრამ რისთვის და რატომ აკეთებდა ამას, უკვე დღესავით ნათელია და მომავალში კიდევ უფრო “განათდება”. დიახ, ჩემი მითითება გახდა საჭირო, რომ ივანიშვილს დევნილებზე ეფიქრა, მაგრამ მის ინტერესში მათი დახმარება რომ არ შედის, აქამდეც ვიცოდი. დააკვირდით: არც შევარდნაძის და არც სააკაშვილის ხელისუფლება დევნილებს საქართველოს სრულუფლებიან მოქალაქეებად არ განიხილავდნენ (არც დღეს განიხილავენ) და მათდამი დამოკიდებულება ყოველთვის დამამცირებელი იყო. თუმცა, არც მეცენატობით განთქმულ ბიძინა ივანიშვილსაც შეუწუხებია თავი. ეს უბრალოდ მის გეგმაში არ შედიოდა და როგორც ჩანს, დღესაც არ შედის!

არავინ იფიქროს, რომ ბატონი ივანიშვილი დღევანდელი ხელისუფლების ჭეშმარიტი ოპონენტია. ღიად ვაფიქსირებ: ივანიშვილი და “ნაციონალური მოძრაობა” ერთი მთელის ორი ნაწილია. აქედან გამომდინარე, მათი დაპირისპირება პოლიტიკური ფარსი და თამაშია. ივანიშვილის გეგმაში არ შედის გააერთიანოს პოლიტიკური სპექტრი და როგორც გასული წლის ოქტომბრის დასაწყისში ომახიანად აცხადებდა, პოლიტიკურ მოუსავლეთში გაამგზავროს საქართველოს დღევანდელი ხელისუფლება. მეტიც, მისი ოპოზიციონერობა წინასწარ დაწერილი სცენარია და არაფერი აქვს საერთო საქართველოს ინტერესებთან.”

მინდია გულია აცხადებს, რომ მისი გამოხმაურება საზოგადოების კეთილდღეობას ემსახურება და ამავდროულად ეჭვობს, რომ ბიძინა ივანიშვილი მალე საქართველოდან გაიქცევა.

“არ ვიცი, რამდენად სარწმუნოა ჩემი ინფორმაცია, მაგრამ მავანნი და მავანნი იმასაც ამბობენ, რომ არჩევნებამდე ცოტა ხნით ადრე თითიდან გამოწოვილი მოტივით, ივანიშვილი საქართველოდან გაიქცევა. დამიჯერეთ, ბატონ ბიძინას არც პრემიერ-მინისტრობა უნდა და არც პრეზიდენტობა. მოქალაქეობის საკითხიც წინასწარ განზრახული “შეცდომაა” და კონსტიტუციაში შესატანი ცვლილებებიც წინასწარ დაგეგმილი აფიორა, რაც საზოგადოების არარსებით საკითხებზე ყურადღების გადატანას ემსახურება.

გეკითხებით: რატომ არ აპირებს ხელისუფლება კონსტიტუციაში “დაგეგმილ” ცვლილებაში ისეთი ნორმა შემოიტანოს, რომ მეც მქონდეს არჩევნებში მონაწილეობის უფლება?! პასუხი მარტივია: მე ბიძინა ივანიშვილი არა ვარ და არ ის კაცი ვარ, ბინძურ თამაშში მონაწილეობა მივიღო. აწი თქვენ თვითონ დაფიქრდით, რატომ არ მიშვებენ საქართველოში და რატომ არ მაძლევენ აქტიური პოლიტიკური საქმიანობის უფლებას!”

“გურია ნიუსმა” მინდია გულუას მიერ დასმულ კითხვა-ბრალდებაზე კომენტარის გაკეთება პარტია “ქართული ოცნების” თავმჯდომარეს, მანანა კობახიძეს თხოვა.

მანანა კობახიძე: “მინდია გულუამ ეგ კითხვები დაუსვას მაგ კანონპროექტის იციატორებს, ქრისტიან-დემოკრატებსა და ნაციონალებს. ბიძინა ივანიშვილმა და ქართულმა ოცნებამ ამ კანონპროექტის ინიცირების პირველივე დღიდან დააფიქსირა თავისი პოზიცია, რომ არ შეიძლება ძირითადი კანონი, უზენაესი კანონი იცვლებოდეს ერთი ადამიანისთვის, ვინც არ უნდა იყოს ის. ეს თავიდანვე განვაცხადეთ და ვითხოვდით ნატურალიზაციის, სამართლებრივი გზით გადაეჭრათ ეს პრობლემა და მიენიჭებინათ მოქალაქეობა ივანიშვილისთვის. ამისთვის არც კონსტიტუციაში ცვლილები იყო საჭირო და არც ის მანიპულაციები, რაც შემდეგ ამ ცვლილებების პროცესში განახორციელეს. თავიდანვე ვაპროტესტებდით ამას და გულუას რა მოსაზრებები აქვს, ეს ჩვენთვის ნაკლებად საინტერესოა. სხვა დროს, არ ვაპირებთ კომეტარის გაკეთებას მაგის რაღაც გამონათქვამებზე.”