“გურია ნიუსი” დაინტერესდა რას გრძნობს მამა ალასანია, როცა შვილი ალასანიას უწყება “ქართულ ოცნებას” ყოველდღე მილიონებით აჯარიმებს.
_ ბატონო გიორგი, როდესაც თქვენი შვილის უწყება “ქართული ოცნების” ფინანსურ ანგარიშებს აყადაღებს და მილიონებით აჯარიმებს, თქვენ თავს უხერხულად არ გრძნობთ?
_ ჯერ ერთი, ეს ჩემი შვილის ფუნქცია არ არის _ მისი ფუნქციაა სოციალური სფეროს აუდიტი. ეს ფუნქცია კონკრეტულად მოგელაძის უწყებას აქვს და არა კონტროლის პალატას. რაც შეეხება ჩვენს მამა-შვილურ ურთიერთობას, ამ პოლიტიკური მიზეზების გამო, ორი-სამი თვეა ერთმანეთს დავშორდით და ერთმანეთს არ ვეკონტაქტებით.
_ შვილს იმიტომ არ ეკონტაქტებით, რომ განსხვავებული პოლიტიკური ხედვა აქვს?
_ დიახ. დიახ. მე ვარ სიმართლის მხარეს. ჩემს წინაშე თუ დადგა არჩევანი შვილსა და ბიძაშვილს შორის, მე ვდგავარ სიმართლის მხარეს.
_ თქვენ განაცხადეთ, რომ ფინანსური მონიტორინგი თქვენი შვილის სფერო არ არის, მაგრამ ნებისმიერ შემთხვევაში, ეს ერთი უწყებაა _ კონტროლის პალატა.
_ იცით, რა არის? უწყებაში ყველას თავისი მიმართულება აქვს. ყოველ შემთხვევაში, რასაც ახორციელებს კონტროლის პალატა, ამას მოგელაძის უწყება ჩადის. ჩემს შვილს აქვს თავისი დეპარტამენტი, რომელიც სხვა ფუნქციებს ასრულებს. ახლა ფუნქციების აღრევა ხომ არ მოხდება? სიტყვაზე ვამბობ _ არის მუნიციპალურ გამგეობაში გამგეობა და არის სხვა განყოფილებები, რომელიც თავის საქმეს ახორციელებს.
_ კოალიციაში იციან, რომ თქვენი შვილი კონტროლის პალატაში მუშაობს?
_ რა თქმა უნდა, ყველა საქმის კურსშია. ამაზე ცოტა სხვა საუბარი იყო. იყო კიდევ სხვა ნიუანსები, რომელსაც თქვენ ნამდვილად ვერ გაგიმხელთ. ყოველ შემთხვევაში, გადაწყვეტილება მივიღეთ. როგორ გითხრათ ახლა _ ამის გამო კიდევაც ვაწყენინეთ ერთმანეთს, უკვე სამი თვეა კონტაქტი არ გვაქვს. ჩემს შვილს ტელევიზიით ძალიან ახლოს იცნობენ. ძალიან მოსწონთ მისი დამოკიდებულება საკითხებისადმი. მეც ბევრი რამ არ მომწონს კონტროლის პალატაში _ ის არ უნდა იყოს ხელისუფლების ერთ-ერთი დანამატი, პირიქით, კონტროლის პალატა უნდა იყოს ოპოზიციური. მე ჩემი შვილისთვის არაერთხელ მითქვამს _ მიდით, შეამოწმეთ იუსტიციის სამინისტრო, შეამოწმეთ თავდაცვის სამინისტრო. ჩამობრძანდით ზუგდიდში, შეამოწმეთ მუნიციპალური გამგეობის ბიუჯეტი, იხარჯება თუ არა ყველაფერი სწორად.
ჩემი შვილი არის დამოუკიდებელი პიროვნება და თუ არასწორად მოიქცევა, ჩვენც გავაკრიტიკებთ მას. თუ მე ხელს ვუშლი ჩემი პოლიტიკური საქმიანობით მის პოლიტიკურ კარიერას, ჩვენ პოლიტიკური კარიერა არ გვაინტერესებს _ თუნდაც დღესვე გაათავისუფლონ სამსახურიდან!
