როგორც, თურმე, “ინტერპრესნიუსს” კონტროლის პალატაში განუცხადეს, ჟურნალისტი “გურია ნიუსის” ადმინისტრაციული სარჩელის განხილვაზე ჩამწერი აპარატურით შესვლას ცდილობდა, რაც დაუშვებელია: _ “თუმცა, დიქტოფონის წართმევის მცდელობას ადგილი არ ჰქონია. ჩვენ შევნიშნეთ, რომ ის ჩუმად ახორციელებდა ჩაწერას, რის შემდეგაც განვუმარტეთ, რომ ადმინისტრაციული სარჩელის განხილვის პროცესი საჯაროა, თუმცა, მასზე ტექნიკური აღჭურვილობის, ჩამწერი და საკომუნიკაციო საშუალებების შეტანა აკრძალულია. ჟურნალისტმა აღნიშნული აკრძალვის შემდეგ პროტესტის ნიშნად შენობა დატოვა. საქმიანობაში ხელშეშლის და დიქტოფონის წართმევის მცდელობა არ ყოფილა”, _ განმარტავენ კონტროლის პალატის პრესსამსახურში.
მათივე ინფორმაციით, კოალიცია “არჩევნის თავისუფლებისთვის” დღევანდელ განცხადებაში, რომელშიც კონტროლის პალატის თანამშრომელთა დისციპლინარული წესით დასჯას ითხოვდა, მხოლოდ ცალმხრივ ინფორმაციას დაეყრდნო და მის გადასამოწმებლად კონტროლის პალატას არ დაკავშირებია.
მოგახსენებთ, რომ გაზეთ “გურია ნიუსის” ვებგვერდზე გამოქვეყნებულ მასალასთან ერთად (“კონტროლის პალატის თანამშრომლის მიერ დიქტოფონის წართმევის მცდელობაზე” გურია ნიუსი” ბეჟაშვილს მიმართავს” 25.05.2012 წ) გავრცელდა აუდიოჩანაწერიც, სადაც ჩაწერილია ის ფაქტი, რაც 25 მაისს კონტროლის პალატაში მოხდა.
_ აუდიოჩანაწერში კარგად ისმის, თუ როგორ ცდილობდა ჟურნალისტი გაცნობოდა იმ შიდაგანაწესს, რომლის თანახმადაც მას კონტროლის პალატის პრესსამსახურის უფროსის ფატი მამიაშვილისა და შიდაგანაწესის სამსახურის უფროსის ჯიმშერ დობორჯგინიძის სიტყვიერი განმარტებით, ეკრძალებოდა საკუთარი საჯარო პროცესის აუდიოჩანაწერის გაკეთება.
_ ფატი მამიაშვილისა და შიდაგანაწესის სამსახურის უფროსის, ჯიმშერ დობორჯგინიძის განმარტებით, ამ განცხადების შინაარსის გაცნობას ის მხოლოდ მას შემდეგ შეძლებდა, რაც ოფიციალური წერილით მიმართავდა საქართველოს კონტროლის პალატას.
_ კონტროლის პალატის თანამშრომლების მიერ დაყენებული ეს მოთხოვნა იყო აბსოლუტურად არაეფექტური მექანიზმი, ვინაიდან ადმინისტრაციული წესით საჩივრის განხილვა მიმდინარეობდა იმ დღეს და რამდენიმე დღის შემდეგ აღნიშნული შიდაგანაწესის გაცნობა ყოველგვარ ლოგიკურ საფუძველს გახლდათ მოკლებული. გარდა ამისა, “გურია ნიუსს” ჰქონდა საფუძვლიანი ეჭვი იმისა, რომ ამ ბრძანების შინაარსის გაცნობა არ მოხდებოდა გონივრულ და კანონის ფარგლებში დადგენილ ვადებში, ვინაიდან ჩვენს მიერ 2012 წლის 20 მარტს შეტანილ 10 წერილზე დღემდე მხოლოდ 4-ზე გვაქვს პასუხი მიღებული.
_ აუდიოჩანაწერში ასევე კარგად ისმის, ჯიმშერ დობორჯგინიძის მხრიდან დიქტოფონის წართმევის მცდელობა და ისიც, თუ როგორ გაუწია მას წინააღმდეგობა ჟურნალისტმა.
_ რაც შეეხება ფატი მამიაშვილის განცხადებას ფარულად ჩაწერის შესახებ, მოგახსენებთ, რომ რომელიმე მედიასაშუალებას ან ჟურნალისტს არ ავალდებულებს არანაირი კანონი, პრესსამსახურთან შეათანხმოს აუდიოჩანაწერის გაკეთების დაწყება ან დასრულება. აქვე განვმარტავთ, რომ მას შემდეგ, რაც ჟურნალისტმა შეიტყო ამ აკრძალვის შესახებ, უარი თქვა რეგისტრაციის გავლასა და თავისი პირადი ნივთების დაცვასთან დატოვებაზე. ის იმყოფებოდა კონტროლის პალატის შესასვლელში, სადაც ჩაწერის ან გადაღების შესახებ რაიმე სახის აკრძალვის ნიშანი არ იყო. ამასთან დავძენთ, რომ არცერთი მედიასაშუალება არ არის ვალდებული ფლობდეს ინფორმაციას ამა თუ იმ ადმინისტრაციული ორგანოს შიდაგანაწესის შესახებ. და კიდევ ერთხელ შეგახსენებთ, რომ მათ ეს შიდაგანაწესი, ჩვენი არაერთი თხოვნის მიუხედავად, არ გაგვაცნეს, რაც ასევე კარგად ისმის აუდიოჩანაწერში.
_ ზემოაღნიშნული შემთხვევა კონტროლის პალატის პრესსამსახურის უფროსის, ფატი მამიაშვილის მხრიდან ჟურნალისტურ საქმიანობაში ხელისშეშლის პირველი ფაქტი არ გახლავთ. ანალოგიურ ფაქტს ადგილი ჰქონდა 2012 წლის 3 აპრილსაც, როდესაც ფატი მამიაშვილმა “გურია ნიუსის” ჟურნალისტს, ირმა მესხიას არ მისცა უფლება დასწრებოდა სასტუმრო “ქორთიარდ მერიოტში” გამართულ საჯარო შეხვედრას, რომელზედაც ლატვიელი ექსპერტები მართავდნენ საჯარო შეხვედრას კონტროლის პალატის თანამშრომლებთან. 2012 წლის 04 აპრილს “გურია ნიუსის” ვებგვერდზე გამოქვეყნდა სტატია სათაურით “პრესსამსახურის უფროსი ჟურნალისტებს ლაპარაკს უკრძალავს!”. სტატიას თან ახლავს ასევე აუდიოჩანაწერი ფატი მამიაშვილის მხრიდან ჟურნალისტური საქმიანობის ხელშეშლის ფაქტზე.
_ ფატი მამიაშვილი არ გახლავთ უფლებამოსილი პირი, რომელსაც შეუძლია იმსჯელოს კონტროლის პალატის თანამშრომლის მიერ ჩადენილ დისციპლინარულ გადაცდომაზე. ამის უფლება აქვს კონტროლის პალატის თავმჯდომარეს, ლევან ბეჟაშვილს და “გურია ნიუსი” სწორედ მას მიმართავს განცხადებით.
_ და ბოლოს, გაზეთი “გურია ნიუსი” კონტროლის პალატის მადლობელი იქნებოდა, თუ მათი პასუხი ასევე მყისიერი იქნებოდა იმ საჯარო ინფორმაციებზეც, რომელსაც უკვე ორი თვეა უშედეგოდ ველოდებით.
_ განცხადებას თან ვურთავთ ორივე აუდიოჩანაწერს და უახლოეს დღეებში, რეაგირებისთვის ოფიციალური განცხადებით მივმართავთ საქართველოს კონტროლის პალატის თავმჯდომარეს, ლევან ბეჟაშვილს.
შეგახსენებთ, რომ კოალიციამ “არჩევნის თავისუფლებისთვის” დღეს განცხადება გაავრცელა, რომელშიც კონტროლის პალატის თანამშრომელთა დისციპლინარული წესით დასჯა მოითხოვა. როგორც კოალიციის განცხადებაშია ნათქვამი, 25 მაისს, გაზეთ “გურია ნიუსის” ჟურნალისტს, თამარ ლეფსვერიძეს და მის წარმომადგენელს, მედიის სამართლებრივი დაცვის ცენტრის ხელმძღვანელს, ნათია კაპანაძეს საჯარო პროცესზე პირადი ნივთების, მათ შორის, დიქტოფონისა და ლეპტოპის შეტანის უფლება არ მისცეს, ისინი საგულდაგულოდ გაჩხრიკეს და კატეგორიულად მოსთხოვეს, რომ ყველა ნივთი დაცვის თანამშრომლებისთვის ჩაებარებინათ.
“მიუხედავად იმისა, რომ ჟურნალისტს სრული უფლება ჰქონდა, იმ საჯარო პროცესის აუდიოჩანაწერი გაეკეთებინა, რომელზეც მხარეს თავად წარმოადგენდა, კონტროლის პალატის თანამშრომლების _ შიდაგანაწესის სამსახურის უფროსის, ჯიმშერ დობორჯგინიძისა და პრესსამსახურის უფროსის, ფატი მამიაშვილის მხრიდან კატეგორიული უარი მიიღო. ამის შემდეგ კი დობორჯგინიძემ ჟურნალისტისთვის დიქტოფონის წართმევა სცადა”, _ ნათქვამია განცხადებაში.
კოალიცია “არჩევნის თავისუფლებისთვის” მომხდარს ჟურნალისტურ საქმიანობაში ჩარევად და ხელშეშლად აფასებს და კონტროლის პალატის თავმჯდომარეს, ლევან ბეჟაშვილს, აღნიშნული საქმის შესწავლისკენ მოუწოდებს.
