მოსამართლემ ძალაში დატოვა კონტროლის პალატის ფინანსური მონიტორინგის სამსახურის 14 მაისის გადაწყვეტილება, რომლის მიხედვითაც შპს “მენეჯმენტ სერვისი” 4 766 200 ლარით დააჯარიმა.
კონტროლის პალატის ადმინისტრაციული სამართალდარღვევის ოქმის მიხედვით, “მენეჯმენტ სერვისი” სამი პოლიტიკური გაერთიანების: “რესპუბლიკური პარტია”, “ჩვენ საქართველო – თავისუფალი დემოკრატები” და “ეროვნული ფორუმის” სასარგებლოდ, 476 620 ლარის უკანონო შემოწირულობების გახორციელებაში დაადანაშაულა. კონტროლის პალატის შეფასებით, სამივე პარტიის სასარგებლოს ჩატარებულ იქნა უსასყიდლო სარემონტო სამუშაოები.
“მენეჯმენტ სერვისის” დირექტორმა, ბესიკ დემეტრაშვილმა, ადვოკატებმა ალექსანდრე ბარამიძემ და ეკა ბესელიამ ჟურნალისტებისთვის პრესკონფერენცია გამართეს და განაცხადეს: “მოსამართლე გვრიტიშვილმა მიიღო უკანონო გადაწყვეტილება. თბილისის საქალაქო სასამართლოს გადაწყვეტილებას გავასაჩივრებთ სააპელაციო სასამართლოში. დარწმუნებული ვართ, სააპელაციო სასამართლოც ძალაში დატოვებს, კონტროლის პალატის და საქალაქო სასამართლოს გადაწყვეტილებას. ჩვენ ამ საქმეს ევროპის სასამართლოში წავიღებთ.”
ადვოკატ ეკა ბესელიას აზრით, მოსამართლემ, რომელსაც კონტროლის პალატის მხრიდან დაწყებული პოლიტიკური ნიშნით დევნა და დაჯარიმებების მთელი სერიალი უნდა შეეჩერებინა, წაახალისა ის უკანონობა, რასაც კონტროლის პალატა ჩადის: “სასამართლოზე ვცდილობდით, მოსამართლისთვის აგვეხსნა ამ საქმის მნიშვნელობა, საქმეზე გამოტანილი უკანონო გადაწყვეტილების შესაძლო თანამდევი მძიმე შედეგები. ვცდილობდით, მოსამართლე მოგვექცია კანონის ჩარჩოებში. მაგრამ, სამწუხაროდ ქალბატონი მოგელაძის როლში ბატონი გვრიტიშვილი ვიხილეთ. როგორც ჩანს, მოსამართლეს ჰქონდა დავალება, რის ფასადაც არ უნდა დაჯდომოდა, ერთ სამუშაო დღეში გამოეცხადებინა გადაწყვეტილება.
სასამართლო სხდომაზე, მოსამართლემ დაარღვია ყველა პროცედურა. მხარეთა თანასწორობის, შეჯიბრობითობის, ადმინისტრაციული საქმის სამართალგანხილვის პრინციპი. არ შეუმოწმებია არც ერთი მტკიცებულება, არ დაინტერესებულა რა ეწერა წარმოდგენილ დოკუმენტებში. არ დაელოდა საინჟინრო-ტექნიკური ექსპერტიზის დასკვნა, რომლის პასუხიც 7 ივლისს იქნება. უარი თქვა მოწმეების დაკითხვაზე.
სასამართლოზე მოვითხოვეთ კონტროლის პალატაში შედგენილი სხდომის ოქმის გაცნობა, რომელიც სხდომის დაწყების დროს, სასამართლოში გადმოგვცეს და საკმაოდ მოცულობითი იყო. მოსამართლემ გვითხრა, იმისთვის რომ ოქმს გაეცნო, ერთი საათი გეყოფათო. მხოლოდ ნაწილის გაცნობა შევძელით. მესამედ ნაწილთან დაკავშირებით იქვე განვაცხადეთ, რომ ოქმში არასწორი ინფორმაციები იყო შეტანილი. ქალბატონი მოგელაძის გამონათქვამები, მისი განცხადებები და შენიშვნები კორექტირებული იყო.”
როგორც ადვოკატების განცხადებებიდან ირკვევა, სასამართლო არ დაინტერესდა რა თანხა დახარჯა “მენეჯმენტ სერვისმა” სარემონტო სამუშაოებზე, რომელიც ოფისებში ჩატარდა. კონტროლის პალატა ამბობს და სასამართლომაც მხარი აუბა იმაში, რომ “მენეჯმენტ სერვისმა” განახორციელა 476 000 ლარის უკანონო შემოწირულობა “ქართული ოცნების” სასარგებლოდ. “მენეჯმენტ სერვისი” კი ამბობს, რომ არანაირ უკანონო შემოწირულობას ადგილი არ ჰქონია, პირიქით ეს იყო მომგებიანი კონტრაქტი.
ეკა ბესელია: “ამ საკითხის გარკვევა იყო უმარტივესი. საქმეში დევს საბუღალტრო დოკუმენტაცია, რომელსაც უნდა წაკითხვა. კონტროლის პალატამ არ ჩაატარა ექსპერტიზა, ზეპირად დაითვალა. არც სასამართლო დაინტერესდა, არ დანიშნა სასამართლო ექსპერტიზა. ჩვენ დავნიშნეთ ექსპერტიზა და ვითხოვდით დროს 7 ივნისამდე, რათა ექსპერტებმა მოასწრონ 22 ოფისის შემოწმება. ეს იყო ის მინიმალური მოთხოვნა რაც ჩვენ სასამართლოზე დავაყენეთ.
მოსამართლემ ამაზე განაცხადა, არ მაინტერესებს ექსპერტიზის პასუხი, საქმეში წარმოდგენილი მასალებიც საკმარისიაო. არადა, მას მასალები არ წაუკითხავს. სასამართლოზე არც ერთი მტკიცებულება არ გამოგვიკვლევია.
როგორც კი მოვიდა სამუშაო საათის დასრულების დრო, ექვსი საათი, მოსამართლეს დაავიწყდა კითხვები რომ უნდა დაგვესვა, მტკიცებულებებზე გვემსჯელა.
ეს საერთოდ კურიოზია, სასამართლოზე კონტროლის პალატას ბატონი ამირანაშვილი წარმოადგენდა, ქალბატონი მოგელაძის მოადგილე, რომელმაც დაჯარიმების ოქმი შეადგინა. საინტერესოა არა?! ოქმის კანონიერება განიხილა ქალბატონმა მოგელაძემ, ხოლო ქალბატონი მოგელაძის მიერ გამოტანილი 5 მილიონიანი ჯარიმის დაცვას სასამართლოში ახდენდა მისი მოადგილე, რომელმაც ეს ოქმი შეადგინა”.
ბესიკ დემეტრაშვილი. “მენეჯმენტ სერვისის” დირექტორი: “ის რაც ბოლო რამდენიმე კვირის მანძილზე ხორციელდება “მენეჯმენტ სერვისის” ირგვლივ, უსამართლობისა და უკანონობის ნიმუშია. ძნელად მოიძებნება მსგავსი ნიმუში რომელიმე ქვეყანაში. ეს უკანონობა კონტროლის პალატაში დაიწყო და უხეში და ცინიკური ფორმით გაგრძელდა სასამართლოში. დარწმუნებით შემიძლია გითხრათ, რომ ანალოგიურ შედეგს ველოდებით სააპელაციო სასამართლოშიც.
დღეს, საქართველოში, კანონიერების აღდგენა და სამართლის პოვნა წარმოუდგენელია. პოლიტიკური ნიშნით ხდება ანგარიშსწორება სრულიად აპოლიტიკურ ბიზნეს სტრუქტურაზე, კონკრეტულ კომპანიაზე.
ჩვენ ვერ ვახერხებთ დავადგინოთ სიმართლე, რომელიც მიუკერძოებელი და ობიექტური ადამიანისთვის ადვილად გასაგებია. სასამართლომ უარი განაცხადა მტკიცებულებების მიღებაზე, მოწმეების დაკითხვაზე. საინჟინრო ტექნიკური დასკვნის გაცნობაზე, რომელიც ჩემი კომპანიის მიერ არის დაკვეთილი. ჩემთვის დღემდე გაუგებარია, რას ემყარება ადმინისტრაციულ სამართალდარღვევის ოქმი, რომელიც აგებულია ვარაუდებზე, თითქოს ჩემი კომპანია არ ღებულობდა მოგებას და არ არის მოგებისკენ ორიენტირებული.
ამის შემოწმება ძალიან მარტივია. არანაირი რთული პროცედურა აქ არ არის. არის ხელშეკრულება მესაკუთრესთან, არის ხელშეკრულება პარტიასთან. ამ ქვეყანაში სასამართლო არ არსებობს. ეს გადაწყვეტილება პოლიტიკურად მოტივირებულია, რომლებსაც ემსხვერპლება სრულიად აპოლიტიკური კომპანია.”
5 მილიონიანი ჯარიმის გადახდის შემთხვევაში შპს “მენეჯმენტ სერვისს” გაკოტრება ემუქრება. ასევე გაუქმდება ხელშეკრულებები მეიჯარეს, მოიჯარეს და ქვემოიჯარეს შორის.
დადგება თუ არა პარტიის ოფისების არსებობის საკითხი ხელშეკრულებების გაუქმების შემდეგ და გადაუხდის თუ არა პირგასამტეხლოს “მენეჯმენტ სერვისი” ხელშეკრულებით გათვალსწინებული ვალდებულებების შეუსრულებლობისთვის მესაკუთრეებს. ამასთან დაკავშირებით “გურია ნიუსი” ბესიკ დემეტრაშვილს ესაუბრა:
_ თბილისის საქალაქო სასამართლოს გადაწყვეტილების შემდეგ, დადგება თუ არა მესაკუთრეებთან ხელშეკრულების გაუქმების და პარტიის ოფისების არსებობის საკითხი?
_ რა თქმა უნდა დადგება. 60-ივე ოფისთან დაკავშირებით. მესაკუთრეებთან, ქირავნობის ხელშეკრულებასთან დაკავშირებით გადარიცხვას ყოველთვიურად ვახორციელებ. მე ივნისიდან ვერ შევძლებ მესაკუთრეებთან იჯარის თანხის გადახდას. შესაბამისად მათ ექნებათ სრული უფლება შეწყვიტონ ჩემთან გაფორმებული ხელშეკრულება. აგრეთვე მე ვერ შევძლებ ასევე, იჯარით ქირავნობის საგნით ისარგებლონ პოლიტიკურმა პარტიებმა, რომელთანაც ხელშეკრულება გვაქვს დადებული.
_ მოუწევს თუ არა “მენეჯმენტ სერვისს” აღებული ვალდებულებების შეწყვეტის შემთხვევაში პირგასამტეხლოს გადახდა?
_ რა თქმა უნდა, ხელსშეკრულებაში არის სანქციებზე საუბარი, მაგრამ ამ შემთხვევაში ფორს-მაჟორში ჩაითვლება. ხელშეკრულების ცალმხრივად შეწყვეტა ჩვენი მიზეზით არ ხდება. სასამართლოს ამ გადაწყვეტილებით ჩვენ გავკოტრდებით.
