კომიტეტის პრეზიდენტმა, ტომ ნოლანმა შეხვედრაზე განაცხადა: “ჩვენი კომიტეტის მიზანია, უზრუნველვყოთ ჩატარდეს ღია და სამართლიანი არჩევნები”
მისიის წარმომადგენლებმა მედიასთან საინფორმაციო ბრიფინგი გამართეს და აღნიშნეს, რომ ინფორმირებული არიან ქვეყანაში მიმდინარე წინასაარჩევნო პოლიტიკური პროცესების შესახებ, აქვთ ინფორმაცია ხელისუფლების მხრიდან მედიის ზეწოლის ფაქტებზე. კომიტეტის წევრებმა აღნიშნეს, რომ შეხვდნენ თითქმის ყველა პოლიტიკური ძალის წარმომადგენლებს, რომლებმაც ამომწურავად მიაწოდეს ინფორმაცია, რა ხდება ქვეყანაში არჩევნებთან დაკავშირებით.
მისიის ერთ-ერთი წევრი, იაროსლავ დავიდოვიჩი, უკრაინის ცენტრალური საარჩევნო კომისიის ყოფილი თავმჯდომარე და ღია დემოკრატიის კომიტეტის სპეციალური მრჩეველი გახლავთ.
“იაროსლავ დავიდოვიჩი უკრაინის ნარინჯისფერი რევოლუციის ერთ-ერთ გმირად მიიჩნევა. საპრეზიდენტო არჩევნებზე მან ხელი არ მოაწერა გაყალბებულ ოქმს. მაშინ ის უკრაინის საარჩევნო კომისიის თავმჯდომარის მოადგილე იყო.
2007 წლის შემდეგ, ბატონი დავიდოვი ჩვენი კომიტეტის სპეციალური მრჩეველია. ჩვენ მოხარული და ამაყები ვართ, რომ იგი შეუერთდა კომიტეტის მისიას საქართველოში. ბევრ რჩევას მოგვცემს, რადგან იგი თავად იყო არჩევნებში გაყალბების პროცესის მომსწრე. იაროსლავ დავიდოვიჩი გამოცდილი ადამიანი და საუკეთესო მრჩეველია არჩევნების საკითხში”, – განაცხადა ნოლანმა.
იაროსლავ დავიდოვიჩმა შეხვედრაზე ჟურნალისტებისთვის განმარტება გააკეთა: “ღია დემოკრატიის” კომიტეტმა საარჩევნო კამპანიის დაწყებამდე გარკვეული მუშა შეხვედრები დაიწყო, მაგრამ ეს არ ნიშნავს იმას, რომ ჩვენ უკვე ვახორციელებთ სადამკვირვებლო მისიას, როგორც ეს ვიღაცეებს ჰგონიათ.
დამკვირვებლები მუშაობას დაიწყებენ იმის შემდეგ, როცა დაიწყება წინასაარჩევნო კამპანია. რა თქმა უნდა, თუ იქნება სახელმწიფოს და ცენტრალური სარჩევნო კომისიის კეთილი ნება.
თუმცა, ჩვენ უკვე გვაქვს საქართველოს პრეზიდენტის და საგარეო საქმეთა სამინისტროს მოწვევა, სადაც ისინი აღნიშნავენ რომ იწვევენ საერთაშორისო ორგანიზაციებს მიიღონ სადამკვირვებლო მონაწილეობა მომავალ არჩევნებში.
დიდი მადლობა მათ ამისთვის, რადგან მათი მხრიდან ეს ნიშნავს, რომ გვაძლევენ შანსს დავაკვირდეთ არჩევნებს ღიად და გამჭვირვალედ.
მისია ჯერ-ჯერობით, მხოლოდ ექსპერტის როლს ასრულებს, სწავლობს წინასაარჩევნო პოლიტიკურ სიტუაციას, საარჩევნო კანონმდებლობას, ეცნობა პოლიტიკური ძალების ხელმძღვანელებს. ადგილზე ვეცნობით პოლიტიკური ძალების წინასაარჩევნო ნაბიჯებს. რათა საარჩევნო კამპანიის დასრულების შემდეგ ობიექტურად შევაფასოთ ჩვენს ხელთ არსებული კამპანიის მსვლელობისას მასალები.
ჩვენი მიზანია, პირველ ეტაპზე გავერკვეთ პოლიტიკურ და საკანონმდებლო სიტუაციებში. როდესაც დაიწყება საარჩევნო კამპანია, ამის შესწავლის დრო უკვე არ არის.
მისიაში ადამიანები, რომლებსაც რამდენიმე ქვეყანაში მუშაობის და იქ მიმდინარე საარჩევნო გარემოს დაკვირვების გამოცდილება აქვთ.
ჯერ ადრეა შევაფასოთ ჩვენს ხელთ არსებული ინფორმაციები, ბოლომდე არ ვართ ყველაფერზე ინფორმირებული. ვაგრძელებთ მუშაობას, რადგან მისიის ის წარმომადგენლები, რომლებიც არჩევნებზე დამკვირვებლის რანგში ჩამოვლენ, თუ არ იქნებიან ობიექტურად ინფორმირებულები რა ხდება აქ, ვერ შეძლებენ მუშაობას”.
“გურია ნიუსი”: _ თქვენ ხელი არ მოაწერეთ უკრაინაში ჩატარებული საპრეზიდენტო არჩევნების დოკუმენტს. რა პრობლემას წააწყდით გაყალბების დროს?
“დიახ, მე ექვსი წელი ვმუშაობდი ცენტრალურ საარჩევნო კომისიაში, ვხედავდი წლიდან წლამდე როგორ მძაფრდებოდა სიტუაცია. რეჟიმი მივიდა იქამდე, რომ 2004 წელს დაბეჭდეს 10 ათასობით ფალსიფიცირებული საარჩევნო ტალონი. მოსახლეობაში არიგებდნენ. ადამიანები დადიოდნენ ქალაქში, მიდიოდნენ ნებისმიერ საარჩევნო უბანში. სხვადასხვა უბანში 10-ჯერ აძლევდნენ ხმას. აღმოსავლეთ უკრაინიდან დასავლეთ უკრაინაში ხალხი მატარებლით ჩამოიყვანეს, ფალსიფიცირებული სარჩევნო ტალონებით დაურიგეს და ასე აძლევდნენ საარჩევნო უბნებში ხმას.
რაც მაშინ უკრაინაში ხდებოდა, ცინიზმის ყველა ზღვარს გასცდა ყველაფერს ვხედავდი, მითუმეტეს რომ მე ვხელმძღვანელობდი ბიულეტენების მომზადების პროცესს. კომისიის თავმჯდომარე გავაფრთხილე და ვუთხარი: _ რას აკეთებთ?! როდესაც არჩევნების მეორე ტურის შედეგამდე მივედით, ვუთხარი რომ მე არ მოვაწერდი ხელს დოკუმენტს. რა თქმა უნდა, დარბოდნენ და რაღაცეებს მეუბნებოდნენ, მაგრამ მე კატეგორიული უარი ვთქვი და ხელი არ მოვაწერე. სწორედ ჩემი პოზიცია და დოკუმენტი, რომელსაც ხელი არ მოვაწერე, იყო მთავარი ღერძი უკრაინის უზენაესს სასამართლოში.
მე არ ვამბობ რომ ჩემი ქმედება იყო გმირობა. ეს იყო ნორმალური პოზიცია. წლების მანძილზე იქ იმდენი ვნახე, რომ თამამად შემეძლო ფალსიფიკაციაზე უარი მეთქვა.
ვისურვებდი, საქართველოს საარჩევნო კომისია ფალსიფიკაციის შემთხვევაში მოიქცეს ისე, როგორც მე. მთავარია მოიპოვო ხალხის ნდობა, როდესაც ცენტრალური საარჩევნო კომისიის თავმჯდომარე გავხდი, კომისიის წევრებს პირველივე შეხვედრაზე ვუთხარი: ჩვენ უნდა ხალხის ნდობა დავიბრუნოთ. ნდობის გარეშე არაფერი გამოვა.”
