_ სულ რამდენიმე დღის წინ, ქუთაისში ჩატარდა გრანდიოზული შეხვედრა ბიძინა ივანიშვილთან, სადაც მთელმა იმერეთმა უარი უთხრა სააკაშვილს. იცით, რომ 17 ივნისს გამოცხადებული არის ბატონ ივანიშვილთან შეხვედრა გურიის რეგიონში? აქაც, რა თქმა უნდა, მე ღრმად ვარ დარწმუნებული, რომ გურულები უარს ეტყვიან ამ ტოტალიტარულ რეჟიმს, _ მიხეილ სააკაშვილს და ნაციონალურ მოძრაობას, _ განაცხადა სალუქვაძემ.
სალუქვაძის თქმით, ოზურგეთში ქვეყნის პირველი პირის ვიზიტის დროს, როცა ის იუსტიციის სახლში სტუდენტებს ხვდებოდა, პარალელურ რეჟიმში, რეგიონული განვითარებისა და ინფრასტრუქტურის მინისტრი რამაზ ნიკოლაიშვილი გურიის ხელისუფლებასთან ფარულ შეხვედრას მართავდა.
თემურ სალუქვაძე: _ მე მინდა ერთ ფაქტთან დაკავშირებით გავამახვილო ყურადღება, როცა გაიგო სააკაშვილმა და ხელისუფლებამ, რომ 17-ში დანიშნულია გურიის მოსახლეობასთან შეხვედრა, ჩამობრძანდა საქართველოს ე.წ. პრეზიდენტი. სიმართლე გითხრათ, ამ შეხვედრის არსი მე არ ვიცი და ვერ გავიგე, მან დააფიქსირა თავისი ჩამოსვლა ოზურგეთში. მაგრამ ეს არ არის მნიშვნელოვანი. მინდა ყურადღება გავამახვილო როგორც კოალიციის ერთ-ერთმა წევრმა, როგორც საკრებულოს დეპუტატმა და “თავისუფალმა დემოკრატმა”, რომ გუშინ პარალელურად მიმდინარეობდა საზოგადოებისთვის ფარული შეხვედრა, რომელსაც რამაზ ნიკოლაიშვილი ატარებდა “ნაციონალური მოძრაობის” ხელმძღვანელებთან და რა თქმა უნდა, იქ გაჟღერებული იქნა ასეთი ფრაზა _ თუკი ქუთაისის სიტუაცია განმეორდებოდა გურიაში, აქ ვერავინ თავის ადგილზე ვერ დარჩებოდა, ანუ ეს არის ტოტალიტარული რეჟიმისთვის დამახასიათებელი ქმედება.
მე მინდა მივმართო რამაზ ნიკოლაიშვილს, ასევე გუბერნატორს, ყველა ხელისუფალს, რაც არ უნდა ღონისძიება ჩაატარონ და ნაბიჯები გადადგან, ამ პროცესს ვერ შეაჩერებენ. გირჩევთ, რომ ნუ გააღრმავებთ ნეგატიურ დამოკიდებულებას საზოგადოების მიმართ”.
“გურია ნიუსმა” თემურ სალუქვაძეს რამდენიმე კითხვით მიმართა.
_ბატონო თემურ, თქვენ აღნიშნეთ, რომ პრეზიდენტის ვიზიტის დროს, რამაზ ნიკოლაიშვილი ოზურგეთში ფარულ შეხვედრებს მართავდა. იქნებ გვითხრათ ვინ მოგაწოდათ ეს ინფორმაცია? თქვენ დაინახეთ? როგორც ვიცით, ბატონი რამაზი ოზურგეთში არ იმყოფებოდა.
_ ეს შეხვედრები დაიწყო დილიდან. ჩვენ გვაქვს ასეთი ინფორმაციები. ჩვენი ინფორმაციით, ბატონი ნიკოლაიშვილი ოზურგეთში იმყოფებოდა, ყველაფერს მალე ფარდა აეხდება.
_ მაშინ იქნებ გვითხრათ კონკრეტული ადგილი, სადაც მიმდინარეობდა ფარული შეხვედრა? “გურია ნიუსთან” საუბარში ბატონმა რამაზმა აღნიშნა, რომ ის ხაშურში იმყოფებოდა.
_ ხო. შეიძლება, არ ვიცი. თქვენ ხართ ჟურნალისტები და შეგიძლიათ გადაამოწმოთ ეს. მე კიდევ ერთხელ ვამბობ, რომ ჩვენი საინფორმაციო წყაროებიდან მივიღეთ ეს ინფორმაცია. რა თქმა უნდა, არ არის დადასტურებული, ჩვენ ამ პიროვნებებს ვერ წარმოვაჩენთ დღეს, იმიტომ რომ მათ შემდეგ გარკვეული საფრთხეები შეექმნებათ. მთავარია, ეს ფაქტი არის.
