_ კოალიცია “ქართული ოცნების” ერთ-ერთი ლიდერმა, თემურ სალუქვაძემ, საქართველოს პრეზიდენტის, ბატონ მიხეილ სააკაშვილის გუშინდელი ვიზიტი ოზურგეთში, როდესაც საქართველოს პრეზიდენტმა სტუდენტებისთვის შეღავათების სისტემის შემოღებაზე ახალი ინიციატივები გააჟღერა, კოალიცია “ქართული ოცნების” მომავალი მიტინგის “გასანეიტრალებლად” მოფიქრებულ აქციად მონათლა, რომლის “არსი მან ვერ გაიგო”. _ თქვა ლია კილაძემ.
კილაძის თქმით, ამავდროულად, სალუქვაძემ ადგილობრივი ხელისუფლება წინასწარ მიტინგის ხელშეშლის მცდელობასა და მოსახლეობის დაშინებაშიც დაადანაშაულა: “მისი თქმით, ამ მიტინგის ჩატარებაზე ადგილობრივი ხელისუფლების ყოფნა-არყოფნა იქნება დამოკიდებული. ამ მოსაზრებას ბატონი სალუქვაძე იმ “ფაქტით” ამყარებს, რომ, თურმე, გუშინ გამგეობაში გამართულა ფარული შეხვედრა რეგიონული განვითარებისა და ინფრასტრუქტურის მინისტრთან, რამაზ ნიკოლაიშვილთან. სალუქვაძე ამ შეხვედრის დეტალებსაც აზუსტებს და საზოგადოებას “უმხელს”, რომ ნიკოლაიშვილმა განაცხადა, თუკი აქ ქუთაისის მსგავსი განმეორდება, არავინ ადგილზე არ გაჩერდებაო.
ლია კილაძე: “რაც შეეხება ფარულ შეხვედრებს, მთელი პასუხისმგებლობით ვაცხადებთ, რომ არათუ მსგავსი ხასიათის შეხვედრა არ გამართულა, არამედ, რეგიონული განვითარებისა და ინფრასტრუქტურის მინისტრი, ბატონი რამაზ ნიკოლაიშვილი გუშინ საერთოდ არ ყოფილა გურიაში _ ის თან არ ახლდა საქართველოს პრეზიდენტს და ეს ყველამ დაინახა. ხოლო სად იყო, ამის დადგენა დაინტერესებულთათვის ძალზედ იოლი იქნება.
ჩვენ მოვუწოდებთ “ქართულ ოცნებას”, მეტი სერიოზულობით შეხედოს მსგავსი ტიპის განცხადებებს. მიგვაჩნია, რომ ამგვარი გამოგონილი ამბების ტირაჟირება მათი მხრიდან წინასწარ ჭიქაში ატეხილ ქარიშხალს წააგავს. მეტიც, საზოგადოებამ შეიძლება მასში გურიაში დაანონსებული ხალხმრავალი მიტინგის წარუმატებლობისთვის წინასწარი პრევენციაც დაინახოს. თუმცა, მსგავსი მიზანიც კი არ ათავისუფლებს ნებისმიერ ადამიანს და მით უფრო პოლიტიკურ ძალას იმ ვალდებულებისგან, რასაც ტყუილსა და ცილისწამებაზე უარის თქმა ქვია,”. _ თქვა პრესკონფერენციის დროს ლია კილაძემ.
“გურია ნიუსი:” _ ქალბატონო ლია, თქვენ ამბობთ, რამაზ ნიკოლაიშვილი გუშინ გურიაში საერთოდ არ იმყოფებოდა და ასევე თქვით, რომ “ხოლო სად იყო, ამის დადგენა დაინტერესებულთათვის ძალზედ იოლი იქნება”. თქვენ, ხომ არ იცით, სად იმყოფებოდა რამაზ ნიკოლაიშვილი გუშინ?
_ ჩვენს ინტერესებში ნამდვილად არ შედის იმის გარკვევა, თუ სად იმყოფებოდა რამაზ ნიკოლაიშვილი და ახლა სად იმყოფება. თუ თქვენ გაინტერესებს, მე ვიცი, რომ ყველას პასუხობს ტელეფონზე და შეგიძლიათ დაუკავშირდეთ, სწორედ ამას ვგულისხმობდი და არა იმას, რომ ჩვენ ვიცით და ვაკონტროლებთ, სად იმყოფება ბატონი რამაზი. _ გვიპასუხა ლია კილაძემ.
ნაციონალური მოძრაობის პრესსპიკერს არ განუმარტავს, თუ არ ინტერესდებიან რამაზ ნიკოლაიშვილის გადაადგილებით, მაშინ რატომ დაეთმო “ერთიანი ნაციონალური მოძრაობის” ოზურგეთის რაიონული ორგანიზაციის პრესკონფერენციის ერთი ნაწილი მინისტრის ჩამოსვლა-არ ჩამოსვლის საკითხს?!
