ბატონი ოთარი გასულ თვეში რედაქციაში გვეწვია და გვთხოვა გაგვერკვია, რატომ არ უხდიან ანსამბლის წევრებს დაპირებულ 6 თვის გასამრჯელოს. გამოხატვის თავისუფლების გამო იგი დასაჯეს და ათი მომღერლიდან მხოლოდ მას არ ჩაურიცხეს თანხა. ათს მინუს ერთი _ ამ პრინციპით იხელმძღვანელა ოზურგეთის მუნიციპალიტეტის გამგეობამ, როდესაც ანსამბლ “აბჯარის” 9 მომღერალს 240 ლარი გადასცა ჯილდოს სახით, რომელიც ბიუჯეტით გათვალისწინებული არ იყო.
თანხამ, საერთო ჯამში, 2160 ლარი შეადგინა. ოთარ მამალაძე კი ჩვენთვის მოცემული ინტერვიუს გამო დაისაჯა. თუმცა, ოფიციალურ მიზეზად, ოზურგეთის გამგეობა ბატონი ოთარის რეპეტიციებზე არდასწრებას და ანსამბლიდან წასვლას ასახელებს.
“რაც შეეხება “აბჯარის” ყოფილ წევრს ოთარ მამალაძეს, იგი ხელმძღვანელის, ჯემალ ჭელიძის განცხადებით, ანსამბლიდან ჯერ კიდევ ხელშეკრულების გაფორმებამდე იყო წასული და შესაბამისად, 240 ლარს ვერ მიიღებდა,” _ ასეთი კომენტარი მივიღეთ გამგეობის პრესსამსახურიდან.
ოზურგეთის მუნიციპალიტეტის საკრებულოს სოციალურ საკითხთა კომისიის თავმჯდომარე ირინა საჯაია “გურია ნიუსთან” აცხადებს, რომ ოთარ მამალაძე ხელფასს ვერ მიიღებდა, რადგან მას მონაწილეობა არ მიუღია საანგარიშო კონცერტში(?).
თუმცა, დასჯილმა რესპონდენტმა არც საანგარიშო კონცერტის შესახებ იცოდა რამე და არც წასვლის შესახებ დაუწერია ოფიციალური განცხადება. რეპეტიციებს კი ის “გურია ნიუსში” 25 ივნისს გამოქვეყნებული სტატიის შემდეგ არ ესწრებოდა.
“სხვებს მისცენ ხელფასი და მე არა? ეს სამართლიანობაა? არ დაარღვიეს ჩემი უფლებები? იმის გამო, რომ მე წერილი დავწერე “გურია ნიუსში” ამათ უნამუსობაზე და უპასუხისმგებლობაზე, ამის გამო გადამეკიდნენ და ჩემი კუთვნილი ხელფასი არ მომცეს, სხვებს მისცეს ერთჯერადად 240 ლარი, 6 თვის განმავლობაში ღონისძიებებში მონაწილეობისთვის. ძალიან ცუდად ვარ, იქნებ, დავყვე ამ ამბავს და თქვენ იცოდეთ, _ აცხადებს “გურია ნიუსთან” ოთარ მამალაძე.
240 ლარი, რომელიც ოთარ მამალაძეს ხელფასი ჰგონია, სინამდვილეში გამგეობის ერთჯერადი საჩუქარია ჰონორარის სახით. “აბჯარი” დამოუკიდებელი ანსამბლია და მუნიციპალიტეტის გამგეობასთან არანაირი კავშირი არ აქვს. ამას ინტერვიუში ირინა საჯაიაც არ უარყოფს.
ირინა საჯაია: “ბიუჯეტით განსაზღვრული არ იყო, მაგრამ შემოიტანეს განაცხადი. კულტურის ცენტრმა თქვა, რომ მიიღებენ მონაწილეობას და ჩაატარებენ კონცერტს. სხვათაშორის, მიიღეს მონაწილეობა ღონისძიებაში და ჩაატარეს, ერთი თვე სტაბილურად იმეცადინეს და საკმაოდ კარგი პროგრამა დადეს. ვნახეთ საანგარიშო კონცერტი, შევაფასეთ. ამათ სარეპეტიციო ოთახი უსასყიდლოდ დავუთმეთ კულტურის ცენტრში და რეპეტიციებს ატარებენ. ვნახეთ მათი კონცერტი და გადაწყვეტილება მივიღეთ. ნამდვილად, ჰონორარის სახით, ამ ადამიანებს მივეცით 250 ლარი. დავაკმაყოფილეთ მოკლედ ხალხი.”
გამგეობის “კეთილი ნება” საკმაოდ უცნაურად გამოიყურება. ირინა საჯაიას თქმით გამგეობის სიმპათია ამ ანსამბლმა იმ კონცერტებითაც დაიმსახურა, რომელიც მათ 9 და 26 მაისს ჩაატარეს. ამ კონცერტებში კი ოთარ მამალაძემაც მიიღო მონაწილეობა.
_ მხოლოდ ორ კონცერტში მიიღო მონაწილეობა, ორ სიმღერაში მივცეთ 240 ლარი? _ კითხულობს ირინა საჯაია.
საინტერესოა, თუკი სხვებმა ერთჯერადი ჰონორარის სახით მიიღეს 240 ლარი, მამალაძემ რა დააშავა? თუკი ეს სამი კონცერტის თანხა იყო ერთად აღებული, რატომ იმ ორის მაინც არ მისცეს, რომელშიც მონაწილეობდა?
ახალგაზრდა იურისტთა ასოციაციის ოზურგეთის ოფისის წარმომადგენელი, თამაზ ტრაპაიძე “გურია ნიუსთან” საუბრისას ამ ფაქტს დისკრიმინაციად აფასებს.
“როცა მუნიციპალიტეტი აჯილდოვებს ანსამბლის წევრებს კარგად მომზადებული კონცერტისთვის, ყველა წევრი უნდა დააჯილდოვოს. ერთ-ერთი მათგანის ჯილდოს გარეშე დატოვება, აშკარად დისკრიმინაციულია. თუკი რომელიმე წევრი რეპეტიციებზე არ დადიოდა, ეს თავად ანსამბლის შიდა პრობლემაა და მან დამოუკიდებლად უნდა მოაგვაროს იგი. როგორც ჩანს, ანსამბლი კერძო სამართლის სუბიექტია, ამასთან იგი არ ექვემდებარება კულტურის ცენტრს. ამ შემთხვევაში ან ანსამბლისთვის უნდა გადაეცათ სრული თანხა და იგი გადაანაწილებდა მას ანსამბლის წევრებზე დამსახურების შესაბამისად ან უკლებლივ ყველა წევრი უნდა დაეჯილდოვებინა. სხვა შემთხვევაში, გაუგებარია მუნიციპალიტეტის ასეთი გადაწყვეტილება.”
ყველაზე საინტერესო და მოულოდნელი პასუხი კი ირინა საჯაიასგან ამ კითხვაზე მივიღეთ:
_ ანუ ეს ადამიანი მის კუთვნილ ხელფასს ვერ მიიღებს?
_ ვერ მიიღებს, სამწუხაროდ. ის ხომ მისი სურვილით წავიდა, ყველას მისი პოლიტიკური შეხედულება აქვს და ღმერთმა შეარგოს. (?!)
კითხვა პოლიტიკური შეხედულებების შესახებ, ჩვენ არ დაგვისვამს, თუმცა, პასუხიდან გამომდინარე, გასაგები ხდება, რომ თურმე მთლად არც უამისობა ყოფილა.
კოალიცია “არჩევნის თავისუფლებისთვის” წევრი, ირაკლი მელაშვილი მომხდარს პოლიტიკურ დისკრიმინაციად და გამოხატვის თავისუფლების შეზღუდვად აფასებს.
ირაკლი მელაშვილი: _ რაც შეეხება ერთჯერადი სახით გაცემულ ჰონორარებს, არამიზნობრივს ვერ დავარქმევთ, მაგრამ ის რომ ბიუჯეტში არ იყო გაწერილი და ისე გამოყვეს, ეს იმას ნიშნავს, რომ ამ ხარჯებს აშკარად წინასაარჩევნო ხასიათი აქვს. ეს არის სწორედ ის შემთხვევა, რასაც ჩვენ ვითხოვდით, რომ არჩევნებამდე 5 თვით ადრე მაინც უნდა აკრძალულიყო ისეთი თანხების გამოყოფა, რაც ბიუჯეტით არ იყო გათვალისწინებული.
როდესაც ანსამბლის 10 წევრიდან ერთს არ აძლევ ჰონორარს იმის გამო, რომ მან დააფიქსირა თავისი პოზიცია, ეს არის აშკარა დისკრიმინაცია. და თუ ქალბატონი ირინას კომენტარსაც გავითვალისწინებთ, ეს არის ერთის მხრივ დისკრიმინაცია პოლიტიკური ნიშნით და მეორეს მხრივ გამოხატვის თავისუფლების შეზღუდვა.”
P.S. ორი დღის წინ, ოზურგეთის მუნიციპალიტეტის კულტურის ცენტრში მისულები, ძალიან სამწუხარო რეალობის წინაშე აღმოვჩნდით. იქ, სადაც ანსამბლ “აბჯარის” წევრები რეპეტიციებს გადიან, სასწრაფო სამედიცინო დახმარების მანქანა დაგვხვდა. კულტურის ცენტრის ხელმძღვანელთან თავისი ჰონორარის ამბის გასარკვევად მისული ბატონი ოთარ მამალაძე ცუდად გახდა და სასწრაფო სამედიცინო დახმარების ბრიგადის გამოძახება გახდა საჭირო…
