პირველი საკითხის ირგვლივ, რომელიც “2012 წლის ბიუჯეტის დამტკიცების შესახებ” ოზურგეთის მუნიციპალიტეტის საკრებულოს 2011 წლის 9 დეკემბრის დადგენილებაში ცვლილების შეტანას ეხებოდა, კობა ხაბალაშვილმა ისაუბრა და თქვა, რომ სოფლის მხარდაჭერის პროგრამის ფარგლებში სახელმწიფო ბიუჯეტიდან ოზურგეთის მუნიციპალიტეტს მილიონ 381415 ლარი გამოეყო. საკრებულოს თავმჯდომარემ, ალეკო მამეშვილმა განაცხადა, რომ შექმნილია ინსპექტირების ჯგუფი და ყველა აქტივობას უნდა დაერქვას თავისი სახელი. მას სიტყვა ჩაუჭრა მელექედურის მაჟორიტარმა დეპუტატმა, ქრისტიან-დემოკრატმა ავთო ხინთიბიძემ და უთხრა, რომ მის სოფელში პრიორიტეტი კარგად არ არის გამოკვეთილი, საბავშვო ბაღისთვის გამოყოფილი 33 000 ლარი ხალხის გამოკითხვის გარეშე ვერ დაიხარჯება და ამისთვის ვადა გაგვიგრძელეთო. მამეშვილმა თქვა, რომ ეს გამოკითხვა უკვე ჩატარებულია და ახალი საბავშვო ბაღის აშენებას რატომ ეწინააღმდეგებით, ჭის შემოღობვა და იქ კაფელის დაგება გირჩევნიათო.
ხინთიბიძემ კატეგორიულად მოითხოვა მელექედურში ჟურნალისტების ასვლა და იმის გარკვევა, რომ გამოკითხვა მოხდა ერთი საკითხის ირგვლივ: გინდათ საბავშვო ბაღი?
_ ბაღი ვის არ უნდა, მაგრამ იქ უფრო სხვა საქმეებია გასაკეთებელი, პრიორიტეტები მოსახლეობას უბნების მიხედვით აქვს ჩამოთვლილი და ხალხის შეკრება არ მომხდარა, რომ უმთავრესი გამოეყოთ. ეს გამოკითხვა ერთჯერადად, ერთი კითხვის ირგვლივ მოხდაო.
ჩვენ ჩავიწერეთ ინტერვიუ ხინთიბიძესთან, რასაც მალე შევთავაზებთ მკითხველ _ დეპუტატი დაჟინებით ითხოვს სოფელში ჟურნალისტების მისვლას.
სავარაუდოდ, უახლოეს დღეებში, სოფელი მელექედური ვნებათა ღელვის მხრივ, კვლავ ცხელი წერტილი გახდება.
