რა გახდა მისი გათავისუფლების მიზეზი, “გურია ნიუსისთვის”, ჯერჯერობით, ცნობილი არ არის, ამ თემაზე არც თავად შენგელია საუბრობს, თუმცა, ფაქტია, რომ გურიის სამხარეო მთავარი სამმართველოს ახლადდანიშნული პოლიციის შეფთან, სავარაუდოდ, კარგი ურთიერთობა არ ჰქონდა, რადგან სავარძლებს ამ ეტაპზე ცირეკიძის სხვა კადრები ინარჩუნებენ.
“გურია ნიუსი” გურიის სამხარეო მთავარ სამმართველოში ბოლო თვეების განმავლობაში გახორციელებული თუ გასახორცილებელი საკადრო ცვლილებების შესახებ, არაერთხელ წერდა. თუმცა, უკვე ყოფილი უფროსის დავით ცირეკიძის გათავისუფლებასა და მისი კადრების გურიის წასვლის შესახებ ჯერ კიდევ აპრილში ვიუწყებოდით _ “გურიის პოლიციას იმერლები ტოვებენ? _ სწორედ ამ სათაურით განთავსდა “გურია ნიუსის” ვებგვერდზე წერილი, რომელშიც საუბარი იყო გურიის პოლიციაში საკადრო ცვლილებებზე, იმერელი კადრების გაშვებასა და მომავალ საპარლამენტო არჩევნებზე.
“საზოგადოებაში გურიის სამხარეო მთავარ სამმართველოდან “იმერული კადრების” წასვლაზე საუბრობენ, მიზეზად კი მომავალ საპარლამენტო არჩევნებში მათ მიმართ უიმედობა და უნდობლობა სახელდება. აღსანიშნავია, რომ გურიის სამხარეო მთავარი სამმართველოს უფროსის დავით ცირეკიძის კადრი დავით შენგელია ყველას დაუნდობლად აჯარიმებდა, დაჯარიმებულებს კი მან ოზურგეთის მუნიციპალიტეტის საკრებულოს თავმჯდომარეც ზედ მიაყოლა. შენგელიამ სხვა საჯარო მოხელეები და ოზურგეთის საზოგადოების არა ერთი ცნობილი სახეც დააჯარიმა. საზოგადოებაში პოლიციის მხრიდან უხეშობაზეც საუბრობენ. ცოტაც და პოლიციას ხალხი “აუჯანყდებაო” _ ამბობდნენ “გურია ნიუსთან” დაჯარიმებულები”-
ბოლო დროს, ოზურგეთელი მძღოლები სამართალდამცავების გააქტიურებაზე საუბრობდნენ. ისინი ამბობენ, რომ გახშირდა პატრულირება, როგორც დღისით, ისევე ღამის საათებში. ჩვენი წყაროს თქმით, დღის განმავლობაში, პატრულის თანამშრომლები მძღოლებს სხვადასხვა დარღვევებისთვის აჯარიმებდნენ, რაც ბიუჯეტისთვის საკმაოდ სოლიდური შემოსავალია.
_ ვინ გითხრათ რომ მივდივარ? არსადაც არ მივდივარ, მე ვრჩები, _ განუცხადა შენგელიამ “გურია ნიუსს”, გურიის სამხარეო მთავარი სამმართველოს უკვე ყოფილი უფროსის დავით ცირეკიძის სამსახურიდან გათავისუფლების შემდეგ.
ბოლო დღეებში შენგელია თავის უფლება-მოსილებას დაბა ურეკში ასრულებდა: _ ალბათ, გადამეტებული ჯარიმებისათვის ძალიან გაანაწყენა გურული საზოგადოება, რომელსაც ყველაზე მეტად ამ საარჩევნოდ “ეფერებიან” და ვისი “განაწყენებაც” ახლა ხელისუფლებას ნამდვილად არ “აწყობს”. სწორედ ეს გახდებოდა მისი სამსახურიდან დათხოვნის მიზეზი, _ ამბობს “გურია ნიუსთან” საუბარში რამდენიმე ოზურგეთელი.
“გურია ნიუსი” დაუკავშირდა დავით შენგელიას, რომელმაც ასეთი პასუხი გაგვცა:
_ იცით, ვისაც უნდა მიმართოთ და ვინც უნდა გაგცეთ მაგ კითხვაზე პასუხი.
_ ბატონო დავით, რა გახდა თქვენი გათავისუფლების მიზეზი?
_ძალიან გთხოვთ პრესსამსახურს მიმართეთ, _ გვითხრა შენგელია.
