შეხვედრაზე პრემიერ-მინისტრის მთავარი სასაუბრო თემა ქართული სოფელი იყო, ამიტომ ყველაზე ვრცლად სოფლის რწმუნებულებს ესაუბრა.
როგორც გვითხრეს, ვანო მერაბიშვილს უხუმრია კიდეც _ გურულები ყველაზე სწრაფად იგებენ ინფორმაციას, ჩემზეც ადრეცო.
რაც შეეხება არასახუმარო თემებს, საჯარო მოხელეებმა განაცხადეს, რომ ეს დახურული თათბირი იყო და ინფორმაციის გამხელის უფლება არ ჰქონდათ. ოზურგეთის მუნიციპალიტეტის გამგეობის მოვალეობის შემსრულებელმა ილია ვაშაყმაძემ ამ შეხვედრას სამუშაო თათბირი უწოდა და დეტალების გამხელა არ ისურვა.
როგორც ჩანს, წინასაარჩევნოდ სოფლის რწმუნებულების როლი გაიზრდება. შეგახსენებთ, რომ მათი ხელფასი 2012 წლის თებერვლიდან 700 ლარს შეადგენს.
“გურია ნიუსი” შეხვედრის დეტალების გასარკვევად სოფლის რამდენიმე რწმუნებულს დაუკავშირდა. სოფელ თხინვალის რწმუნებულმა უარყო პრემიერ-მინისტრთან შეხვედრა, სოფელ გურიანთის რწმუნებულის თქმით, ის ამ დროს ყანაში იმყოფებოდა (შეგახსენებთ, რომ “ქართული ოცნების” ოზურგეთში გამართული აქციის დროსაც რამდენიმე რწმუნებული, რომლებსაც კითხვებზე პასუხის გაცემა არ სურდათ, აცხადებდა, რომ ყანაში იმყოფებოდნენ ავტ.).
სოფელ ოზურგეთის რწმუნებულმა გვითხრა, რომ იმ დროს ურეკში წავიდა საქმესთან დაკავშირებით. ერთ-ერთმა რწმუნებულმა დაადასტურა, რომ ნამდვილად მიიწვიეს მერაბიშვილთან შეხვედრაზე, მაგრამ დასაჯდომი სკამი აღარ იყო.
_ ვიყავი მისული, მაგრმ დარბაზში ბევრი ხალხი იმყოფებოდა და აქედან გამომდინარე, ჩემი ადგილი არ აღმოჩნდა, ამიტომ გარეთ ვიყავი. _ გვითხრა ოზურგეთის მუნიციპალიტეტის სოფლის ერთ-ერთმა რწმუნებულმა.
ერთის მხრივ, პრემიერ-მინისტრს ქართული სოფლის ფეხზე დაყენება სოფლის რწმუნებულებთან ერთად სურს, მაგრამ მეორეს მხრივ, რა გზით აპირებენ ამის გაკეთებას, გასაიდუმლოებულია მედიისთვისაც და სოფლის მცხოვრებლებისთვისაც.
