_ ქალბატონო თინა, ისე სწრაფად და უკომეტაროდ დატოვეთ დარბაზი, რომ ჟურნალისტებმა კითხვის დასმაც ვერ მოახერხეს თქვენთვის.
_ რა გაინტერესებთ კონკრეტულად? რატომ წავედი დარბაზიდან? დარბაზიდან იმიტომ წავედი რომ, ძალინ დიდხანს გაგრძელდა, იმაზე დიდხანს, ვიდრე მეგონა. როგორც კი გახდა 12 საათი, სხვა შეხვედრა მქონდა დანიშნული და ნამდვილად ვერ გავჩერდებოდი. ძალიან მარტივი ამბავი იყო. ამაში არაფერია განსაკუთრებული და საინტერესო. პრესას ჩემი ხელმისაწვდომობა არ უჭირს. კონკრეტულ მომენტში აუცილებად უნდა წავსულიყავი, სხვა გზა არ იყო.
_ ამბობენ, რომ შიდა პრაიმერებით, თბილისში, რამდენიმე ოლქში გქონდათ მაღალი რეიტინგი, საგარეჯოში რატომ დაგასახელეს?
_ კი და სწორედ ნათლად გამოჩნდა რომ… გასაგებია, რომ მე თბილისში პრობლემა არ მექნებოდა და ნებისმიერ ოლქს მოვიგებდი, მაგრამ მგონია, არც ჩვენი კანდიდატების უდიდეს რაოდენობას ექნება ეს პრობლემა.
მესმის, რომ თბილისელები ხმას მაძლევენ, გავიგე. ძალიან მადლობელი ვარ ამისთვის, მაგრამ, წავედი იქ, სადაც ყველაზე მძიმე ოლქია. მოგეხსენებათ, ტრადიციული ქართული გაყალბების მეთოდების გამო, საგარეჯო ერთ-ერთი ყველაზე რთული ოლქია.
წავედი იქ, სადაც გვიჭირს და არა იქ, სადაც ყველაზე კარგად ვართ. თბილისში, გასაგებია, ყველა მოიგებს და ამაში არაფერია განსაკუთრებული. თბილისის იქეთ ერთადერთი ოლქი, რომელთანაც მთელი ჩემი ცხოვრებაა დაკავშირებული, საგარეჯოს რაიონია. ის ჩემი დედულეთია. პრინციპში, მთელი 38 წელი იქ მაქვს გატარებული. ჩემი შვილები ახლაც საგარეჯოში არიან, სადაც პატარა სახლიც გვაქვს. არ არსებობს არცერთი ქართული სოფელი საგარეჯოს რაიონში, სადაც ჩემი ნათესავები არ ცხოვრობენ. ამიტომ გადაწყდა იქ და არა სხვაგან, სადაც ასევე რთული ოლქებია.
_ თქვენი მაჟორიტარად წარდგენის დღეს, ბიძინა ივანიშვილმა “რესპუბლიკურ პარტიას” უცნაური შეფასება მისცა. რამაც საზოგადოება დააბნია. რამდენად მისაღები იყო თქვენთვის ივანიშვილის შეფასება?
_ იცით რა არის? არავითარი მნიშვნელობა არ აქვს ჩემთვის, მისაღებია თუ არ არის მისაღები… ამ კოალიციაში ვართ და ამითი პასუხი გაცემულია. არანაირი განსაკუთრებული პრობლემები მისაღებ-მიუღებლობების შესახებ არ დგას და თემა დახურულია.
შეიძლება ვეთანხმები ან არ ვეთანხმები იმას, რასაც ბატონი ბიძინა ამბობს. მე მას ნაწილობრივ არ ვეთანხმები, ისევე როგორც თავად რაღაცეებში არ გვეთანხმება. ზუსტად ეს არის ამ კოალიციის ხიბლი, ხელისუფლებისგან განსხვავებით, რომ ეს არ არის ერთი დიდი მონოლითური გაერთიანება – სწორება ბელადზე და ა.შ. აქ არის თავისუფალი ადამიანების კრებული, სადაც არავინ ითხოვს არავისგან საკუთარ პრინციპებზე, ფილოსოფიაზე, განწყობებზე უარის თქმას.
მაშინ არ ვიყავი პარტიის წევრი, მაგრამ იცით, რატომ წავიდა “რესპუბლიკური” პარტია “ნაციონალური” მოძრაობიდან? იმიტომ, რომ იყო მოთხოვნა – სწორება ბელადზე! სადაც ბელადი, ცოტა არ იყოს, არასტაბილური ფსიქიკის ადამიანი იყო.
ეს აქ არ არსებობს! ამიტომ არის კოალიცია ძალიან მომხიბვლელი და მისი ლიდერი ბევრად შთამბეჭდავი და მნიშვნელოვანი ჩვენთვის.
_ დავით უსუფაშვილი არის საბურთალოს მაჟორიტარობის კანდიდატი. ამ რაიონის მაჟორიტარობის კანდიდატია ჯონდი ბაღათურიაც. ერთ რაიონში ორი ოპოზიციური პარტიის კანდიდატის წარდგენით ხელისუფლება ხომ არ იხეირებს?
_ არჩევნებია და ყველა ადამიანი იქ იყრის კენჭს, სადაც თავად თვლის საჭიროდ. შეიძლება იმიტომ, რომ ჰგონია იქ ყველაზე კარგი პოზიციები აქვს ან გუნდისთვის ასეა საჭირო და მომგებიანი. სხვადასხვა მოტივები აქვთ ადამიანებს, როდესაც ამ გადაწყვეტილებას იღებენ. არავითარი პრობლემა არ არის, არჩევნები არის კონკურენცია. როდესაც თამაშის წესი დადგენელია და ამ დადგენილი თამაშის წესით ხდება კონკურენტულ რეჟიმში ბრძოლა, მაშინ პრობლემა არ არის. ამ შემთხვევაში, ჯონდი ბაღათურია არ არის პრობლემა.
პრობლემა იქნება თამაშის ის წესები, რასაც საარჩევნოდ ხელისუფლების მაჟორიტარები შემოგვთავაზებენ.
საბურთალოზე ყველა ბოლო არჩევნების დროს, ყველგან მივარდებოდა “ნაციონალური მოძრაობა”, მათი შტაბის წევრები და შეხვედრებს მიშლიდნენ. იწყებდნენ ყვირილს, ისტერიკებში ვარდებოდნენ, ან ჩემთან ერთად, ორ ხმაში ლაპარაკობდნენ. ეს არ არის არჩვენები. მნიშვნელოვანია, რა სტრატეგიას აირჩევს ბატონი ანდრია ურუშაძე. როგორც ამბობენ, ის იქნება საბურთალოზე მმართველი გუნდის კანდიდატი. მას კარგად არ ვიცნობ, მაგრამ დიდი იმედი მაქვს, რომ ის ეთიკის და ზნეობის ნორმებს არ გადავა.
_ კოალიციამ ბათუმში მურმან დუმბაძე წარადგინა. აჭარაშია გია მასალკინიც. ამ ადამიანებს ერთმანეთთან გარკვეული დაპირისპირება ჰქონდათ (კითხვის დასმა არ დაგვასრულებინა. ავტ)
_ მათ დაპირისპირება არ ჰქონიათ, მათ ჰქონდათ პოლიტიკური შეუთავსებლობა!
_ როდესაც აჭარის შტაბში მურმან დუმბაძესთან უნდა იმუშაონ რესპუბლიკელებმა, როგორი განწყობა (კითხვის დასმა არ დამასრულებინა. ავტ)
_ “რესპუბლიკელების” მთავარი პლიუსი ის არის, რომ პირად სიბრაზეს, განაწყენებას, პირად დამოკიდებულებებს გვერდზე დებენ, როდესაც საერთო საქმეა გასაკეთებელი. ეს პარტია იმდენ კოალიციაში ყოფილა, თქვენ რა გგონიათ ყოველთვის ყველა ბედნიერი იყო, რაც ხდებოდა?! მაგრამ, ეს პრობლემა “რესპუბლიკელებს” არასდროს შეუქმნიათ. ზუსტად ასე იქნება ახლაც. გადაწყვეტილება ასეთი იქნა მიღებული. ჩვენ ვეთანხმებოდით თუ არ ვეთანხმებოდით ამ გადაწყვეტილებას… რაც მთავარია, გადაწყვეტილება ყველამ ერთად მივიღეთ. შესაბამისად, პასუხისმგებლობასაც ერთობლივად ვატარებთ. ამიტომ, აქ განსაკუთრებულ პრობლემას ვერ ვხედავ.
_ რადენად გაქვთ თქვენი ამორჩევლის იმედი?
_ მე ვარ აბსოლუტურად დარწმუნებული, რომ გამარჯვება შესაძლებელია. მთავარია, მოვახერხოთ და არჩევნებისადმი ნდობა დავუბრუნოთ საგარეჯოს რაიონის აზერბაიჯანულენოვან მოსახლეობას. ამ ბოლო თვეების განმავლობაში, მე რამდენჯერმე ვიყავი ორმუღალოში ჩასული, მათ აქვთ განცდა – რა მნიშვნელობა აქვს, მათ ხმებს ხომ ყოველთვის აყალბებენ… ამიტომ, არჩევნების მიმართ ძალიან პესიმისტური და უიმედო დამოკიდებულება აქვთ. ჩემი მთავარი ამოცანა იქნება, მათ დავუბრუნოთ არჩევნებისადმი ნდობა, რაც იმას ნიშნავს, რომ მოვიდნენ საარჩევნო უბნებზე. თუ ასე მოხდება, მაშინ ხელისუფლებას გაყალბების რესურსი ძალიან მინიმალური დარჩება. ასეთ შემთხვევაში, დარწმუნებული ვარ, წინ არაფერი დაუდგება ერთის მხრივ კოალიცია “ქართული ოცნების” და მეორეს მხრივ, ჩემი როგორც მაჟორიტარი კანდიდატის გამარჯვებას.
_ კოალიციაში წარდგენილი მაჟორიტარი კანდიდატებიდან არ არის წარმოდგენილი არცერთი ეროვნული უმცირესობის წარმომადგენელი, რატომ?
_ არ ვიცი. ამ კუთხით არ შემიხედავს ნამდვილად. თუმცა, სწორედ ის რაიონებია დარჩენილი, სადაც შესაძლოა წარმოდგენილი სწორედ ეროვნული უმცირესობა იყოს. არ ვიცი, უბრალოდ ვერაფერს გეტყვით. არ ვმონაწილეობ ამ პროცესში სადაც ეს თემები იხილება და ნამდვილად არ ვიცი.
_ საუბრობენ იმაზე, რომ ზუგდიდში “ნაციონალური მოძრაობის” მაჟორიტარობის კანდიდატი როლანდ ახალაია იქნება. თქვენ რას აპირებთ?
_ აუფ, რა საყვარლობა იქნება! არ ვიცი ნამდვილად. ჩვენ პროცესი დავიწყეთ და არავის ველოდებით. ჩემის აზრით, ზუგდიდში ცნობილია კანდიდატი, მაგრამ ოფიციალურ გამოცხადებას დაველოდოთ. სწორედ იმიტომ დავასახელეთ ჩვენ კანდიდატები, რომ არავის არ ველოდებით და არავისთან კონკურენციაში არ ვართ. საკუთარ ამომრჩეველს უნდა დავუმტკიცოთ ის უპირატესობა, რომელშიც ის იცხოვრებს ქართული ოცნების გამარჯვების შემთხვევაში.
ოქტომბრიდნ მოყოლებული, არის ქვეყანაში ძალა, რომელიც ადგენს დღის წესრიგს, ეს არის “ქართული ოცნება” და მერე არის ხელისუფლებაში მყოფი ძალა, რომელიც მუდმივად ორი ნაბიჯით უკან არის. ახლა იფიქრონ და იტეხონ თავი, სად ვინ დაუპირისპირონ ჩვენს კანდიდატებს.
